“Shi mɛi ni kɛ amɛhiɛ fɔ̃ɔ Yehowa nɔ lɛ baaná hewalɛ ekoŋŋ. Amɛbaafiliki kɛya ŋwɛi shɔŋŋ oookɛɛ amɛyɛ okropɔŋ fiji. Amɛbaajo foi ni amɛgbɔjɔɔɔ; amɛbaanyiɛ ni etɔɔɔ amɛ.”​—Yesaia 40:31, Jeŋ Hee Shishitsɔɔmɔ.

 “Shi mɛi ni hiɛ kã NUŊTSƆ lɛ nɔ lɛ baaná hewalɛ hee, amɛbaahole amɛfiji anɔ tamɔ okropɔŋi, amɛbaajo foi ni etɔŋ amɛ, amɛbaanyiɛ ni amɛgbɔjɔŋ.”​—Yesaia 40:31, New King James Version.

Nɔ Ni Yesaia 40:31 Lɛ Tsɔɔ

 Yehowa a ewo mɛi ni jáa lɛ lɛ shi akɛ, ebaahã amɛ hewalɛ ni he hiaa amɛ koni amɛnyɛ amɛkɛye naagbai ni amɛkɛkpeɔ lɛ anɔ, loo amɛkɛdamɔ amɛnaagbai lɛ anaa.

 “Mɛi ni kɛ amɛhiɛ fɔ̃ɔ Yehowa nɔ lɛ baaná hewalɛ ekoŋŋ.” Mɛi ni heɔ amɛyeɔ akɛ Nyɔŋmɔ baanyɛ aye abua ewebii lɛ, ni eesumɔ ni efee nakai lɛ, baanyɛ aná nɔmimaa akɛ ebaaye ebua amɛ. (Abɛi 3:5, 6) Gbɛ kome ni Nyɔŋmɔ tsɔɔ nɔ ewoɔ mɛi ni jáa lɛ lɛ hewalɛ ji, ehãa amɛ emumɔ krɔŋkrɔŋ lɛ, loo ehewalɛ ni miitsu nii lɛ.​—Luka 11:13.

 “Amɛbaafiliki kɛya ŋwɛi shɔŋŋ oookɛɛ amɛyɛ okropɔŋ fiji.” Mfonirifeemɔŋ wiemɔ nɛɛ hãa wɔnaa bɔ ni Nyɔŋmɔ hewalɛ lɛ baanyɛ aná mɔ ko nɔ hewalɛ ehã. Kɛ́ okropɔŋ ná kɔɔyɔɔ ni mli edɔ fioo lɛ ni miiya ŋwɛigbɛ lɛ, ebaanyɛ efiliki kɛya ŋwɛi shɔŋŋ. Kɛ́ ená eshɛ he ko ni kɔɔyɔɔ lɛ mli edɔ fioo lɛ, egbɛɔ efiji amli ni ebɔleɔ ehe yɛ jɛmɛ, ni no hãa enyɛɔ efilikiɔ kɛyaa ŋwɛi shɔŋŋ. Shiii abɔ ni efilikiɔ kɛyaa ŋwɛi ni enáa kɔɔyɔɔ ni mli edɔ lɛ, shii abɔ ni etsɛɔ yɛ jɛmɛ ji no, ni enyɛɔ efilikiɔ ŋmɛlɛtswai abɔ kɛyaa he ni eyaa ni etɔɔɔ lɛ.

 “Amɛbaajo foi ni amɛgbɔjɔɔɔ.” Shihilɛ mli naagbai baanyɛ agbɔjɔ wɔ yɛ gbɔmɔtsoŋ kɛ henumɔŋ fɛɛ, shi hewalɛ ni Nyɔŋmɔ kɛhãa lɛ baanyɛ ahã wɔkpee naa. Ebaanyɛ ewaje wɔ ni wɔfee nɔ ni ja, ekɔɔɔ he eko shihilɛi ni mli wawai ni wɔkɛkpeɔ. Bɔfo Paulo, mɔ ni nyɛ efi shi yɛ kai ni mli wawai amli lɛ, ŋma akɛ: “Yɛ nɔ fɛɛ nɔ mli lɛ, mitsɔɔ mɔ ni wajeɔ mi lɛ nɔ mináa hewalɛ.”​—Filipibii 4:13.

Saji Ni Kɔɔ Yesaia 40:31 Lɛ He

 Nyɔŋmɔ kɛ emumɔ lɛ tsirɛ gbalɔ Yesaia ni eŋma sane nɛɛ aaafee afii 2,700 ni eho nɛ. Eyɛ mli akɛ ŋmalɛ nɛɛ kɔɔ Nyɔŋmɔ tsuji anɔkwafoi fɛɛ ahe moŋ nɛ, shi ekolɛ Yehowa kɛ wiemɔi nɛɛ hã koni ekɛwo Yudafoi lɛ hewalɛ, ejaakɛ no mli lɛ aaba abaŋɔ amɛ nom kɛya Babilon ni amɛyaye afii 70 yɛ jɛmɛ. Be ni Yudafoi lɛ jɛ nakai nomŋɔɔ lɛ mli kɛba amɛshikpɔŋ lɛ nɔ lɛ, amɛna akɛ Nyɔŋmɔ wiemɔi nɛɛ eba mli. (Yesaia 40:1-3) Nyɔŋmɔ hã amɛ hewalɛ ni amɛnyɛ amɛkɛfã gbɛ b kakadaŋŋ ni bɛ mlɛo kɛjɛ Babilon kɛba Yerusalem yɛ afi 537 D.Ŋ.B.​—Yesaia 40:29.