XÓTA NǓKPLƆ́NKPLƆ́N TƆN 28
HAN 88 D’alɔ mì nú má tuun ali towe lɛ́
Étɛ́wú è ka ɖó ná nɔ ba wěɖexámɛ?
“Mɛ e è kplɔ́n nǔ i ɔ é nɔ se ɔ, mɛ énɛ́ ɔ ɖó nǔnywɛ́.”—NǓX. 13:10.
XÓNUSƆ́ÐÓTE
Nǔ e mǐ ɖó ná nɔ wa bo ná nɔ ɖu le wě e è nɔ ɖe xá mǐ lɛ́ é tɔn bǐ mlɛ́mlɛ́ é.
1. Nɛ̌ mǐ ka sixú wá gbeta e nǔnywɛ́ kpé lɛ́ é kɔn bɔ tuto mǐtɔn lɛ́ ná yi ta gbɔn? (Nǔnywɛ́xó 13:10; 15:22)
MǏ BǏ wɛ nɔ ba ná wá gbeta e nǔnywɛ́ kpé lɛ́ é kɔn. Gɔ́ ná ɔ, mǐ bǐ wɛ nɔ ba ná mɔ nǔ e mǐ lin ná wa é sín nu. Xó Mawu tɔn ɖɔ lěe mǐ sixú kpé nǔ we énɛ́ lɛ́ e gbé nya wɛ mǐ ɖe lɛ́ é bǐ wú gbɔn é nú mǐ.—Xa Nǔnywɛ́xó 13:10; 15:22.
2. Étɛ́ Jexóva ka d’akpá bá wa nú mǐ?
2 É ɖo wɛn ɖɔ, mɛ ɖagbe hú gǎn e gɔ́n mǐ sixú yi bo byɔ́ nǔnywɛ́ kpó wěɖexámɛ kpó é wɛ nyí Tɔ́ mǐtɔn Jexóva. É d’akpá ɖɔ émí ná d’alɔ mǐ; é ɖɔ: “Un ná kplɔ́n nǔ we; nukún ce ná ɖo jǐ towe.” (Ðɛh. 32:8) Xó énɛ́ lɛ́ xlɛ́ ɖɔ é kún nyí wě kɛ́ɖɛ́ wɛ Jexóva nɔ ɖe xá mǐ ó, loɔ, nǔ mǐ mɛ ɖokpó ɖokpó tɔn nɔ lɛ́ ɖu ayi mɛ n’i, bɔ é nɔ d’alɔ mǐ bónú mǐ ná xwedó wěɖexámɛ tɔn lɛ́.
3. Nǔ tɛ́ lɛ́ mǐ ka ná gbéjé kpɔ́n ɖo xóta élɔ́ mɛ?
3 Ðo xóta élɔ́ mɛ ɔ, Xó Mawu tɔn ná d’alɔ mǐ bɔ mǐ ná mɔ xósin nú nǔkanbyɔ́ ɛnɛ élɔ́ lɛ́: (1) Ényí un ba ná ɖu le wě ɖagbe e è nɔ ɖe xá mì lɛ́ é tɔn ɔ, jijɔ tɛ́ lɛ́ un ka ɖó ná ɖó? (2) Mɛ̌ ka sixú ɖe wě ɖagbe xá mì? (3) Nɛ̌ un ka sixú ɖe xlɛ́ ɖɔ un ɖo wěɖexámɛ ba wɛ nǔgbó nǔgbó gbɔn? (4) Étɛ́wú un ka ɖó ná nyi alɔ nú byɔ̌byɔ́ mɛ ɖěvo lɛ́ ɖɔ yě ní nɔ wá gbeta lɛ́ kɔn dó así nú mì?
JIJƆ TƐ́ LƐ́ UN KA ÐÓ NÁ ÐÓ?
4. Jijɔ tɛ́ lɛ́ mǐ ka ɖó ná ɖó bá ɖu wěɖexámɛ ɖagbe sín le?
4 Mǐ ɖó ná nɔ sɔ́ mǐɖée hwe, bo ná nɔ lɛ́ nɔ jlɛ̌ jí bá dó ɖu le wě ɖagbe e è ɖe xá mǐ é tɔn. Ényí mǐ wá mɔ mǐɖée ɖo ninɔmɛ e mɛ, mǐ ma ko mɔ mǐɖée ɖe kpɔ́n ǎ é ɖé mɛ ɔ, mǐ ɖó ná yí gbe ɖɔ mǐ ɖó hudó alɔdó mɛ ɖěvo lɛ́ tɔn tɔn bá dó wá gbeta e nǔnywɛ́ kpé é ɖé kɔn. Gɔ́ ná ɔ, mǐ ɖó ná lɛ́ yí gbe ɖɔ mǐ kún tuun nǔ bǐ ó. Ényí mǐ ma nɔ sɔ́ mǐɖée hwe, bo nɔ lɛ́ nɔ jlɛ̌ jí ǎ ɔ, Jexóva ná d’alɔ mǐ ǎ. Bɔ ényí mǐ ɖo Xó tɔn xa wɛ ɔ, mǐ ná mɔ ɖɔ é kún byɔ́ ɖɔ mǐ ní zán wě e ɖe xá mǐ wɛ é ɖe lɛ́ é ɖě ó. (Micée 6:8; 1 Pi. 5:5) Amɔ̌, ényí mǐ nɔ sɔ́ mǐɖée hwe bo nɔ lɛ́ nɔ jlɛ̌ jí ɔ, mǐ ná nɔ ɖo gbesisɔmɛ bo ná nɔ xwedó wě e è ɖe xá mǐ b’ɛ júnjɔ́n Biblu jí é bo ná nɔ lɛ́ ɖu le tɔn.
5. Nǔ e wú axɔ́sú Davídi kpé bo wa é tɛ́ lɛ́ ka hɛn ɔ é ná ko zɔ́n bɔ é ná yí go?
5 Lin tamɛ dó nǔ e kpɔ́ndéwú axɔ́sú Davídi tɔn sixú kplɔ́n mǐ é jí. Nǔ e wú é kpé bo wa lɛ́ é hɛn ɔ, é ná ko zɔ́n bɔ é ná húzú goyítɔ́. Xwe mɔ̌kpán jɛ nukɔn nú hwenu e é xá axɔ́súzinkpo jí é ɔ, é ɖi nyǐ tawun ɖo nǔxixo linu. È tlɛ byɔ́ ɛ ɖɔ é ní wá xo nǔ nú axɔ́sú ɔ. (1 Sam. 16:18, 19) Ée è kɔn ami dó ta nú Davídi bo sɔ́ ɛ bɔ é ná nyí axɔ́sú e ná bɔ d’é wú é gúdo é ɔ, Jexóva zán gbigbɔ mímɛ́ Tɔn dó ná ɛ hlɔ̌nhlɔ́n. (1 Sam. 16:11-13) È tuun i ɖo togun tɔn mɛ, ɖó kɛntɔ́ yětɔn lɛ́ e é hu kɔn nyi ayǐ kpɔ́ gégé é wú; Goliyáti, Filisitɛ́ɛn jinganjingan ɔ lɔ ɖo yě mɛ. (1 Sam. 17:37, 50; 18:7) Ényí goyítɔ́ ɖé wɛ ko kpé nǔ ɖaxó ɖaxó énɛ́ lɛ́ wú bo bló ɔ, é hɛn ɔ, é ná ko lin ɖɔ é kún sɔ́ byɔ́ ɖɔ émí ní ɖótó wěɖexámɛ mɛ ɖěvo lɛ́ tɔn ó. Davídi ka wa mɔ̌ ǎ.
6. Nɛ̌ mǐ ka wa gbɔn bo tuun ɖɔ Davídi nɔ yí gbe nú wěɖexámɛ? (Kpɔ́n ɖiɖe ɔ lɔmɔ̌.)
6 Ée è sɔ́ Davídi axɔ́sú gúdo é ɔ, é kpo ɖo títɛ́dó mɛ ɖěɖěe nɔ ɖe wě xá ɛ lɛ́ é wú wɛ. (1 Tan 27:32-34) É nyí nǔkpácámɛ ǎ, ɖó è tuun ɖɔ Davídi nɔ ɖótó wě ɖagbe e è nɔ ɖe xá ɛ lɛ́ é. É nyí wě e súnnu lɛ́ ɖe xá ɛ lɛ́ é kɛ́ɖɛ́ wɛ é nɔ ɖótó ǎ, loɔ, é lɛ́ ɖótó wě e nyɔ̌nu e nɔ nyí Abigayílu é ɖe xá ɛ é. Nya goyítɔ́, alɔgúdokpɛ́dónúmɛtɔ́ kpó cejɛ́nnábínɔ kpó Nabálu sín asi wɛ é nyí. Davídi sɔ́ éɖée hwe bo xwedó wě ɖagbe e é ɖe xá ɛ é, bɔ wǎgbɔ tɔn ɔ, é nyi alɔ nú nǔwanyido syɛ́nsyɛ́n ɖé.—1 Sam. 25:2, 3, 21-25, 32-34.
Axɔ́sú Davídi sɔ́ éɖée hwe bo yí gbe nú wě e Abigayílu ɖe xá ɛ é bo wa nǔ sɔgbe xá (Kpɔ́n akpáxwé 6)
7. Nǔ tɛ́ lɛ́ kpɔ́ndéwú Davídi tɔn ka sixú kplɔ́n mǐ? (Nǔnywɛ́tɔ́xó 4:13) (Kpɔ́n ɖiɖe lɛ́ lɔmɔ̌.)
7 Kpɔ́ndéwú Davídi tɔn sixú kplɔ́n nǔɖé lɛ́ mǐ. Ði kpɔ́ndéwú ɔ, mǐ sixú ɖó nǔwúkpíkpé ɖé lɛ́, alǒ ɖó acɛ ɖó bǎ ɖé mɛ. É ná bo nyí mɔ̌ ɔ, mǐ ɖó ná lin gbeɖé ɖɔ mǐ ko tuun nǔ bǐ, bo kún ɖó hudó wěɖexámɛ tɔn ó ǎ. Gɔ́ ná ɔ, Davídi ɖɔhun ɔ, ényí mɛ ɖěbǔ ná bo ɖe wě xá mǐ ɔ, mǐ ɖó ná nɔ ɖo gbesisɔmɛ bo ná nɔ ɖótó wě ɖagbe e é ɖe xá mǐ é. (Xa Nǔnywɛ́tɔ́xó 4:13.) Ényí mǐ nɔ wa mɔ̌ ɔ, mǐ ná ɖibla nyi alɔ nú nǔwanyido syɛ́nsyɛ́n e sixú dɔn mǐ kpó mɛ ɖěvo lɛ́ kpó dó aluwɛ mɛ lɛ́ é.
Mǐ ɖó ná nɔ ɖo gbesisɔmɛ bo ná nɔ ɖótó wě ɖagbe e mɛ ɖěbǔ ɖe xá mǐ é (Kpɔ́n akpáxwé 7) c
MƐ̌ KA SIXÚ ÐE WĚ ÐAGBE XÁ MÌ?
8. Étɛ́wú Jonatáan ka jɛxá bá ɖe wě xá Davídi?
8 Ð’ayi nǔ ɖěvo e kpɔ́ndéwú Davídi tɔn sixú kplɔ́n mǐ é wú. É ɖótó wě e mɛ ɖěɖěe zun xɔ́ntɔn vívɛ́ xá Jexóva, bo lɛ́ mɔ nukúnnú jɛ ninɔmɛ e ɖí xwi xá wɛ é ɖe é mɛ ganjí lɛ́ é ɖe xá ɛ lɛ́ é. Ði kpɔ́ndéwú ɔ, hwenu e Davídi ba ná tuun nú é ka hɛn ɔ, é ná dó hwɛ gbɔ xá axɔ́sú Sawúlu a jí é ɔ, é ɖótó wě e Jonatáan Sawúlu ví ɔ ɖe xá ɛ é. Étɛ́wú Jonatáan ka kpé wú bo ɖe wě ɖagbe xá ɛ? Ðó Jonatáan zun xɔ́ntɔn vívɛ́ xá Jexóva, bo lɛ́ tuun lěe è nɔ wa nǔ xá Sawúlu gbɔn é. (1 Sam. 20:9-13) Nɛ̌ mǐ ka sixú zán nǔkplɔ́nmɛ énɛ́ gbɔn?
9. Ényí mǐ ɖó hudó wěɖexámɛ tɔn ɔ, mɛ̌ mǐ ka ɖó ná kan nǔ byɔ́? Tínmɛ. (Nǔnywɛ́xó 13:20)
9 Ényí mǐ ɖó hudó wěɖexámɛ tɔn ɔ, é ná nyɔ́ ɖɔ mǐ ní yi mɔ mɛ e zun xɔ́ntɔn vívɛ́ xá Jexóva, bo lɛ́ mɔ nǔ kpɔ́n ɖo ali e nu mǐ ɖó hudó alɔdó tɔn ɖe é ɖé. a (Xa Nǔnywɛ́xó 13:20.) Mǐ ní ɖɔ ɖɔ nɔví súnnu wínnyáwínnyá ɖé ɖo mɛ e ná jɛxá ɛ bɔ é ná wlí alɔ xá é ɖé ba wɛ. Mɛ̌ ka sixú ɖe wě ɖagbe xá ɛ? Xɔ́ntɔn tɔn e ma ko wlí alɔ ǎ é ɖé sixú d’alɔ ɛ, ényí é sɔ́ wěɖexámɛ tɔn lɛ́ jínjɔ́n nǔgbódodó Biblu tɔn lɛ́ jí ɔ nɛ́. Amɔ̌, ényí nɔví súnnu wínnyáwínnyá ɔ yi mɔ asú kpó asi kpó e zin ɖo gbigbɔ lixo, bo lɛ́ ɖo alɔwlíwlí awǎjijɛnɔ ɖé sín vǐví ɖu wɛ sín xwe ɖé lɛ́ ɖíe ɖé ɔ, yě ná ɖibla ɖe wě tawun tawun e ná lɛ́ d’alɔ ɛ lɛ́ é xá ɛ hú gǎn.
10. Étɛ́ lɛ́ mǐ ka ná gbéjé kpɔ́n din?
10 Mǐ ko ɖɔ xó dó jijɔ e mǐ ɖó ná ɖó lɛ́ é we jí, bo lɛ́ ɖɔ xó dó mɛ e sixú ɖe wě ɖagbe xá mǐ é jí. Din ɔ, mǐ ní gbéjé nǔ e wú mǐ ɖó ná ɖe xlɛ́ ɖɔ mǐ ba nǔgbó nǔgbó ɖɔ è ní ɖe wě xá mǐ é kpɔ́n, bá lɛ́ kpɔ́n ɖɔ mǐ ka ɖó ná nɔ byɔ́ mɛ ɖěvo lɛ́ ɖɔ yě ní wá gbeta lɛ́ kɔn d’así nú mǐ wɛ a jí.
NƐ̌ UN KA SIXÚ ÐE XLƐ́ ÐƆ UN BA ÐƆ È NÍ NƆ ÐE WĚ XÁ MÌ NǓGBÓ NǓGBÓ GBƆN?
11-12. (a) Hweɖélɛ́nu ɔ, étɛ́ mǐ ka sixú wa? (b) Hwenu e é byɔ́ ɖɔ axɔ́sú Hlobowámu ní wá gbeta tají ɖé kɔn é ɔ, étɛ́ é ka wa?
11 Hweɖélɛ́nu ɔ, mɛɖé sixú wa nǔ cí nǔ ɖɔ wěɖexámɛ ba wɛ é ɖe ɖɔhun, amɔ̌, nú è ná ɖɔ xójɔxó ɔ, mɛ ɖěvo ɖěɖěe ná dó zǒgbe gbeta e kɔn é ko wá é jí é ba wɛ é ɖe kpowun. È sixú ɖɔ ɖɔ mɛ mɔ̌hun ɖo biba wɛ ɖɔ è ní ɖe wě xá émí nǔgbó nǔgbó ǎ. Nǔ e jɛ dó axɔ́sú Hlobowámu jí é ɖó ná nyí akpágbanúmɛ ɖé n’i.
12 Hlobowámu wɛ jɛ axɔ́sú Salomɔ́ɔ tɛnmɛ, bo húzú axɔ́sú Izlayɛ́li tɔn. Hwenu e Hlobowámu húzú axɔ́sú é ɔ, nǔ ɖagbe gěgé ɖo togun ɔ sí, amɔ̌, yě mɔ ɖɔ Salomɔ́ɔ ɖó azɔ̌ kɔ jí nú émí dín. Togun ɔ yi Hlobowámu gɔ́n bo sa vo n’i ɖɔ é ní ɖe azɔ̌ kpo nú émí. Hlobowámu ɖɔ nú yě ɖɔ yě ní ná émí hwenu bónú émí ná lin tamɛ dó gbeta e kɔn émí ná wá é wú. Afɔ ɖagbe wɛ é ɖe bo yi ba wěɖexámɛ ɖo súnnu mɛxó éé d’alɔ Salomɔ́ɔ lɛ́ é gɔ́n. (1 Axɔ́. 12:2-7) Amɔ̌, é xo wě e súnnu mɛxó énɛ́ lɛ́ ɖe xá ɛ é nyi kɛ́n. Étɛ́wú é ka wa mɔ̌? Hlobowámu ka ko wá gbeta nǔ e ná wa wɛ é ɖe é tɔn kɔn, bo ɖo mɛ e ná yí xó n’i é ba wɛ kpowun wɛ wɛ a? Ényí mɔ̌ hǔn, wě e xɔ́ntɔn tɔn wínnyáwínnyá lɛ́ ɖe xá ɛ é ka dó zǒgbe linlin tɔn énɛ́ jí. (1 Axɔ́. 12:8-14) Wě e xɔ́ntɔn Hlobowámu tɔn lɛ́ ɖe xá ɛ é jí wɛ é zɔn dó bo ná xósin mɛ e jí kpa acɛ dó wɛ é ɖe lɛ́ é. Wǎgbɔ tɔn ɔ, akɔta ɔ má, bɔ sín hwenɛ́nu ɔ, ahwan fun wɛ jɛ́n Hlobowámu nɔ ɖe.—1 Axɔ́. 12:16-19.
13. Nɛ̌ mǐ ka sixú wa gbɔn bo tuun ɖɔ mǐ ba ɖɔ mɛ ɖěvo lɛ́ ní ɖe wě xá mǐ nǔgbó nǔgbó?
13 Étɛ́ kpɔ́ndéwú Hlobowámu tɔn ka sixú kplɔ́n mǐ? Ényí mǐ ɖo wěɖexámɛ ba wɛ ɔ, mǐ ɖó ná ɖe xlɛ́ ɖɔ mǐ ɖo biba wɛ nǔgbó nǔgbó ɖɔ è ní ɖe wě xá mǐ. Nɛ̌ mǐ ka sixú wa gbɔn bo tuun ɖɔ mǐ nɔ wa nǔ gbɔn mɔ̌? Mǐ sixú kan nǔ élɔ́ byɔ́ mǐɖée: ‘Un ka nɔ ba wěɖexámɛ bɔ énɛ́ gúdo tlóló ɔ, un nɔ xo nyi kɛ́n ɖó é sɔgbe xá nǔ e ba ná se wɛ un ɖe é ǎ wútu wɛ a?’ Ð’ayi kpɔ́ndéwú élɔ́ wú.
14. Ényí è ɖe wě xá mǐ ɔ, étɛ́ mǐ ka ɖó ná flín? Jlɛ̌ dó nǔɖé wú. (Kpɔ́n ɖiɖe ɔ lɔmɔ̌.)
14 Mǐ ní ɖɔ ɖɔ nɔví súnnu ɖé mɔ azɔ̌ e kpé kwɛ́ tawun é ɖé. Cóbónú é ná yí gbe nú azɔ̌ ɔ ɔ, é yi mɔ mɛxó agun tɔn ɖé bo ba wěɖexámɛ. Nɔví súnnu ɔ tínmɛ ɖɔ azɔ̌ ɔ ná byɔ́ ɖɔ émí ná nɔ nɔ zɔ nú xwédo émítɔn nú aklúnɔzángbla ɖé lɛ́ sín hweɖénu jɛ hweɖénu. Mɛxó agun tɔn ɔ flín nɔví súnnu ɔ nǔgbódodó Biblu tɔn e xlɛ́ ɖɔ azɔ̌ tají e é ɖó é wɛ nyí ɖɔ é ná sú nǔ e hudó xwédo tɔn ɖo gbigbɔ lixo é sín do n’i. (Efɛ́. 6:4; 1 Tim. 5:8) Mǐ ní ɖɔ ɖɔ nɔví súnnu ɔ mɔ tlóló ɖɔ wě e mɛxó agun tɔn ɔ ɖe xá émí é kún sɔgbe ó, bo jɛ nǔ kanbyɔ́ nɔví súnnu ɖěvo lɛ́ jí dó xó ɔ wú, káká jɛ hwenu e é se nǔ e ba ná se wɛ é ɖe é dó é. Nɔví súnnu ɔ ɖo wěɖexámɛ ba wɛ dóó a, alǒ é ko wá gbeta tɔn kɔn bo ɖo mɛ e ná dó zǒgbe jí n’i é ba wɛ kpowun? Mǐ ɖó ná flín ɖɔ ayi mǐtɔn hízí. (Jel. 17:9) Hweɖélɛ́nu ɔ, wěɖexámɛ e sín hudó mǐ ɖó hú gǎn é wɛ nyí wěɖexámɛ e mǐ ma nɔ ba ná se káká ɖé ǎ é.
Mǐ ka nɔ ba wěɖexámɛ ɖagbe lɛ́ nǔgbó nǔgbó a, alǒ mɛ e ná yí xó nú mǐ é ba wɛ mǐ nɔ ɖe kpowun? (Kpɔ́n akpáxwé 14)
UN KA ÐÓ NÁ NƆ BYƆ́ MƐ ÐĚVO LƐ́ ÐƆ YĚ NÍ NƆ WÁ GBETA LƐ́ KƆN DÓ ASÍ NÚ MÌ WƐ A?
15. Étɛ́ mǐ ka ɖó ná ɖó ayi te bo ma ná nɔ wa ǎ? Étɛ́wú?
15 Mǐ mɛ ɖokpó ɖokpó ta wɛ gbeta mǐɖésúnɔ tɔn lɛ́ kɔn wíwá sín agban ɖe. (Ga. 6:4, 5) Lěe mǐ ko ɖɔ gbɔn wá yi é ɔ, mɛ e ɖó nǔnywɛ́ é ɖé ɖó ná ba nǔnywɛ́ ɖo Xó Mawu tɔn mɛ, bo ná nɔ lɛ́ ba ɖo klisánwun e zin lɛ́ é gɔ́n cóbó wá gbeta ɖé kɔn. É ɖo mɔ̌ có, mǐ ɖó ná ɖo acéjí bo ná nɔ byɔ́ mɛ ɖěvo lɛ́ ɖɔ yě ní wá gbeta lɛ́ kɔn dó así nú mǐ ǎ. Mɛɖé lɛ́ sixú wa mɔ̌ tlɔlɔ gbɔn nǔ élɔ́ kinkanbyɔ́ mɛ e yě nɔ ɖó sísí ná é ɖé gblamɛ: “Ényí hwi wɛ ɖo tɛn ce mɛ ɔ, nɛ̌ a ka ná wa nǔ gbɔn?” Mɛ ɖěvo lɛ́ sixú hɛn ayi dó wa mɔ̌ gbɔn nǔ e mɛ ɖěvo ɖé wa é sín kpɔ́ndéwú xwixwedó gblamɛ. Yěɖésúnɔ ka nɔ lin tamɛ dó xó ɔ wú yi gɔngɔn mɛ cóbó nɔ wa mɔ̌ ǎ.
16. Ninɔmɛ tɛ́ ka vun kan ɖo Kɔlɛ́nti bo kunkplá lan e è xwlé vodún lɛ́ é? Mɛ̌ ka ɖó acɛ bo ná ɖɔ ɖɔ è ná ɖu lan mɔ̌hun alǒ gbɔ? (1 Kɔlɛ́ntinu lɛ́ 8:7; 10:25, 26)
16 Lin tamɛ dó ninɔmɛ e vun kan ɖ’agun klisánwun xwe kanweko nukɔntɔn ɔ tɔn e ɖo Kɔlɛ́nti é mɛ, bo kunkplá lan e è sixú ko xwlé vodún lɛ́ é ɖuɖu é jí. Pɔ́lu wlán nǔ élɔ́ sɛ́dó klisánwun énɛ́ lɛ́: “Mǐ tuun ɖɔ vodún kún nyí nǔtí ó, bo lɛ́ tuun ɖɔ Mawu ɖokpó wɛ ɖe.” (1 Kɔ. 8:4) Mɛ e ɖo agun ɔ mɛ é ɖé lɛ́ hɛn xó énɛ́ ayi mɛ bo wá gbeta ɔ kɔn ɖɔ émí hɛn ɔ, émí ná ɖu lan e è sixú ko xwlé vodún bo wá sa ɖo axi mɛ é ɖé. Mɛ ɖěvo lɛ́ ka sixú wá gbeta ɔ kɔn ɖɔ émí kún sixú ɖu lan mɔ̌hun bɔ ayixa émítɔn ná gɔn hun xo xá émí ó. (Xa 1 Kɔlɛ́ntinu lɛ́ 8:7; 10:25, 26.) Gbeta mɛɖésúnɔ tɔn wɛ énɛ́ nyí. Pɔ́lu ɖe wě xá Kɔlɛ́ntinu lɛ́ gbeɖé ɖɔ yě ní nɔ wá gbeta lɛ́ kɔn d’así nú mɛ ɖěvo lɛ́ alǒ nɔ wa nǔ e mɛ ɖěvo lɛ́ wa é kpowun ǎ. Mɛ ɖokpó ɖokpó “wɛ ná ɖó gbe nǔ e éɖésúnɔ wa lɛ́ é tɔn nú Mawu.”—Hlɔ̌. 14:10-12.
17. Ényí mǐ nɔ wa nǔ e mɛ ɖěvo lɛ́ nɔ wa é kpowun ɔ, étɛ́ ka sixú jɛ? Nǎ kpɔ́ndéwú ɖé. (Kpɔ́n ɖiɖe lɛ́ lɔmɔ̌.)
17 Nɛ̌ nǔ mɔ̌hun ka sixú jɛ ɖo égbé gbɔn? Lin tamɛ dó nǔ e kan fɛ́n ɖó yɔywɛ hun tɔn lɛ́ é jí. Klisánwun ɖokpó ɖokpó wɛ ná wá gbeta ɔ kɔn bo ná yí gbe nú fɛ́n ɖó yɔywɛ énɛ́ lɛ́ alǒ gbɛ́. b Mǐ sixú mɔ ɖɔ é vɛ́ wǔ bɔ è ná mɔ nukúnnú jɛ xó énɛ́ mɛ bǐ mlɛ́mlɛ́, amɔ̌ gbeta mɔ̌hun lɛ́ kɔn wíwá ɖo agban e mǐ mɛ ɖokpó ɖokpó wɛ ɖó ná hɛn lɛ́ é mɛ. (Hlɔ̌. 14:4) Ényí mǐ ko ɖó walɔ ɔ, bo nɔ wa nǔ e mɛ ɖěvo lɛ́ nɔ wa é ɔ, mǐ sixú vɔ́ da nú ayixa mǐɖésúnɔ tɔn. Zǎn kɛ́ɖɛ́ jɛ́n mǐ sixú nɔ zán ayixa mǐtɔn cóbá kplɔ́n azɔ̌ ɛ, bo lɛ́ bló bɔ é ná kpɔ́n te d’é jí. (Ebl. 5:14) Énɛ́ wú ɔ, hwetɛ́nu mǐ ka ɖó ná byɔ́ klisánwun e zin é ɖé ɖɔ é ní ɖe wě xá mǐ? Ényí mǐɖésúnɔ ba do nú nǔ bo ka kpo ɖo hudó alɔdó tɔn ɖó wɛ bá mɔ nukúnnú jɛ lěe nǔgbódodó Biblu tɔn lɛ́ cá kan xá ninɔmɛ mǐtɔn gbɔn é wú ɔ jɛ́n nǔ ná nyí mɔ̌.
Hwenu e mǐ ko ba do nú nǔ mǐɖésúnɔ gúdo é kɛ́ɖɛ́ jɛ́n mǐ ná ba wěɖexámɛ (Kpɔ́n akpáxwé 17)
KPO ÐO WĚÐEXÁMƐ BA WƐ
18. Nǔ tɛ́ lɛ́ Jexóva ka wa nú mǐ?
18 Jexóva ná mǐ gbe bɔ mǐ ná nɔ wá gbeta mǐɖésúnɔ tɔn lɛ́ kɔn dó ɖe xlɛ́ ɖɔ émí ɖeji dó mǐ wú tawun. É ná mǐ Xó tɔn Biblu ɔ. É lɛ́ ná mǐ xɔ́ntɔn e ɖó nǔnywɛ́, bo sixú d’alɔ mǐ bɔ mǐ ná lin tamɛ dó nǔgbódodó Biblu tɔn lɛ́ jí lɛ́ é. Mɔ̌ mɛ ɔ, Jexóva nɔ kpé nukún dó mǐ wú Tɔ́ wǎnyíyínɔ ɖé ɖɔhun. (Nǔx. 3:21-23) Étɛ́ mǐ ka sixú wa dó ɖe nǔsumɛnukúnmɛ xlɛ́?
19. Nɛ̌ mǐ ka sixú kpo ɖo xomɛhunhun dó nú Jexóva wɛ gbɔn?
19 Lin tamɛ dó nǔ élɔ́ jí: Ényí mɛjitɔ́ lɛ́ mɔ bónú vǐ yětɔn lɛ́ su bo húzú mɛsɛntɔ́ Jexóva tɔn nǔnywɛ́tɔ́ e nɔ d’alɔ mɛ ɖěvo lɛ́ é ɔ, é nɔ víví nú yě tawun. Mɔ̌ ɖokpó ɔ, ényí Jexóva mɔ mǐ bɔ mǐ kpo ɖo zinzin wɛ ɖo gbigbɔ lixo, kpo ɖo wěɖexámɛ ba wɛ, bo lɛ́ kpo ɖo gbeta e nɔ wlí yɛ̌yi n’i lɛ́ é kɔn wá wɛ ɔ, xomɛ nɔ hun i.
HAN 127 Mɛ alɔkpa e un ɖó ná nyí é
a Nǔnywɛ́nú wɛ é nyí ɖɔ hweɖélɛ́nu ɔ, klisánwun lɛ́ sixú kan nǔ byɔ́ mɛ ɖěɖěe ma ɖo Jexóva sɛn wɛ ǎ lɛ́ é dó akwɛ́xó, dotóoxwéxó kpó xó ɖěvo lɛ́ kpó wú.
b Bo ná dó ɖó mɔjɛmɛ ɖěvo lɛ́ dó xó énɛ́ wú hǔn, kpɔ́n wěma, Ðu gbɛ víví káká sɔ́yi! nǔkplɔ́nkplɔ́n 39gɔ́, kɛ́n 5 kpó akpáxwé “Kíjé” ɔ kpó.
c ÐIÐE LƐ́ SÍN TÍNMƐ: Mɛxó agun tɔn ɖé ɖo wě ɖe xá mɛxó agun tɔn hǎtɔ́ tɔn ɖěvo wɛ dó lěe é ɖɔ xó gbɔn ɖo kplé agaɖanu din tɔn ɖé jí é wú. Wěxwɛ 5: Nɔví nyɔ̌nu ɖé ɖo wěɖexámɛ ba wɛ ɖo mɛ vovo lɛ́ gɔ́n. Ée é mɔ ɖɔ mɛ ɖě kún ɖe wě e ba wɛ émí ɖe é xá émí é ó ɔ, é ɖidó tɔn.
