Sín 1999 wɛ afɔgblɛ́gblɛ̌ d’afɔ mɛ nú mɛ ɔ ko bɛ́ hwenu e acɛkpikpa France tɔn ɖɔ ɖɔ alaxɔ mǐtɔn e ɖo France é ná sú takwɛ́ nǔníná e é mɔ ɖo 1993 kpó 1996 kpó vlamɛ é tɔn é. Mǐ ylɔ́ hwɛ ɖo hwɛɖɔxɔsá France tɔn lɛ́, hwɛ ka kpa mǐ ǎ. Ée hwɛ ma kpa mǐ ǎ gúdo é ɔ, acɛkpikpa ɔ cí akwɛ́ mǐtɔn e ɖo akwɛ́sɛxwetɛn bo yi 2951793000 FCFA jɛjí é jí. Hwɛɖɔxɔsá ɖaxó Elɔ́pu tɔn e nɔ jɛ hun dó acɛ gbɛtɔ́ lɛ́ tɔn jí é wɛ nyí nukúnɖíɖó ɖokpó e kpo nú mǐ é. Amɔ̌, cóbónú hwɛ ɔ ná bɛ́ ɔ, Hwɛɖɔxɔsá ɖaxó Elɔ́pu tɔn e nɔ jɛ hun dó acɛ gbɛtɔ́ lɛ́ tɔn jí é xo mǐ kpó mɛɖesínhwɛmɛtɔ́ acɛkpikpa France tɔn tɔn lɛ́, gɔ́ nú afɔsɔ́ɖótetɔ́ hwɛɖɔxɔsá ɖaxó Elɔ́pu tɔn tɔn lɛ́ kpó kplé bá kpɔ́n ɖɔ mǐ ka sixú se nǔ jɛ mǐɖée gbe mɛ cóbɔ xó ɔ ná yi hwɛ nukɔn a jí.

Mǐ ko mɔ sɛ́dó nukɔn ɖɔ gǎn ɔ ná dó cɔcɔ nú mǐ ɖɔ mǐ ní yí gbe bá sú akwɛ́ e è kán nú mǐ é sín akpáxwé ɖé bá dó ɖe ɖɛ xó ɔ. É ɖo mɔ̌ có, mǐ tuun ganjí ɖɔ fláan ɖokpó yǎyá súsú ná t’afɔ nǔgbódodó Jexóva tɔn lɛ́ jí. Nǔ Axɔ́súɖuto ɔ tɔn lɛ́ takúnmɛ wɛ nɔví lɛ́ ná nǔníná lɛ́ dó, énɛ́ wú ɔ, nǔníná yětɔn lɛ́ nyí acɛkpikpa ɔ tɔn ǎ. (Mat. 22:21) É ɖo mɔ̌ có, sísí e mǐ ɖó nú hwɛɖɔxɔsá ɖaxó ɔ é zɔ́n bɔ mǐ yi kplé ɔ domɛ.

Xɔ e mɛ è nɔ bló kplé ɖe ɖo hwɛɖɔxɔsá ɔ lɛ́ é ɖɛkpɛ ɖɛkpɛ ɖokpó mɛ wɛ mǐ jínjɔ́n ayǐ dó xó ɔ wú ɖe. Nǔ lɛ́ bɛ́ ganjí ǎ. Ée gǎn hwɛɖɔtɔ́ ɔ yí xó é ɔ, é dó zǒgbe jí ɖɔ émí ɖo nukún ɖó wɛ ɖɔ Kúnnuɖetɔ́ Jexóva tɔn e ɖo France lɛ́ é ná sú takwɛ́ e è kán nú yě é hǎbǔ. Gbigbɔ mímɛ́ Jexóva tɔn bló bɔ nǔkanbyɔ́ élɔ́ wá ayi mɛ nú mǐ ajijimɛ, bɔ mǐ kanbyɔ́ ɛ: “Mi ka tuun ɖɔ acɛkpikpa ɔ ko ɖ’alɔ akwɛ́ mǐtɔn 2951793000 FCFA jɛjí e ɖo akwɛ́sɛxwetɛn ɖo kɔ́ntu mǐtɔn mɛ é jí a?”

 É kpácá ɛ tawun, nukún tɔn mɛ xlɛ́ mɔ̌. Ée acɛkpikpa ɔ sín mɛ lɛ́ dó zǒgbe jí ɖɔ émí wa mɔ̌ é ɔ, linlin e é ɖó dó xó ɔ wú é húzú bǐ mlɛ́mlɛ́. É gbɛ́ nǔ nú yě, bo yá wǔ sú ta nú xó ɔ. Énɛ́ gúdo ɔ, un mɔ ɖɔ Jexóva d’afɔ xó ɔ mɛ, lěe mǐ ma sixú ɖó nukún tɔn gbɔn gbeɖé ǎ é, bo húzú nǔ lɛ́ bǐ bónú mǐ ná mɔ tɛn dó ɖu ɖo hwɛ ɔ jí. Kpó awǎjijɛ kpó wɛ mǐ sí te sín kplé ɔ domɛ, bɔ nǔ e jɛ é kpácá mǐ tawun.

Ðo 30 juin 2011 ɔ, mɛ e ɖo Hwɛɖɔxɔsá ɖaxó Elɔ́pu tɔn e nɔ jɛ hun dó acɛ gbɛtɔ́ lɛ́ tɔn jí lɛ́ é bǐ ɖó gbe kpɔ́ bo wá gbeta ɔ kɔn ɖɔ hwɛ kpa mǐ. Yě dɔn nǔ gbɔn takwɛ́ xó ɔ jí, bo byɔ́ acɛkpikpa ɔ ɖɔ é ní lɛ́ kɔ nú akwɛ́ mǐtɔn nú mǐ, bo sú akwɛ́ví gɔ́ ná! Gbeta manáwɔn énɛ́ ɖo xɛ nya ɖo mawusinsɛn mímɛ́ ɔ jí wɛ ɖo France, káká jɛ égbé. Nǔ kléwún énɛ́ e mǐ ma tlɛ sɔ́ nǔ tɔn ɖ’ayǐ cóbó kanbyɔ́ ǎ é cí awǐnnya e xo Goliyáti dó ta é ɖɔhun, bo húzú nǔ lɛ́ bǐ. Étɛ́wú mǐ ka ɖu ɖ’é jí? Ðó lěe Davídi ɖɔ nú Goliyáti gbɔn é ɔ, ‘Jexóva wɛ nɔ ná ɖuɖéjí mɛ.’—1 Sam. 17:45-47.

Azɔn nukɔntɔn ɔ nɛ́ mǐ ɖó ɖuɖéjí mɔ̌hun nɛ́ ǎ. Acɛkpikpa agbɔ̌nnɔ lɛ́ kpó sinsɛngbɛ́ta agbɔ̌nnɔ lɛ́ kpó klán gbe xá mǐ có, mǐ ko ɖu ɖo hwɛ 1225 jí ɖo hwɛɖɔxɔsá ɖaxó to 70 tɔn kpó hwɛɖɔxɔsá e nɔ gbo hwɛ gbɔn gbɛ ɔ bǐ mɛ lɛ́ é kpó nukɔn. Ðuɖéjí énɛ́ lɛ́ e mǐ ɖó é nɔ nya xɛ ɖo acɛ tawun tawun e mǐ ɖó lɛ́ é jí; ɖé lɛ́ wɛ nyí acɛ e mǐ ɖó bɔ è ná tuun sinsɛn mǐtɔn ɖo sɛ́n linu é, acɛ e mǐ ɖó bo ná nɔ ɖɔ mawuxó ɖo agbawungba é, acɛ e mǐ ɖó bo ná gbɛ́ ɖɔ mǐ kún ná ɖ’alɔ ɖo nǔwiwa to tɔn lɛ́ mɛ ó é kpó acɛ e mǐ ɖó bo ná gbɛ́ ɖɔ mǐ kún ná dó hun ó é kpó.

Nyi ɖíe ɖo sinsɛnzɔ́ wa wɛ ɖo Hɔ̌nkan gbɛ ɔ tɔn Kúnnuɖetɔ́ Jexóva tɔn lɛ́ tɔn ɖo New York, ɖo États-Unis è, bɔ nɛ̌ é ka nyí gbɔn bɔ un wá tɔ́n ɖo hwɛɖiɖɔxó ɖé mɛ ɖo Elɔ́pu lo?

MƐSƐ́DÓ KANÐÓDÓNǓWÚTƆ́ LƐ́ WƐ MƐJITƆ́ CE LƐ́ NYÍ

Mɛjitɔ́ ce lɛ́, yě wɛ nyí George kpó Lucille kpó yi klási 12​gɔ́ Galádi tɔn, bo ji mì ɖo 1956 hwenu e yě ɖo sinsɛnzɔ́ wa wɛ ɖo Etiopíi é. Yě sun nyǐ mì ɖɔ Filípu, wɛnɖagbejlátɔ́ xwe kanweko nukɔntɔn ɔ tɔn ɖɔhun. (Mɛ. 21:8) Ðo xwe e bɔ d’é wú é mɛ ɔ acɛkpikpa ɔ gbɛ́ azɔ̌ mǐtɔn. Vǔ tawun wɛ un tlɛ kpo ɖe có, un flín lěe xwédo mǐtɔn nɔ sɛn Mawu ɖo nǔglɔ́ gbɔn é ganjí. Ðó yɔkpɔ́vú wɛ nú mì wútu ɔ, un lin ɖɔ é nɔ sɔ́ akpakpa mɛ tawun! É blá wǔ ɖɔ gǎn lɛ́ nya mǐ sín to ɔ mɛ ɖo 1960.

 Hwenu e xwédo mǐtɔn yi jɛ Wichita, Kansas, ɖo États-Unis é ɔ, mɛjitɔ́ ce lɛ́ hɛn nǔ bǔnɔ ɖé dó yěɖée jí, énɛ́ wɛ nyí mɛsɛ́dó sín akpakpa e nɔ sɔ́ yě é. Yě nɔ zán gbɛ sɔgbe xá nǔgbó ɔ, bo kplɔ́n nǔ xɔ akwɛ́ gbigbɔ tɔn lɛ́ nyi kpó dadá ce Judy kpó, gɔ́ nú nɔví súnnu ce Leslie; Etiopíi wɛ è ji yě lɔmɔ̌ ɖe. Un bló batɛ́mu hwenu e un ɖó xwe 13 é. Xwe atɔn gúdo ɔ, xwédo mǐtɔn sɛ tɛn yi fí e hudó sukpɔ́ ɖe é ɖo Arequipa, ɖo Pérou.

Ðo 1974 hwenu e un ɖo xwe 18 kpowun ɖó wɛ é ɔ, alaxɔ Pérou tɔn sɔ́ nyi kpó nɔví súnnu ɛnɛ ɖěvo lɛ́ kpó gběxosín-alijítɔ́ titewungbe. Andes centrale sín sókan lɛ́ mɛ, fí e mɛɖé ma ko jlá wɛn ɔ ɖe kpɔ́n ǎ lɛ́ é wɛ mǐ ɖó ná jlá wɛn ɔ ɖe. Énɛ́ byɔ́ ɖɔ mǐ ná jlá wɛn ɔ ayǐ ɔ jí nu e nɔ dó Quechua kpó Aymara kpó lɛ́ é. Mǐ nɔ sɛ tɛn kpó mɔ̌to gaga e mɛ è nɔ dɔ́ é ɖé kpó, bɔ mǐ nɔ ylɔ́ ɖɔ Tɔjíhún ɖó lěe é cí é wútu. Ényí un flín lěe mǐ nɔ zán Biblu dó xlɛ́ ayǐ ɔ jí nu lɛ́ ɖɔ Jexóva ná ɖe ya, azɔn kpó kú kpó síin ɖo malínmálín mɛ gbɔn é ɔ, é nɔ su nukún ce mɛ. (Nǔɖe. 21:3, 4) Mɛ gěgé yí wɛn Axɔ́súɖuto ɔ tɔn.

SINSƐNZƆ́ WIWA ÐO HƆ̌NKAN GBƐ Ɔ TƆN MǏTƆN

Hwenu e Albert Schroeder e nɔ Hǎgbɛ́ alixlɛ́mɛtɔ́ Kúnnuɖetɔ́ Jexóva tɔn lɛ́ tɔn mɛ é wá ba Pérou kpɔ́n ɖo 1977 é ɔ, é dó wǔsyɛ́n lanmɛ nú mì ɖɔ nyi ní d’alɔ wěma mɛ bá wa sinsɛnzɔ́ ɖo Betɛ́li ɖo Hɔ̌nkan gbɛ ɔ tɔn mǐtɔn, bɔ un wa mɔ̌. Énɛ́ gúdo zaan ɖo 17 juin 1977 ɔ, un jɛ sinsɛnzɔ́ wa jí ɖo Betɛ́li Brooklyn tɔn. Ðo xwe ɛnɛ e bɔ d’é wú lɛ́ é mɛ ɔ, un w’azɔ̌ ɖo xɔ mɛ súnsún súnsún kpó nǔjláɖó kpó xɔsá.

Ðo juin 1978 ɔ, un xo go Elizabeth Avallone ɖo kpléɖókpɔ́ akɔjɔkplé ɖé jí ɖo Nouvelle-Orléans, ɖo Louisiane. Mɛjitɔ́ e nɔ zán gbɛ sɔgbe xá nǔgbó ɔ lɛ́ é wɛ kplɔ́n ɛ nyiɖɔhun. Gběxosín-alijítɔ́ hwebǐnu tɔn wɛ Elizabeth nyí sín xwe ɛnɛ ɖíe, bɔ sinsɛnzɔ́ hwebǐnu tɔn nɔ xɔ akwɛ́ n’i, bɔ é nɔ mɔ ɖɔ ali ɖagbe e nu è ná zán gbɛ ɖe é nɛ́. Mǐ nɔ gɔn mǐɖée lɛ́ kanbyɔ́ ǎ. É sɔ́ lín ǎ bɔ wǎn e mǐ yí nú mǐɖée é syɛ́n bǐ. Mǐ wlí alɔ ɖo 20 octobre 1979, bɔ mǐ mɛ we lɛ́ bǐ bɛ́ sinsɛnzɔ́ wiwa ɖo Betɛ́li.

Nɔví súnnu kpó nɔví nyɔ̌nu kpó e ɖo agun Brooklyn Spanish tɔn éé nyí agun nukɔntɔn e mɛ è sɛ́ mǐ dó é mɛ lɛ́ é hun xomɛ bo yí mǐ. Ðo xwe lɛ́ vlamɛ ɔ, agun atɔn ɖěvo lɛ́ dó doo nú mǐ, bo nɔ gǔdo nú mǐ ɖo sinsɛnzɔ́ e wa wɛ mǐ ɖe ɖo Betɛ́li é kɔn. Gǔdo mǐtɔn e yě nɔ é, kpó alɔ e xɔ́ntɔn lɛ́ kpó xwédo lɛ́ kpó dó mǐ bɔ mǐ kpé nukún dó mɛjitɔ́ mǐtɔn mɛxómɔ lɛ́ wú é su nukún mǐtɔn mɛ tawun.

 UN XO KPÓÐÓ NÚ AZƆ̌XƆSÁ E NƆ KPÉ NUKÚN DÓ HWƐÐIÐƆXÓ LƐ́ WÚ É

Ðo janvier 1982 ɔ, é kpácá mì tawun ɖɔ è sɛ́ mì dó Azɔ̌xɔsá e nɔ kpé nukún dó hwɛɖiɖɔxó lɛ́ wú ɖo Betɛ́li é. Xwe atɔn gúdo ɔ, è byɔ́ mì ɖɔ nyi ná yi kplɔ́n wěma ɖo kplɔ́nyijǐ-alavɔ ɖé, bá húzú mɛɖesínhwɛmɛtɔ́. É kpácá mì tawun, bo lɛ́ hwɛ́n tó ce ɖɔ hwenu e un ɖo wěma kplɔ́n wɛ é ɔ, un kplɔ́n ɖɔ mɛɖéesíjijɛ tají tají e mɛ gěgé nɔ ɖu vǐví tɔn ɖo États-Unis kpó gbɛ ɔ bǐ mɛ kpó é ɔ, ɖuɖéjí e Kúnnuɖetɔ́ Jexóva tɔn lɛ́ ɖó ɖo hwɛ nukɔn lɛ́ é wɛ nyí tɔn. È nɔ ɖɔ xó dó ɖuɖéjí tají énɛ́ lɛ́ jí tawun ɖo klási.

Ðo 1986 hwenu e un ɖo xwe 30 ɖó wɛ é ɔ, è sɔ́ mì bónú má húzú nukúnkpénǔwútɔ́ ɖo Azɔ̌xɔsá e nɔ kpé nukún dó hwɛɖiɖɔxó lɛ́ wú é. Ðó un kpo ɖo wǐnnyáwínnyá mɛ tawun, bo ma lɛ́ mɔ nǔ jɛ lěe azɔ̌ e ɖo nukɔn nú mì é ná vɛ́ wǔ sɔ é wú ǎ wútu ɔ, un mɔ ɖɔ wǔ wɛ è jɔ mì, có ado lɛ́ hu mì.

Un húzú mɛɖesínhwɛmɛtɔ́ ɖo 1988, amɔ̌, un ɖ’ayi lěe wěma kplɔ́nkplɔ́n énɛ́ wa nǔ dó wǔ ce sɔ ɖo gbigbɔ lixo é wú ǎ. Wěma kplɔ́nkplɔ́n ɖaxó ɖaxó lɛ́ sixú flɔ́ zo dó glɔ̌ nú mɛɖésúnɔ sísɔ́ su, bo sixú zɔ́n bɔ mɛ e kplɔ́n wěma ɖo ali bǔnɔ ɖé nu é ná lin ɖɔ émí hú gǎn mɛ ɖěvo e ma kplɔ́n wěma ɖo ali mɔ̌hun ɖé nu ǎ é. Elizabeth d’alɔ mì. É d’alɔ mì bɔ un lɛ́ jɛ nǔ gbigbɔ tɔn e un nɔ ko bló ɖ’ayǐ cóbó yi kplɔ́n wěma ɖo hwɛɖiɖɔ linu lɛ́ é wa jí. É ɖu hwenu, amɔ̌, kpɛɖé kpɛɖé ɔ, un lɛ́ wá mɔ nyiɖée mɛ ɖo gbigbɔ lixo. Un sixú dó zǒgbe jí ɖɔ é kún nyí wěma ɖaxó ɖaxó lɛ́ kplɔ́nkplɔ́n wɛ nyí nǔ e ɖo tají hú gǎn ɖo gbɛ mɛ é ó. Nǔ e nɔ zɔ́n bɔ gbɛzán mɛɖé tɔn nɔ ɖó nu é wɛ nyí xɔ́ntɔn vívɛ́ e mɛ ɔ zun xá Jexóva é kpó wǎn ɖaxó e é yí nú é kpó togun tɔn kpó é kpó.

HUN JIJƐ DÓ WƐN ÐAGBE Ɔ JÍ KPÓ WƐN ÐAGBE Ɔ ÐÍÐÓ AYǏ ÐO SƐ́N LINU KPÓ

Ée un fó wěma kplɔ́nkplɔ́n ɖo sɛ́n linu gúdo é ɔ, alɔ dídó bónú è ná ɖó nǔ e sín hudó è ɖó ɖo sɛ́n linu ɖo Betɛ́li lɛ́ é ayǐ kpó hun jijɛ dó nǔ Axɔ́súɖuto ɔ tɔn lɛ́ jí ɖo hwɛ nukɔn kpó jí wɛ un sɔ́ ayi ɖó. Azɔ̌ ce nɔ sɔ́ akpakpa mì tawun, amɔ̌, é lɛ́ nyí jɛ bónú è kán ɖu ǎ, ɖó nǔ lɛ́ nɔ yá wǔ húzú tawun ɖo tutoblónúnǔ mǐtɔn mɛ. Ði kpɔ́ndéwú ɔ, wěma mǐtɔn lɛ́ nyí vɔ̌nu ɖ’ayǐ ǎ, amɔ̌, bɛ́sín 1990 ɔ, è byɔ́ Azɔ̌xɔsá e nɔ kpé nukún dó hwɛɖiɖɔxó lɛ́ wú é ɖɔ é ní d’alɔ bónú è ná ɖó nǔ wlɛnwín énɛ́ nu. Bɛ́sín hwenɛ́nu ɔ, è nɔ yí wěma Kúnnuɖetɔ́ Jexóva tɔn lɛ́ tɔn ma sú ɖɔ̌la. Énɛ́ zɔ́n bɔ azɔ̌ ɔ bɔ wǔ ɖo Betɛ́li kpó gle ɔ mɛ kpó, bɔ káká jɛ din ɔ, é nɔ d’alɔ bɔ è nɔ ny’alɔ nú takwɛ́ súsú sín tagba lɛ́. Mɛɖé lɛ́ lin ɖɔ hǔzúhúzú énɛ́ ná vɔ nǔɖókan mǐtɔn lɛ́, bo ná lɛ́ dɔn sinsɛnzɔ́ e mǐ nɔ wa ɖo agbawungba é dó gǔdo. Flíjɛ tɔn wɛ ka jɛ. Kɛ́n mɛ e ɖo Jexóva sɛn wɛ sín 1990 lɛ́ é tɔn ko jɛjí donu we jɛjí, bɔ ɖo égbé ɔ, mɛ lɛ́ sixú mɔ nǔɖuɖu gbigbɔ tɔn e nɔ hwlɛ́n gbɛ gán é vɔ̌nu. Nyɛɖésúnɔ mɛtún ɔ mɔ ɖɔ hlɔ̌nhlɔ́n e Jexóva nɔ ná mɛ é kpó ali e é nɔ xlɛ́ mɛ gbɔn mɛsɛntɔ́ gbejínɔtɔ́ ɔ jí é kpó kɛ́ɖɛ́ wɛ nyí tɔn bɔ  hǔzúhúzú énɛ́ kpó hǔzúhúzú gěgé ɖěvo e tutoblónúnǔ ɔ bló lɛ́ é kpó sixú yi ta.—Tín. 15:2; Mat. 24:45.

Ényí mɛɖesínhwɛmɛtɔ́ ɖagbe lɛ́ ɖíɖó kɛ́ɖɛ́ wɛ nɔ zɔ́n bɔ mǐ nɔ ɖó ɖuɖéjí lɛ́ ɖo hwɛ nukɔn ǎ. Ðo ninɔmɛ gěgé mɛ ɔ, nǔ e nɔ sísɛ́ gǎn hwɛɖɔtɔ́ lɛ́ é wɛ nyí zǐnzán ɖagbe togun Jexóva tɔn tɔn. Un mɔ kpɔ́ndéwú énɛ́ tɔn ɖokpó ɖo 1998 hwenu e mɛ e ɖo Hǎgbɛ́ alixlɛ́mɛtɔ́ ɔ mɛ lɛ́ é atɔn kpó asi yětɔn lɛ́ kpó wá kpléɖókpɔ́ bǔnɔ lɛ́ ɖo Cuba é. Xomɛnyínyɔ́ yětɔn, kpó sísí yětɔn kpó nyí kúnnuɖenú agbɔ̌nnɔ ɖé nú gǎn lɛ́ ɖɔ mǐ kún nɔ ɖ’alɔ ɖo toxóɖiɖɔ mɛ ó hú nǔ ɖěbǔ e mǐ ko nɔ ɖɔ nú yě ɖo kplé e mǐ nɔ bló xá yě lɛ́ é domɛ é.

É ɖo mɔ̌ có, ényí mǐ ma sixú kpé wú bo ɖe ɖɛ hwɛɖiɖɔxó lɛ́ ɖo nyanɛ́nyanɛ́ mɛ ǎ ɔ, mǐ nɔ ‘jɛ hun dó wɛn ɖagbe ɔ jí, lobo nɔ ɖó ayǐ ɖo sɛ́n linu’ ɖo hwɛ nukɔn. (Filí. 1:7) Ði kpɔ́ndéwú ɔ, nú xwe mɔ̌kpán ɔ, gǎn e ɖo Elɔ́pu lɛ́ é kpó éé ɖo Corée du Sud lɛ́ é kpó yí gbe nú acɛ e mǐ ɖó bo ná gbɛ́ ahwanzɔ́ wiwa é ǎ. Wǎgbɔ tɔn ɔ, nɔví e ɖo Elɔ́pu lɛ́ é 18000 mɔ̌ kpó nɔví e ɖo Corée du Sud lɛ́ é 19000 jɛjí kpó sɛn gan, ɖó ayixa yětɔn gbɛ́ ɖɔ yě kún ná wa ahwanzɔ́ ó wútu.

Wǎgbɔ tɔn ɔ, ɖo 7 juillet 2011 ɔ, Hwɛɖɔxɔsá ɖaxó Elɔ́pu tɔn e nɔ jɛ hun dó acɛ gbɛtɔ́ lɛ́ tɔn jí é wá gbeta manáwɔn Bayatyan v. Arménie kɔn; gbeta énɛ́ byɔ́ ɖɔ to Elɔ́pu tɔn lɛ́ bǐ ní yí gbe nú azɔ̌ e è ná wa ɖó ahwanzɔ́ domɛ é. Sɛ́n dodó gbasá Corée du Sud tɔn wá gbeta mɔ̌hun ɖé kɔn ɖo 28 juin 2018. Ényí nɔví súnnu wínnyáwínnyá mǐtɔn lɛ́ kwínwe ɖé tlɛ ko sa nǔɖiɖi yětɔn wɛ ɔ, mǐ ná ɖó ɖuɖéjí énɛ́ lɛ́ kwín ɖokpó ǎ.

Azɔ̌xɔsá e nɔ kpé nukún dó hwɛɖiɖɔxó lɛ́ wú ɖo hɔ̌nkan gbɛ ɔ tɔn mǐtɔn é kpó azɔ̌xɔsá e nɔ kpé nukún dó hwɛɖiɖɔxó lɛ́ wú gbɔn alaxɔ e gbɔn gbɛ ɔ bǐ mɛ lɛ́ é kpó ɖo azɔ̌ wa wɛ syɛ́nsyɛ́n bá jɛ hun dó nǔ Axɔ́súɖuto ɔ tɔn lɛ́ jí. Wǔ wɛ è jɔ mǐ bɔ mǐ nɔ sɔ́ nɔví súnnu kpó nɔví nyɔ̌nu kpó mǐtɔn ɖěɖěe acɛkpikpa lɛ́ ɖo gbe klán xá wɛ lɛ́ é sín afɔ ɖó te. Ényí mǐ ná bo ma tlɛ ɖó ɖuɖéjí ɖo xó e dɔn mǐ yi hwɛ nukɔn é ɖé kɔn ǎ ɔ, kúnnuɖiɖe ɖé wɛ é nɔ nyí nú tokpɔngán lɛ́, axɔ́sú lɛ́ kpó akɔta lɛ́ kpó. (Mat. 10:18) Hwɛɖɔtɔ́ lɛ́, afɔsɔ́ɖótetɔ́ acɛkpikpa ɔ tɔn lɛ́, xójlázɔ́watɔ́ lɛ́ kpó mɛ kpaa e wá lɛ́ é kpó sixú lin tamɛ dó wěmafɔ ɖěɖěe mǐ zán dó jɛ hun dó mǐɖée jí lɛ́ é jí. Ayijlɔ́jlɔ́nɔ lɛ́ nɔ kplɔ́n nǔ dó mɛ alɔkpa e Kúnnuɖetɔ́ Jexóva tɔn lɛ́ nyí é kpó nǔ e jí nǔ e yě ɖi nǔ ná lɛ́ é jínjɔ́n é kpó wú. Mɛ énɛ́ lɛ́ ɖé lɛ́ ko húzú nǔɖitɔ́ hǎtɔ́ mǐtɔn lɛ́.

É NÁ CƐ NÚ WE JEXÓVA!

Xwe 40 jɛjí ɖíe wɛ è ko jɔ wǔ mì bɔ un ɖo azɔ̌ wa ɖó kpɔ́ xá alaxɔ e gbɔn gbɛ ɔ bǐ mɛ lɛ́ é wɛ dó sɛ́nxó lɛ́ jí, yi hwɛɖɔxɔsá nukúnɖéjí maxamaxa, bo lɛ́ yi gǎn nukúnɖéjí gěgé nukɔn. Un yí wǎn nú azɔ̌gbɛ́ ce e ɖo Azɔ̌xɔsá e nɔ kpé nukún dó hwɛɖiɖɔxó lɛ́ wú ɖo hɔ̌nkan gbɛ ɔ tɔn mǐtɔn é kpó éé nɔ w’azɔ̌ ɖo azɔ̌xɔsá e nɔ kpé nukún dó hwɛɖiɖɔxó lɛ́ wú gbɔn gbɛ ɔ bǐ mɛ lɛ́ é kpó, bɔ yě lɛ́ xɔ akwɛ́ nú mì tawun. Jexóva kɔn nyɔ̌ná dó jǐ ce tawun, bo bló bɔ gbɛzán ce ɖó nu.

Elizabeth nɔ gǔdo nú mì kpó gbejíninɔ kpó bo lɛ́ wa mɔ̌ kpó wǎnyíyí kpó ɖo xwe 45 e wá yi lɛ́ é mɛ, hwenu lɛ́ nyɔ́ kpó yě gbɔ kpó ɔ nɛ́. Un yí wǎn n’i tawun ɖó azɔn syɛ́nsyɛ́n ɖí xwi xá wɛ é ɖe b’ɛ zɔ́n bɔ gǎn káká ɖé sɔ́ ɖo wǔ tɔn ǎ có, é ka wa mɔ̌.

Mǐɖésúnɔ mɛtún ɔ mɔ ɖɔ hlɔ̌nhlɔ́n énɛ́ kpó ɖuɖéjí énɛ́ kpó kún sín nǔwúkpíkpé mǐɖésúnɔ tɔn lɛ́ wú ó. Lěe Davídi ɖɔ gbɔn é ɔ, ‘Jexóva wɛ nyí hlɔ̌nhlɔ́n nú togun tɔn.’ (Ðɛh. 28:8) Nǔgbó ɔ, ‘Jexóva wɛ nɔ ná ɖuɖéjí mɛ.’