Nǔnywɛ́xó 3:1-35
3 Vǐ ce, ma wɔn nǔkplɔ́nmɛ* ce ó,xwedó gbeɖiɖe ce lɛ́,
2 ɖó yě ná dó azǎn azǎn jí nú we,dó xwe xwe jí nú we, bɔ gbɛzán towe ná ɖó fífá.
3 Ma jó wǎnyíyí e ma nɔ sɛ do ǎ é kpó gbejíninɔ* kpó dó ó.
Sin yě dó kɔ;wlǎn yě dó ayi towe mɛ.
4 Énɛ́ ɔ, nǔ towe ná nyɔ́ Mawu kpó gbɛtɔ́ kpó nukúnmɛ,bɔ yě ná nɔ kpɔ́n we dó mɔ mɛ e ɖó nukúnnúmɔjɛnǔmɛ ɖaxó é.
5 Ðeji dó Jexóva wú kpó ayi towe bǐ kpó,ma nɔ gán jɛ nukúnnúmɔjɛnǔmɛ hwiɖésúnɔ tɔn wú ó.
6 Nɔ flín i ɖo nǔ e a nɔ wa lɛ́ é bǐ mɛ,énɛ́ ɔ, é ná jlɔ́ ali towe lɛ́.
7 Ma húzú nǔnywɛ́tɔ́ ɖo nukún hwiɖésúnɔ tɔn mɛ ó.
Ðǒ sísí e gɔ́ngɔ́n é nú Jexóva bo lɛ́ kɔ sín nǔnyanyawiwa gúdo.
8 Énɛ́ ná gbɔ azɔn nú agbaza* towe,bo ná ná fífá xú towe lɛ́.
9 Zǎn nǔ xɔ akwɛ́ towe lɛ́ dó wlí yɛ̌yi nú Jexóva,lɛ̌ sɔ́ nǔkún towe nukɔn nukɔntɔn lɛ́ bǐ* dó wa mɔ̌.
10 Énɛ́ ɔ, jinukún ná gɔ́ agɔ̌ towe lɛ́ bǐ mlɛ́mlɛ́,bɔ vɛ̌ɛn yɔ̌yɔ́ ná gɔ́ vɛ̌ɛnhɛnnú* towe lɛ́ bo túnflá.
11 Vǐ ce, ma hɔn kplɔ́n Jexóva tɔn nyi gbě ó,ényí é kɛ nu dó nǔ wú nú we hǔn, ma gbɛ́ wǎn ná ó.
12 Ðó mɛ e Jexóva yí wǎn ná lɛ́ é wɛ é nɔ kɛ nu dó nǔ wú ná,lěe tɔ́ ɖé nɔ bló gbɔn nú vǐ e wú xomɛ tɔn hun dó é gbɔn é.
13 Awǎjijɛnɔ wɛ nyí mɛ e mɔ nǔnywɛ́ ékpó mɛ e ɖó nukúnnúmɔjɛnǔmɛ é kpó.
14 Nǔnywɛ́ ɖíɖó nyɔ́ hú kpatágan ɖíɖó.Nǔnywɛ́ ɖíɖó ɖó le hú siká ɖíɖó.
15 É xɔ akwɛ́ hú awǐnnya koláyi;*è sixú sɔ́ nǔ e nɔ jló we lɛ́ é ɖě jlɛ́ dó wǔ tɔn ǎ.
16 Jidɔ́ ɖo ɖisílɔ tɔn mɛ;dɔkun kpó susu kpó ɖo amyɔlɔ tɔn mɛ.
17 Ali tɔn lɛ́ dɔn mɛ,bɔ fífá ɖo ali tɔn lɛ́ bǐ jí.
18 Atín e nɔ ná gbɛ mɛ é wɛ é nyí nú mɛ ɖěɖěe nɔ tɛ́ d’é wú lɛ́ é,bɔ è ná ylɔ́ mɛ ɖěɖěe nɔ tɛ́ d’é wú gbánwúngbánwún lɛ́ é ɖɔ awǎjijɛnɔ.
19 Nǔnywɛ́ wɛ Jexóva zán dó ɖó ayǐkúngban ɔ ayǐ.
Nukúnnúmɔjɛnǔmɛ wɛ é zán dó ɖó jǐnukúnsin nyi dodónu syɛ́nsyɛ́n lɛ́ jí.
20 Gbɔn nǔtuuntuun tɔn gblamɛ ɔ, sin ɖaxó ɖaxó lɛ́ má ɖó vovo,bɔ ahǔn ja sín akpɔ́kpɔ́ e ɖo jǐnukúnsin lɛ́ é mɛ.
21 Vǐ ce, nukún towe ní ma gosín yě* wú ó.
Nya xɛ ɖo nǔnywɛ́* kpó nǔwúkpíkpé tamɛ linlin tɔn kpó jí;
22 yě ná ná gbɛ we,*bo ná nyí kɔjɛ́ ɖo kɔ towe.
23 Énɛ́ ɔ, a ná ɖi zɔnlin ɖo ali towe jí ɖo ayijayǐ mɛ,bo ná klɛ́n afɔ* gbeɖé ǎ.
24 Ényí a mlɔ́ ayǐ ɔ, nǔ ɖě ná dó xɛsi we ǎ;a ná mlɔ́ ayǐ, bɔ amlɔ towe ná víví.
25 A ná ɖi xɛsi nú adǎn e nɔ wá gbo mɛ ajijimɛ é ɖě ǎ,mɔ̌ jɛ́n a ma ka ná lɛ́ ɖi xɛsi nú awě e ja mɛ nyanya lɛ́ xo gbé jɔhɔn ɖaxó ɖɔhun é ǎ é nɛ́.
26 Ðó Jexóva ná xlɛ́ ɖɔ émí nyí gǎnjɛwú towe;é ná lɔn nú afɔ towe ní jɛ mɔ mɛ ǎ.
27 Ényí a kpé wú* bo ná d’alɔ mɛ hǔn,ma tɛ nǔ ɖagbe mɛ ɖěɖěe a ɖó ná ná lɛ́ é* ó.
28 Ényí a sixú ná nǔ nɔzo towe din hǔn,
ma ɖɔ n’i ɖɔ: “Yi; lɛ̌ kɔ wá hweɖévonu! Sɔ su ɔ, un ná ná we” ó.
29 Ma lin nyanya nɔzo towe e kpó hwi kpó ɖo kpɔ́,bɔ é ɖeji dó wǔ we é tɔn ó.
30 Ényí é ma sín nǔɖé wú ǎ hǔn, ma ɖɔ jlɛ xá mɛɖé ó,ényí é ma wa nǔ nyanya ɖé nú we ǎ ɔ nɛ́.
31 Ma jló dǎkaxotɔ́ sín gbɛ ó,ma ka lɛ́ wa nǔ éɖɔhun ɖo ali ɖěbǔ nu ó,
32 ɖó Jexóva gbɛ́ wǎn nú mɛ e nɔ hízí mɛ é,amɔ̌, é nɔ zun xɔ́ntɔn vívɛ́ xá nǔgbóɖɔtɔ́ lɛ́.
33 Jexóva nɔ dó nu mɛ nyanya sín xwé,amɔ̌, é nɔ kɔn nyɔ̌ná dó nǔjlɔ́jlɔ́watɔ́ sín xwé jí.
34 Ðó é nɔ cá nú mɛcákotɔ́ lɛ́,amɔ̌, é nɔ ná fɛ́nú tɔn mɛɖéesɔ́hwetɔ́ lɛ́.
35 È ná wlí yɛ̌yi nú nǔnywɛ́tɔ́ lɛ́,amɔ̌, nǔ e nɔ dɔn winnyá wá lɛ́ é wɛ nɔ xɔ akwɛ́ nú xlonɔ lɛ́.
Tínmɛ e ɖo do lɛ́ é
^ Alǒ “sɛ́n.”
^ Alǒ “nǔgbó.”
^ Blǔju tɔn, “hɔ̌nví.”
^ Alǒ “nǔkún towe e nyɔ́ hú gǎn lɛ́ é bǐ; akpáxwé ɖagbe hú gǎn le towe bǐ tɔn.”
^ Alǒ “vǐwunto.”
^ Kpɔ́n Xógbe ɖé lɛ́ sín tínmɛ.
^ É ɖo wɛn ɖɔ é ɖo gesí dó jijɔ Mawu tɔn ɖěɖěe xó è ɖɔ ɖo wěmafɔ e wá yi lɛ́ é mɛ lɛ́ é wɛ.
^ Alǒ “nǔnywɛ́ e nyɔ́ zán é.”
^ Alǒ “lǐndɔ̌n towe.”
^ Alǒ “gba afɔ dó nǔ ɖěbǔ wú.”
^ Alǒ “ɖó hlɔ̌nhlɔ́n.”
^ Alǒ “mɛ ɖěɖěe a ɖu axɔ́ tɔn dó lɛ́ é.”
