Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

OCTOBER 20, 2015
GHANA

Odasefoi ni Yɔɔ Ghana lɛ Yaye Amɛbua Oya Nɔŋŋ Be ni Nugbɔnɛmɔ ko Fite Nii

Odasefoi ni Yɔɔ Ghana lɛ Yaye Amɛbua Oya Nɔŋŋ Be ni Nugbɔnɛmɔ ko Fite Nii

ACCRA, Ghana—Be ni nugbɔ ko nɛ waa yɛ Accra, ni ji Ghana maŋtiase lɛ, ni efite nii babaoo, ni egbe mɛi 200 kɛ sɛɛ hu lɛ, Yehowa Odasefoi lɛ tee oya nɔŋŋ ni amɛkɛ yelikɛbuamɔ bɔi mɛi hãmɔ, amɛgbe yelikɛbuamɔ nɛɛ naa yɛ August afi 2015.

Yehowa Odasefoi komɛi ni yɔɔ akutso lɛ mli lɛ miitsɔɔ he ni nu lɛ yata yɛ Odasefonyo ko ni nu lɛ fã lɛ lɛ tsũ he.

Eyɛ mli akɛ Odasefonyo ko gbooo moŋ, shi nu lɛ fite amɛteŋ mɛi aaashɛ 250 awɔɔhei. Be ni nugbɔ lɛ nɛ lɛ, enɔ jetsɛremɔ nɔŋŋ, ni ji June 4, 2015 lɛ, Yehowa Odasefoi anitsumɔhe nine ni yɔɔ Ghana lɛ to ajinafoi akuu ko koni amɛkɛ yelikɛbuamɔ ni sa ayahã mɛi ni oshara eba amɛnɔ lɛ. Ajinafoi akuu nɛɛ kɛ amɛjwɛŋmɔ ma nibii ni he baahia mɛi amrɔ nɔŋŋ lɛ anɔ titri, tamɔ kuntui, atadei, kɛ nu. Ajinafoi akuu nɛɛ to gbɛjianɔ ni ashoo nui lɛ, ajie ŋmɔtɔi ni ebote mɛi ashĩai amli lɛ, ni asaa tsũi hu ni efite lɛ. Odasefoi ni yɔɔ Accra niiaŋ lɛ ŋmɛ gbɛ ni Odasefoi ni oshara lɛ enina amɛ lɛ ekomɛi yahi amɛshĩai amli kɛyashi asaa amɛtsũi ni efite lɛ ahã amɛ.

Dossou Amevor, (abɛkugbɛ) ni ji ajinafoi akuu ni kɛ yelikɛbuamɔ yahã lɛ hiɛnyiɛlɔ lɛ, miikwɛ koni ajara matrɛs ahã mɛi ni oshara enina amɛ lɛ, yɛ Atiman Maŋtsɛyeli Asa ni yɔɔ Madina, yɛ Accra lɛ.

Nugbɔ lɛ naawalɛ lɛ hã pɛtro steshɛŋ ko shã ni efite paip ni hãa mɛi ni yɔɔ Adabraka niiaŋ lɛ nu lɛ, no hewɔ lɛ anáaa nu yɛ jɛmɛ. Yehowa Odasefoi anitsumɔhe nine lɛ to wɔta tank he gbɛjianɔ yɛ Adabraka Maŋtsɛyeli Asa lɛ nɔ kɛhã Odasefoi kɛ akutsoŋbii lɛ koni amɛná nu.

Yɛ Hɔɔ, June 6 lɛ, nitsumɔhe nine lɛ to helatsamɔ kui enyɔ he gbɛjianɔ; kui nɛɛ amli bii ji Odasefoi datrɛfoi enumɔ kɛ nɛɛsifoi enyɔ. Amɛtee amɛyakwɛ Odasefoi kɛ mɛi ni jeee Odasefoi ni yɔɔ Alajo kɛ Adabraka lɛ. Amɛkwɛ mɛi ni miiye helai tamɔ atridii, wɔlɔmɔ, kɛ musuŋtsɔmɔ nɛkɛ. Yehowa Odasefoi ni atsu kɛjɛ nitsumɔhe nine lɛ, kɛ Odasefoi ni yɔɔ akutso lɛ mli lɛ jɛ Biblia lɛ mli amɛshɛje amɛnyɛmimɛi Odasefoi ni oshara enina amɛ lɛ amii.

Odasefoi datrɛfoi etɛ kɛ nɛɛsifoi enyɔ, yɛ Adabraka Maŋtsɛyeli Asa ni akwɛ mɛi yɛ jɛmɛ lɛ mli.

Nathaniel Gbedemah, ni eji Yehowa Odasefoi ni yɔɔ Ghana lɛ anaawielɔ lɛ kɛɛ akɛ: “Edɔ wɔ waa akɛ nugbɔ ni nɛ waa yɛ Accra nɛɛ efite nibii, ni ekpãtã wala babaoo hiɛ. Taakɛ Yehowa Odasefoi efee yɛ je lɛŋ hei komɛi lɛ, wɔmiifee bɔ fɛɛ bɔ ni wɔbaanyɛ ni wɔhã mɛi ni oshara lɛ enina amɛ lɛ nibii ni he baahia amɛ, koni wɔjɛ ŋmalɛi amli hu wɔshɛje amɛmii.”

Adafitswalɔi Baanyɛ Atswa Wɔnɔmbɛs Nɛɛ:

International: J. R. Brown, Office of Public Information, tel. +1 718 560 5000

Ghana: Nathaniel Gbedemah, tel. +233 30 701 0110