Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

DECEMBER 9, 2015
UNITED STATES

Yehowa Odasefoi Eshɛ Shɔŋŋ Diɛŋtsɛ yɛ Amɛnitsumɔhe Yitso Hee ni Amɛmaa lɛ Mli

Yehowa Odasefoi Eshɛ Shɔŋŋ Diɛŋtsɛ yɛ Amɛnitsumɔhe Yitso Hee ni Amɛmaa lɛ Mli

NEW YORK—Kɛjɛ August afi 2015 kɛyashi October afi 2015 lɛ, akɛ Yehowa Odasefoi anitsumɔhe yitso ni amaa yɛ Warwick, yɛ New York lɛ, shɛ shɔŋŋ diɛŋtsɛ. Nakai bei lɛ amli lɛ, daa gbi lɛ, mɛi 3,800 ni kɛ amɛhe ehã lɛ yayeɔ amɛbua kɛhã tsũi lɛ amaa.

Be ni nitsumɔ lɛ shɛ he ko lɛ, daa gbi lɛ, bɔs woji aaashɛ 40 holeɔ mɛi 3,800 kɛyaa he ni amamɔɔ tsũi lɛ, ni amɛyatsuɔ nii.

Amamɔ niyelihei srɔtoi kpaanyɔ ní mɛi ni kɛ amɛhe ehã kɛtsuɔ nii lɛ baaye nii yɛ jɛmɛ kɛyashi abaagbe nitsumɔ lɛ naa.

Kɛjɛ be ni aje nitsumɔ nɛɛ shishi yɛ July, afi 2013 lɛ, Odasefoi ni fa fe 18,000 ejɛ United States niiaŋ fɛɛ, ni Alaska kɛ Hawaii hu fata he lɛ, kɛbatsu eko. Nitsulɔi 400 kɛmiimɔ 500 bashɛɔ he ni amaa tsũi lɛ yɛ lɛ yɛ otsii lɛ anaagbee. Shi be ni atsu kɛshɛ shɔŋŋ lɛ, mɛi ni bashɛɔ shi yɛ otsii lɛ anaagbee lɛ ayibɔ teke 700. Nitsulɔi nɛɛ ateŋ kpotoo kɛ amɛhe hã akɛ amɛbaatsu nitsumɔi ni heɔ otsi kome kɛmiimɔ otsii ejwɛ.

Richard Devine, ni eji Warwick Tsumaa Ajinafoi Akuu (Construction Project Committee) lɛ sɛinɔtalɔ tsɔɔ mli akɛ: “Akɛni daa gbi lɛ, mɛi akpei saŋŋ batsuɔ nii hewɔ lɛ, ewaaa kwraa akɛ jɛmɛ baatsĩ kɛ gbɔmɛi. No hewɔ lɛ, bɔ ni afee ni anyɛ ato nibii ahe gbɛjianɔ koni nitsumɔ lɛ aya lɛ jogbaŋŋ lɛ, wɔjie mɛi aaashɛ 400 kɛjɛ nitsulɔi ni baa leebi lɛ ateŋ koni amɛtsu nii kɛjɛ shwane ŋmɛji 3 kɛyashi maŋkɛ ŋmɛji 2.” Mɛi nɛɛ tsu nii kɛjɛ May kɛyashi September.

Kɛ́ ama Odasefoi lɛ anitsumɔhe yitso hee lɛ agbe naa, ni odamɔ agbo wulu ni boteɔ shĩa lɛ mli lɛ naa lɛ, kɛ́ hulu miihe anyɔ shi lɛ, bɔ ni obaana lɛ nɛ.

Warwick Tsumaa Ajinafoi Akuu lɛ bɔ amaniɛ akɛ abaagbe tsũi ejwɛ ni akɛbaafee wɔɔhei lɛ ateŋ enyɔ naa yɛ January afi 2016, taakɛ ato yɛ shishijee mli lɛ. Shi Owula Devine tsɔɔ mli akɛ, “kɛ́ wɔkwɛ bɔ ni nitsumɔ yaa lɛ, kɛ he ni wɔkɛshɛ lɛ, abaagbe naa nyɔji ejwɛ dani be ni ato lɛ baashɛ—enɛ fɛɛ jɛ yelikɛbuamɔ kpele ni nyɛmimɛi kɛhã lɛ hewɔ.” Amrɔ nɛɛ, wɔto akɛ be ni September 1, 2016 baakɛɛ eshɛɔ lɛ, wɔgbe wɔɔhei enyɔ krokomɛi ni eshwɛ lɛ, tsũi ni akɛbaafee ɔfis srɔtoi lɛ, kɛ hei ni abaasaa tsɔji kɛ nibii yɛ lɛ anaa.

Kɛ́ ookwɛ nitsumɔhe yitso hee lɛ kɛjɛ ŋwɛigbɛ lɛ bɔ ni obaana lɛ nɛ.

Adafitswalɔi Baanyɛ Atswa Wɔnɔmbɛs Nɛɛ:

International: J. R. Brown, Office of Public Information, tel. +1 718 560 5000