XÓTA NǓKPLƆ́NKPLƆ́N TƆN 30
HAN 97 Xó Mawu tɔn wɛ nyí tɔn bɔ è ná nɔ gbɛ
A ka sixú kpo ɖo nǔkplɔ́nmɛ bǐbɛ́mɛ tɔn Biblu tɔn lɛ́ sín le ɖu wɛ a?
“Mi ko tuun nǔ énɛ́ lɛ́ bo lí dǒ ganjí ɖo nǔgbó . . . mɛ có, un ɖo gbesisɔmɛ hwebǐnu bo ná nɔ lɛ́ flín nǔ énɛ́ lɛ́ mi.”—2 PI. 1:12.
XÓNUSƆ́ÐÓTE
Lěe nǔ ɖěɖěe a kplɔ́n hwenu e a jɛ Biblu kplɔ́n jí tlóló lɛ́ é sixú kpo ɖo alɔ dó we wɛ ɖo égbé gbɔn é.
1. Ðagbe tɛ́ lɛ́ nǔkplɔ́nmɛ Biblu tɔn lɛ́ ka wa nú we hwenu e a kplɔ́n nǔgbó ɔ azɔn nukɔntɔn ɔ é?
NǓKPLƆ́NMƐ bǐbɛ́mɛ tɔn Biblu tɔn lɛ́ húzú gbɛzán mǐtɔn. Ði kpɔ́ndéwú ɔ, hwenu e mǐ kplɔ́n ɖɔ Mawu sín nyǐkɔ nɔ nyí Jexóva é ɔ, mǐ ɖe afɔ nukɔntɔn ɔ bá húzú xɔ́ntɔn tɔn. (Eza. 42:8) Ée mǐ kplɔ́n nǔ dó ninɔmɛ e mɛ mɛkúkú lɛ́ ɖe nǔgbó nǔgbó é wú é ɔ, mǐ sɔ́ nɔ kanbyɔ́ mǐɖée ɖɔ mɛvívɛ́ mǐtɔn e ko kú lɛ́ é ka ɖo wǔvɛ́ se wɛ wɛ a jí ǎ. (Nǔt. 9:10) Bɔ ée mǐ kplɔ́n nǔ dó palaɖísi ayǐkúngban jí tɔn e sín akpá Mawu dó é wú é ɔ, ado sɔ́ nɔ hu mǐ dó sɔgúdo wú ǎ. Mǐ kú d’é jí ɖɔ mǐ hɛn ɔ mǐ ná nɔ gbɛ b’ɛ kún ná nyí nú hwenu kléwún ɖé kpowun, énɛ́ wɛ nyí xwe 70 alǒ xwe 80 ó, loɔ, káká sɔ́yi.—Ðɛh. 37:29; 90:10.
2. Nɛ̌ 2 Piyɛ́ɛ 1:12, 13 ka xlɛ́ ɖɔ klisánwun e tlɛ ko zin lɛ́ é lɔ nɔ ɖu nǔkplɔ́nmɛ bǐbɛ́mɛ tɔn Biblu tɔn lɛ́ sín le gbɔn?
2 Mǐ ɖó ná wɔn lě do nǔkplɔ́nmɛ bǐbɛ́mɛ tɔn Biblu tɔn lɛ́ ɖo tají sɔ é ǎ. Ðo wěmasɛ́dómɛ wegɔ́ mɛsɛ́dó Piyɛ́ɛ tɔn mɛ ɔ, klisánwun e ko “lí dǒ ganjí ɖo nǔgbó” ɔ mɛ lɛ́ é wɛ é ɖɔ xó sɛ́dó. (Xa 2 Piyɛ́ɛ 1:12, 13.) Amɔ̌, hwe ɔ nu ɔ, mɛ nyanya lɛ́ ɖo agun ɔ mɛ bo ba ná lɛ́ jɔ nú nɔví lɛ́ sín nǔgbó ɔ mɛ. (2 Pi. 2:1-3) Piyɛ́ɛ ba ná dó wǔsyɛ́n lanmɛ nú nɔví súnnu kpó nɔví nyɔ̌nu kpó tɔn lɛ́, bɔ mɔ̌ mɛ ɔ, é ná d’alɔ yě bɔ yě ná gbí dɔn ɖo nǔ énɛ́ lɛ́ nukɔn. Bo ná dó kpé énɛ́ wú ɔ, é flín yě nǔ ɖěɖěe yě ko kplɔ́n wá yi é ɖé lɛ́. Nǔkplɔ́nmɛ énɛ́ lɛ́ ná d’alɔ yě bɔ yě ná nɔ gbejí káká jɛ vivɔnu.
3. Tínmɛ nǔ e wú klisánwun lɛ́ bǐ ɖó ná kpo ɖo tamɛ lin dó nǔkplɔ́nmɛ bǐbɛ́mɛ tɔn Biblu tɔn lɛ́ jí wɛ é.
3 Ée mǐ ná ɖo klisánwun e zin lɛ́ é húzú wɛ é ɔ, mǐ sixú mɔ nǔkplɔ́nmɛ yɔ̌yɔ́ lɛ́ ɖo nǔkplɔ́nmɛ bǐbɛ́mɛ tɔn Biblu tɔn lɛ́ mɛ. Kpɔ́ndéwú ɖé ɖíe: Nǔɖatɔ́gán e alɔ se kpɛ́n ná é ɖé kpó nǔɖatɔ́ yɔ̌yɔ́ ɖé kpó sixú zán ɖadónú ɖokpó ɔ lɛ́ dó ɖa nǔɖuɖu ɖé. Amɔ̌, nǔɖatɔ́gán e ko mɔ nǔ gěgé kpɔ́n ɖo xwe lɛ́ vlamɛ é ko kplɔ́n lěe é ná zán ɖadónú vovo énɛ́ lɛ́ ɖo ali vovo nu dó ɖa nǔɖuɖu ɖěvo e víví ganjí é gbɔn é. Mɔ̌ ɖokpó ɔ, mɛ e ko ɖo Jexóva sɛn wɛ sín hwenu línlín ɖíe lɛ́ é kpó Biblu kplɔ́ntɔ́ yɔ̌yɔ́ lɛ́ kpó sixú kpɔ́n nǔkplɔ́nmɛ bǐbɛ́mɛ tɔn Biblu tɔn lɛ́ ɖo ali vovo nu. Ninɔmɛ mǐtɔn lɛ́, alǒ wǔjɔmɛzɔ́ sinsɛnzɔ́ tɔn mǐtɔn lɛ́ sixú ko húzú sín hwenu e mǐ bló batɛ́mu é. Ényí mǐ lin tamɛ dó nǔkplɔ́nmɛ Biblu tɔn e mǐ ko kplɔ́n sín hwenu línlín ɖíe lɛ́ é jí ɔ, mǐ sixú mɔ ali ɖěvo e nu mǐ sixú zán yě ɖo ninɔmɛ mǐtɔn din tɔn ɔ mɛ ɖe lɛ́ é. Mi nú mǐ ní kpɔ́n nǔ e nǔkplɔ́nmɛ bǐbɛ́mɛ tɔn Biblu tɔn atɔn sixú kplɔ́n klisánwun e ko zin lɛ́ é é.
JEXÓVA WƐ NYÍ GBƐÐÓTƆ́ Ɔ
4. Ðagbe tɛ́ kplɔ́nkplɔ́n ɖɔ Jexóva wɛ nyí Gbɛɖótɔ́ ɔ ka nɔ wa nú mǐ?
4 “Mawu wɛ . . . nyí mɛ e bló nǔ lɛ́ bǐ é.” (Ebl. 3:4) Mǐ tuun ɖɔ Gbɛɖótɔ́ e ɖó nǔnywɛ́ flaflá tɔn bo lɛ́ ɖó agbɔ̌n bɔ fínɛ́ jɛ́n ɖó é ɖé wɛ bló planɛ́ti mǐtɔn kpó nǔɖogbɛ e ɖ’é jí lɛ́ é bǐ kpó. É wɛ bló mǐ, énɛ́ wú ɔ, é tuun mǐ dǒyidǒslɔ́ tɔn. Hú gǎn mɔ̌ ɔ, é nɔ lɛ́ kpé nukún dó mǐ wú. É tuun nǔ e nyɔ́ nú mǐ hú gǎn é. Nǔgbó élɔ́ e bɔkun é tuuntuun, énɛ́ wɛ nyí ɖɔ Jexóva wɛ nyí Gbɛɖótɔ́ ɔ, wa ɖagbe nú mǐ tawun; é zɔ́n bɔ gbɛ mǐtɔn ɖó nu nǔgbó nǔgbó.
5. Nǔgbó tɛ́ ka sixú d’alɔ mǐ bɔ mǐ ná tɛ́n kpɔ́n bo ná nɔ sɔ́ mǐɖée hwe? (Ezayíi 45:9-12)
5 Nǔgbó e ɖɔ ɖɔ Jexóva wɛ nyí Gbɛɖótɔ́ ɔ é sixú kplɔ́n nǔɖé mǐ dó mɛɖéesɔ́hwe wú. Ée Jɔbu sɔ́ ayi ɖó éɖésúnɔ kpó gbɛtɔ́ ɖěvo lɛ́ kpó jí zɛ xwé wú gúdo é ɔ, Jexóva flín i ɖɔ émí wɛ nyí Gbɛɖótɔ́ Ajalɔ̌nlɔn ɔ. (Jɔb. 38:1-4) Nǔflínmɛ énɛ́ d’alɔ Jɔbu bɔ é mɔ ɖɔ ali Mawu tɔn lɛ́ yi aga hú gbɛtɔ́ lɛ́ tɔn flaflá tɔn. Gbeyíɖɔ Ezayíi wá wlán nǔ élɔ́ ɖo nukɔnmɛ dó daxwi énɛ́ mɛ: “Ko nɔ kanbyɔ́ mɛ e ɖo nyinya ɛ wɛ é ɖɔ: ‘Ani wa wɛ a ka ɖe ɖo fínɛ́ nɛ́’ a jí a?”—Xa Ezayíi 45:9- 12.
6. Hwetɛ́nu é ka ɖo tají ɖɔ mǐ ní lin tamɛ dó lěe Gbɛɖótɔ́ mǐtɔn nyɔ́nǔi bo lɛ́ ɖó agbɔ̌n sɔ é jí? (Kpɔ́n ɖiɖe lɛ́ lɔmɔ̌.)
6 Ényí nǔ e mɔ kpɔ́n wɛ klisánwun ɖé ɖe é ɖo jijɛjí wɛ ɔ, é sixú jɛ jiɖe ɖó dó linlin éɖésúnɔ tɔn lɛ́ wú jí zɛ xwé wú, bo sɔ́ ná nɔ ba wěɖexámɛ ɖo Jexóva gɔ́n alǒ ɖo Xó tɔn mɛ ǎ. (Jɔb. 37:23, 24) Amɔ̌, ényí mɛɖé nɔ lin tamɛ dó nǔnywɛ́ kpó hlɔ̌nhlɔ́n kpó ma ɖó dogbó Gbɛɖótɔ́ tɔn tɔn jí dó nǔjɔnǔ mɛ ɔ ka lo? (Eza. 40:22; 55:8, 9) Nǔgbó tají énɛ́ ná d’alɔ ɛ b’ɛ ná kpo ɖo éɖée zé hwe wɛ, bo ná nɔ ɖó linlin e ɖo jlɛ̌ jí é dó éɖée wú.
Étɛ́ ka sixú d’alɔ mǐ bɔ mǐ ná kpo ɖo linlin e ɖo jlɛ̌ jí é ɖó dó mǐɖée wú wɛ? (Kpɔ́n akpáxwé 6)
7. Étɛ́ Rahela ka wa bá dó yí gbe nú hǔzúhúzú ɖé?
7 Rahela e nɔ nɔ Slovénie é mɔ ɖɔ tamɛ linlin dó Gbɛɖótɔ́ émítɔn jí d’alɔ émí bɔ émí yí gbe nú hǔzúhúzú e è bló ɖo tutoblónúnǔ ɔ mɛ é ɖé. É yí gbe ɖɔ: “Hweɖélɛ́nu ɔ, é nɔ bɔ wú nú mì nú má yí gbe nú gbeta e kɔn mɛ e ɖo nukɔn nú nǔ lɛ́ é wá lɛ́ é ǎ. Ði kpɔ́ndéwú ɔ, un tlɛ ko kpɔ́n Hǎgbɛ́ alixlɛ́mɛtɔ́ ɔ sín gbeɖíɖó 8gɔ́ 2023 tɔn có, azɔn nukɔntɔn e un mɔ bɔ nɔví súnnu ɖé jó atán tɔn dó bo ɖo xóɖiɖɔ ɖé xwlé mɛ wɛ é ɔ, é cí kliwun nú mì. Énɛ́ wú ɔ, un xo ɖɛ sɛ́dó Jexóva ɖɔ é ní d’alɔ mì nú má yí gbe nú hǔzúhúzú énɛ́.” Rahela yí gbe ɖɔ ɖó Jexóva wɛ nyí jǐnukúnsin kpó ayǐkúngban kpó dátɔ́ wútu ɔ, é kpé wú bo ná xlɛ́ ali tutoblónúnǔ tɔn bɔ nǔ bǐ ná vɔ ɖ’é wú. Ényí é vɛ́ wǔ nú we bónú a ná húzú sɔgbe xá nukúnnúmɔjɛnǔmɛ yɔ̌yɔ́ ɖé alǒ yí gbe nú ali yɔ̌yɔ́ e è xlɛ́ mɛ é ɖé ɔ, aniwú a ma ka ná sɔ́ hwiɖée hwe bo lin tamɛ dó nǔnywɛ́ kpó hlɔ̌nhlɔ́n kpó ma ɖó dogbó Gbɛɖótɔ́ mǐtɔn tɔn jí a?—Hlɔ̌. 11:33-36.
NǓ E WÚ MAWU TIN BƆ WǓVƐ́ MIMƆ TÍIN É
8. Nɛ̌ nǔ e wú Mawu tin bɔ mǐ nɔ mɔ wǔvɛ́ é kplɔ́nkplɔ́n ka nɔ hɛn le wá nú mǐ gbɔn?
8 Étɛ́wú Mawu ka tin bɔ wǔvɛ́ mimɔ tíin? Mɛ ɖěɖěe ma kpé wú bo mɔ xósin nǔkanbyɔ́ énɛ́ tɔn ǎ é ɖé lɛ́ sin xomɛ dó Mawu, alǒ wá gbeta ɔ kɔn ɖɔ é kún tíin kpálíkpálí ó! (Nǔx. 19:3) Amɔ̌, hwɛ kplɔ́n ɖɔ hwɛhuhugú e mǐ ɖu é wɛ nɔ zɔ́n bɔ mǐ nɔ se wǔvɛ́, é kún nyí Jexóva wɛ ó. A lɛ́ kplɔ́n ɖɔ suúlu e Jexóva ɖó dó gbɛtɔ́ lɛ́ wú é zɔ́n bɔ gbɛtɔ́ lǐvi mɔ̌kpán ko kplɔ́n bo tuun i, bo lɛ́ mɔ lěe é ná ɖó nǔ wǔvɛ́ mimɔ nu káká sɔ́yi gbɔn é. (2 Pi. 3:9, 15) Nǔgbó énɛ́ lɛ́ vɔ́ jiɖe ná we bo lɛ́ zɔ́n bɔ a lɛ́ sɛkpɔ́ ɛ d’é jí.
9. Ninɔmɛ tɛ́ lɛ́ mɛ mǐ ka sixú flín nǔ ɖěɖěe wú Jexóva tin bɔ mǐ nɔ se wǔvɛ́ lɛ́ é ɖe?
9 Mǐ mɔ nukúnnú jɛ mɛ ɖɔ mǐ ɖó ná ɖó suúlu ée mǐ ɖo te kpɔ́n Jexóva bónú é ná ɖó nǔ wǔvɛ́ mimɔ nu é. É ɖo mɔ̌ có, ényí mǐ alǒ mɛ e mǐ yí wǎn ná lɛ́ é ɖo xɔxɔ aluwɛ, nǔagɔwaxámɛ alǒ kú tɔn se wɛ ɔ, mǐ sixú kanbyɔ́ mǐɖée ɖɔ aniwú Jexóva ma ka yá wǔ wa nǔɖé ǎ é jí. (Xab. 1:2, 3) Ðo ninɔmɛ mɔ̌hun lɛ́ mɛ ɔ, nǔnywɛ́nú wɛ é ná nyí ɖɔ mǐ ní lin tamɛ dó hwɛjijɔ ɖěɖěe wú Jexóva tin bɔ nǔjlɔ́jlɔ́watɔ́ lɛ́ nɔ se wǔvɛ́ lɛ́ é jí. a (Ðɛh. 34:20) Mǐ sixú lɛ́ lin tamɛ dó linlin e é ɖó bo ná ɖó nǔ wǔvɛ́ mimɔ nu káká sɔ́yi é jí.
10. Nɛ̌ Anne ka ɖí xwi xá nɔ tɔn sín kú gbɔn?
10 Nǔgbó e kunkplá wǔvɛ́ mimɔ é sixú d’alɔ mǐ bɔ mǐ ná dɛ. Anne e nɔ nɔ tɔtɛ́ntinto Mayotte tɔn mɛ ɖo Océan Indien é ɖɔ: “Xwe ɖé lɛ́ ɖíe e nɔ ce kú é ɔ, é vɛ́ nú mì tawun. É ɖo mɔ̌ có, un nɔ flín nyiɖée hwɛhwɛ ɖɔ é kún nyí Jexóva wɛ zɔ́n wǔvɛ́ mimɔ ó. Akpakpa ɖo sísɔ́ ɛ wɛ nú é ná ɖó nǔ wǔvɛ́ mimɔ alɔkpa lɛ́ bǐ nu, bo lɛ́ fɔ́n mɛvívɛ́ mǐtɔn lɛ́ sín kú. Tamɛ linlin dó nǔgbó énɛ́ lɛ́ jí nɔ ná mì fífá ayi mɛ tɔn, lěe un ma ɖó nukún tɔn gbɔn ǎ é hwɛhwɛ.”
11. Nɛ̌ hwɛjijɔ ɖěɖěe wú Jexóva tin bɔ mǐ nɔ se wǔvɛ́ lɛ́ é tuuntuun ka nɔ d’alɔ mǐ bɔ mǐ nɔ kpo ɖo wɛn ɔ jlá wɛ gbɔn?
11 Nǔgbó ɔ tuuntuun dó nǔ e wú Mawu tin bɔ mǐ nɔ se wǔvɛ́ é wú sixú sísɛ́ mǐ bɔ mǐ ná kpo ɖo wɛn ɔ jlá wɛ. Ée Piyɛ́ɛ tínmɛ ɖɔ suúlu Jexóva tɔn nɔ xɔ gbɛ nú mɛ ɖěɖěe hwɛ yětɔn lɛ́ vɛ́ ná é gúdo é ɔ, é wlán ɖɔ: “Mi lin tamɛ dó mɛ alɔkpa e mi ɖó ná nyí é wú. Mi ɖó ná ɖó walɔ mímɛ́, bo ná nɔ wa gbejí nɔ nú Mawu sín nǔ lɛ́.” (2 Pi. 3:11) “Gbejí nɔ nú Mawu sín nǔ” énɛ́ lɛ́ ɖokpó wɛ nyí wɛnjíjlázɔ́ mǐtɔn. Tɔ́ mǐtɔn ɖɔhun ɔ, mǐ yí wǎn nú mɛ lɛ́. Mǐ ba ɖɔ yě ní nɔ gbɛ yɔ̌yɔ́ Mawu tɔn e mɛ nǔjlɔ́jlɔ́wiwa ná tíin ɖe é mɛ. Jexóva ɖó suúlu bo ɖo ali hun nú mɛ e ɖo xá towe mɛ lɛ́ é wɛ bónú yě ná sɛn ɛ. Wǔjɔmɛ ɖé wɛ é nyí ɖɔ a nyí azɔ̌watɔ́gbɛ́ Mawu tɔn bo ná d’alɔ mɛ gěgé lěe a kpé wú gbɔn é bónú yě ná kplɔ́n nǔ dó wǔ tɔn cóbónú vivɔnu ɔ ná wá!—1 Kɔ. 3:9.
“AZǍN GǓDO GÚDO TƆN LƐ́” MƐ NƆ GBƐ ÐE WƐ MǏ ÐE
12. Nɛ̌ kplɔ́nkplɔ́n ɖɔ “azǎn gǔdo gúdo” tɔn lɛ́ mɛ nɔ gbɛ ɖe wɛ mǐ ɖe ka nɔ hɛn le wá nú mǐ gbɔn?
12 Biblu tínmɛ lěe gbɛtɔ́ lɛ́ ná nɔ wa nǔ gbɔn ɖo “azǎn gǔdo gúdo tɔn lɛ́” mɛ é ganjí. (2 Tim. 3:1-5) Ényí mǐ nyi nukún kpɔ́n nǔ e ɖo jijɛ lɛ́ lɛ̌ dó mǐ wɛ lɛ́ é kpowun ɔ, mǐ nɔ mɔ lěe nǔɖɔɖayǐ énɛ́ ɖo jijɛnu wɛ gbɔn é. Ényí mǐ mɔ lěe nǔwalɔ gbɛtɔ́ lɛ́ tɔn ɖo nylǎnylá d’é jí wɛ gbɔn é ɔ, mǐ nɔ kú d’é jí hú gǎn ɖɔ è sixú gán jɛ Xó Mawu tɔn wú.—2 Tim. 3:13-15.
13. Sɔgbe xá nǔjlɛ́dónǔwú Jezu tɔn e ɖo Luki 12:15-21 mɛ é ɔ, étɛ́ lɛ́ mǐ ka sixú kanbyɔ́ mǐɖée?
13 Tuuntuun ɖɔ mǐ ɖo gbɛ nɔ wɛ ɖo azǎn gǔdo gúdo tɔn lɛ́ mɛ nɔ lɛ́ d’alɔ mǐ bɔ mǐ nɔ sɔ́ ayi ɖó nǔ e ɖo tají nǔgbó nǔgbó é jí. Mǐ sixú kplɔ́n nǔ e wú é ɖo tají ɖɔ è ní wa mɔ̌ é ɖo nǔjlɛ́dónǔwú Jezu tɔn e ɖo Luki 12:15-21 mɛ é mɛ. (Xa.) Étɛ́wú è ka ylɔ́ nya dɔkunnɔ ɔ ɖɔ “xlonɔ”? É nyí dɔkun e nya ɔ jɛ é wú wɛ ǎ, loɔ, nǔ e ɖo tají n’i lɛ́ é wɛ ma sɔgbe ǎ. É xo “dɔkun kplé nú éɖée, bo . . . ka nyí dɔkunnɔ ɖo Mawu nukúnmɛ ǎ.” Étɛ́ ka zɔ́n bɔ xó ɔ myá nukún sɔmɔ̌? Mawu ɖɔ nú nya ɔ ɖɔ: “Zǎn élɔ́ mɛ ɔ, è ɖo gbɛ towe byɔ́ we wɛ.” Égbé ɔ, ée vivɔnu gbɛ élɔ́ tɔn ɖo sisɛkpɔ́ wɛ é ɔ, mǐ sixú kanbyɔ́ mǐɖée ɖɔ: ‘Nǔ e gbé nya wɛ un ɖe lɛ́ é ka nɔ xlɛ́ ɖɔ un ɖo hwenu ce zán wɛ kpó nǔnywɛ́ kpó a? Étɛ́ lɛ́ un ka nɔ d’alɔ vǐ ce lɛ́ nú yě ná nya gbě yětɔn? Nǔ nukɔntɔn e wú un nɔ zán hwenu ce, hlɔ̌nhlɔ́n ce kpó nǔɖókan ce lɛ́ kpó é wɛ nyí ɖɔ un ná kplé dɔkun nú nyiɖée a alǒ kplé dɔkun ɖó jǐxwé?’
14. Lěe nǔ e jɛ dó Miki jí é xlɛ́ gbɔn é ɔ, étɛ́wú é ka nyí nǔnywɛ́nú ɖɔ mǐ ní lin tamɛ dó kúnnuɖenú Biblu tɔn e xlɛ́ ɖɔ mǐ ɖo gbɛ nɔ wɛ ɖo azǎn gǔdo gúdo tɔn lɛ́ mɛ lɛ́ é jí?
14 Ényí mǐ lin tamɛ dó kúnnuɖenú e xlɛ́ ɖɔ mǐ ɖo gbɛ nɔ wɛ ɖo azǎn gǔdo gúdo tɔn lɛ́ mɛ lɛ́ é jí ɔ, énɛ́ sixú húzú linlin e mǐ nɔ ɖó dó gbɛ wú é bǐ mlɛ́mlɛ́. Lěe nǔ nyí gbɔn nú nɔví nyɔ̌nu e nɔ nyí Miki é nɛ́. É ɖɔ: “Ée un fó wěmaxɔmɛ gúdo é ɔ, ayi ce ɖɔ nú mì ɖɔ má kplɔ́n nǔ dó kanlin lɛ́ wú. Un lɛ́ ɖo biba wɛ bá nyí gběxosín-alijítɔ́ hwebǐnu tɔn bá wa sinsɛnzɔ́ ɖo fí e hudó sukpɔ́ ɖe é. Xɔ́ntɔn e zin ɖo gbigbɔ lixo lɛ́ é ɖe wě xá mì ɖɔ nyi ní lin tamɛ ganjí bo kpɔ́n ɖɔ nyi ka ná sixú wa azɔ̌ e ba wɛ nyi ɖe é bo lɛ́ kpé nǔ e gbé nya wɛ nyi ɖe ɖo gbigbɔ lixo lɛ́ é wú a jí. Yě flín mì ɖɔ gbɛ élɔ́ ná wá vivɔnu zaanɖé din. Amɔ̌, ɖo gbɛ yɔ̌yɔ́ ɔ mɛ ɔ, ali ná hun nú mì bɔ un ná kplɔ́n nǔ dó kanlin gěgé wú lěe é jló mì gbɔn é káká sɔ́yi. Énɛ́ wú ɔ, un kplɔ́n azɔ̌ e ma ná ɖu hwenu dín ǎ bo sixú d’alɔ mì é ɖé. Énɛ́ d’alɔ mì bɔ un mɔ azɔ̌ e ná d’alɔ mì bɔ un ná nyí gběxosín-alijítɔ́ hwebǐnu tɔn é, bo wá sɛ tɛn yi Équateur fí e hudó sukpɔ́ ɖe é.” Lɛ̌dózɔ́ wa wɛ Miki kpó asú tɔn kpó ɖe din ɖo to énɛ́ mɛ.
15. Nɛ̌ mɛ lɛ́ ka sixú kpo ɖo wɛn ɖagbe ɔ yí wɛ gbɔn? Nǎ kpɔ́ndéwú ɖé. (Kpɔ́n ɖiɖe lɛ́ lɔmɔ̌.)
15 Ényí mɛ lɛ́ gbɛ́ wɛn ɖagbe ɔ ɖo bǐbɛ́mɛ ɔ, awakanmɛ ɖó ná kú mǐ ǎ. Mɛ lɛ́ sixú húzú. Lin tamɛ dó Jezu sín nɔví Jaki sín kpɔ́ndéwú jí. É mɔ bɔ Jezu su, húzú Mɛsíya ɔ, bo kplɔ́n nǔ mɛ lěe gbɛtɔ́ ɖě ma ko bló gbɔn kpɔ́n ǎ é. Amɔ̌, nú xwe gěgé ɔ, Jaki xwedó Jezu ǎ. Jezu ko fɔ́n sín kú cóbɔ nɔví tɔn wá húzú ahwanvú; ahwanvú kanɖódónǔwútɔ́ ɖé wɛ é húzú! b (Jaan 7:5; Ga. 2:9) É ɖo tají ɖɔ a ní ma jó gbe dó hɛ̌nnumɔ towe ɖěɖěe wɛn ɔ ma ko dɔn ǎ lɛ́ é wú ó, bo lɛ́ ɖo tají ɖɔ a ní lɛ́ jlá wɛn ɔ mɛ ɖěɖěe ma ba ná ɖótó we ɖ’ayǐ ǎ lɛ́ é. Flín ɖɔ azǎn gǔdo gúdo tɔn lɛ́ mɛ nɔ gbɛ ɖe wɛ mǐ ɖe, énɛ́ wú ɔ, wɛnjíjlázɔ́ mǐtɔn myá nukún. Ðo nukɔnmɛ ɔ, mɛ lɛ́ sixú wá lin tamɛ dó nǔ e a nɔ ɖɔ nú yě din lɛ́ é jí bo wa nǔ sɔgbe xá, yě tlɛ sixú wa mɔ̌ ɖo hwenu e wǔvɛ́ ɖaxó ɔ ná bɛ́ gúdo é. c
Étɛ́ ka sixú sísɛ́ mǐ bɔ mǐ ma ná jó gbe dó hɛ̌nnumɔ mǐtɔn nǔmaɖitɔ́ lɛ́ wú ǎ? (Kpɔ́n akpáxwé 15) e
NǓFLÍNMƐ JEXÓVA TƆN LƐ́ NÍ KPO ÐO NUKÚN TOWE MƐ SU WƐ
16. Nɛ̌ a ka ko ɖu le nǔflínmɛ Jexóva tɔn lɛ́ tɔn gbɔn? (Kpɔ́n gbǎví “ Zǎn yě dó d’alɔ mɛ ɖěvo lɛ́” ɔ lɔmɔ̌.)
16 Mɛ e ma se nǔgbó bǐbɛ́mɛ tɔn Biblu tɔn lɛ́ kpɔ́n ǎ lɛ́ é wɛ è nɔ sɔ́ nǔ nú nǔɖuɖu gbigbɔ tɔn e mǐ nɔ mɔ lɛ́ é ɖé lɛ́ ná. Ði kpɔ́ndéwú ɔ, xóɖiɖɔ nú mɛ bǐ e mǐ nɔ xwlé mɛ ɖo aklúnɔzángbla ɖokpó ɖokpó mɛ lɛ́ é, xóta kpó video kpó ɖěɖěe nɔ tɔ́n ɖo jw.org jí é ɖé lɛ́ kpó xójláwéma mɛ bǐ tɔn mǐtɔn lɛ́ kpó ɔ, mɛ e ma nyí Kúnnuɖetɔ́ ǎ lɛ́ é wɛ è nɔ hɛn dó ayi mɛ hú gǎn dó sɔ́ nǔ nú yě. É ɖo mɔ̌ có, mǐ nɔ ɖu le nǔflínmɛ énɛ́ lɛ́ tɔn. Yě nɔ zɔ́n bɔ wǎn e mǐ yí nú Jexóva é nɔ jɛjí, nɔ ná hlɔ̌nhlɔ́n nǔɖiɖi e mǐ ɖó nú Xó tɔn é, bo nɔ lɛ́ d’alɔ mǐ bɔ mǐ nɔ kplɔ́n nǔkplɔ́nmɛ bǐbɛ́mɛ tɔn lɛ́ mɛ ɖěvo lɛ́ ganjí.—Ðɛh. 19:8.
17. Ninɔmɛ tɛ́ lɛ́ mɛ a ka sixú lin tamɛ dó nǔkplɔ́nmɛ bǐbɛ́mɛ tɔn Biblu tɔn lɛ́ jí ɖe?
17 Ðó mǐ nyí Kúnnuɖetɔ́ Jexóva tɔn lɛ́ wútu ɔ, ényí mǐ mɔ bɔ è tá wěziza dó nukúnnúmɔjɛnǔmɛ e mǐ ɖó dó nǔgbó Biblu tɔn ɖé wú é jí ɔ, akpakpa nɔ sɔ́ mǐ. É ɖo mɔ̌ có, nǔkplɔ́nmɛ bǐbɛ́mɛ tɔn Biblu tɔn e dɔn mǐ wá nǔgbó ɔ mɛ jɛ nukɔn lɛ́ é lɔ nɔ su nukún mǐtɔn mɛ tawun. Ényí é wá jɛ bɔ mǐ ba ná tɛ́ dó linlin mǐɖésúnɔ tɔn wú hú mǐɖée hwíhwɛ́ hwíhwɛ́ dó ali e tutoblónúnǔ Jexóva tɔn xlɛ́ mǐ é glɔ́ ɔ, mǐ sixú zé mǐɖée hwe bo flín mɛ e ɖo ali xlɛ́ tutoblónúnǔ énɛ́ wɛ é, é wɛ nyí Gbɛɖótɔ́ Nǔbǐwúkpétɔ́ e ɖó nǔnywɛ́ bɔ fínɛ́ jɛ́n ɖó é. Ényí mǐɖésú alǒ mɛvívɛ́ mǐtɔn ɖé ɖo didɛ wɛ ɖo wǔvɛ́ ɖé nu ɔ, mǐ sixú yi agbɔ̌n jí bo lin tamɛ dó nǔ e wú Jexóva tin bɔ wǔvɛ́ mimɔ tíin é jí. Gɔ́ ná ɔ, ényí mǐ ɖo gbeta lěe mǐ ná zán hwenu kpó nǔɖókan kpó mǐtɔn lɛ́ gbɔn é tɔn kɔn wá wɛ ɔ, mǐ sixú nɔ flín ɖɔ azǎn gǔdo gúdo tɔn lɛ́ mɛ nɔ gbɛ ɖe wɛ mǐ ɖe, b’ɛ kún sɔ́ kpo hwenu káká ɖé cóbónú gbɛ élɔ́ ná vɔ ó. Mi nú nǔflínmɛ Jexóva tɔn lɛ́ ní kpo ɖo hlɔ̌nhlɔ́n ná mǐ wɛ, wǔsyɛ́n dó lanmɛ nú mǐ wɛ, bo lɛ́ kpo ɖo blóbló wɛ bónú mǐ ní nyɔ́nǔi.
HAN 95 Wěziza ɔ ɖo hǐnhɔ́n d’é jí wɛ
a Kpɔ́n xóta “Pourquoi la souffrance disparaîtra bientôt” ɖo Atɔxwɛ (Flanségbe) 15 mai 2007 mɛ, wěx. 21-25.
c Kpɔ́n xóta “Étɛ́ mǐ ka tuun dó hwɛ e Jexóva ná ɖɔ xá gbɛtɔ́ lɛ́ ɖo malínmálín mɛ é wú?” ɖo Atɔxwɛ mai 2024 mɛ, wěx. 8-13.
d ÐIÐE LƐ́ SÍN TÍNMƐ: Kplékplé mɛxó lɛ́ tɔn yí gbe nú linlin mɛxó agun tɔn ɖé tɔn ǎ. Nukɔnmɛ ɔ, é ɖo sunví e ɖo jǐnukúnsin lɛ́ é kpɔ́n wɛ, bɔ énɛ́ sísɛ́ ɛ lobɔ é ɖó linlin e ɖo jlɛ̌ jí é dó éɖée wú.
e ÐIÐE Ɔ SÍN TÍNMƐ: Kúnnuɖetɔ́ ɖé ɖo kúnnuɖenú e xlɛ́ ɖɔ mǐ ɖo gbɛ nɔ wɛ ɖo azǎn gǔdo gúdo tɔn lɛ́ mɛ é gbéjé kpɔ́n wɛ ɖo nǔkplɔ́nkplɔ́n mɛɖésúnɔ tɔn tɔn hwenu. Énɛ́ sísɛ́ ɛ bɔ é ylɔ́ nɔví nyɔ̌nu tɔn bo ɖe kúnnu n’i.
