Jelemíi 31:1-40
31 “Ðo hwe énɛ́ nu ɔ,” wɛ Jexóva ɖɔ, “un ná húzú Mawu nú xwédo Izlayɛ́li tɔn lɛ́ bǐ, bɔ yě ná húzú togun ce.”
2 Nǔ e Jexóva ɖɔ é ɖíe:
“Togun e gán ɖo hwǐ nu é mɔ fɛ́nú ɖo gbětótló ɔ mɛ,hwenu e Izlayɛ́li ɖo zɔnlin ɖi wɛ xwe gbɔjɛtɛn tɔn é.”
3 Jexóva tɔ́n dó jǐ ce sín fí línlín bo ɖɔ:
“Un yí wǎn nú we bo ná yí wǎn nú we káká sɔ́yi.
Énɛ́ wú wɛ un dɔn we wá gɔ̌n ce gbɔn wǎnyíyí e ma nɔ sɛ do ǎ é gblamɛ.*
4 Un ná vɔ́ we gbá bɔ a ná lɛ́ húzú akɔta ɖé.
Ðyɔ̌vǐ ɖo alɔjí Izlayɛ́li tɔn è, a ná lɛ́ fɔ hǔn towe lɛ́,bo ná nɔ ɖo we ɖú wɛ kpó awǎjijɛ kpó.*
5 A ná lɛ́ wá tun vǐwun nyi Samalíi só lɛ́ jí;vǐwuntuntɔ́ lɛ́ ná tun vǐwun bo ná ɖu sínsɛ́n yětɔn.
6 Ðó hwe ɔ nu jawě bɔ mɛcɔ́tɔ́ e ɖo Eflayímu sókan mɛ lɛ́ é ná sú xó ɖɔ:
‘Mi sí te, mi nú mǐ ní yi Sinyɔ́ɔ bo yi Jexóva Mawu mǐtɔn gɔ́n.’”
7 Ðó nǔ e Jexóva ɖɔ é ɖíe:
“Mi sú xó sɛ́ dó Jakɔ́bu kpó awǎjijɛ kpó.
Mi sú awǎjijɛ xó, ɖó mi wɛ ɖo nukɔn ɖo akɔta lɛ́ mɛ.
Mi jlá wɛn ɔ; mi kpa susu nú Mawu bo ɖɔ:‘Jexóva è, hwlɛ̌n togun towe Izlayɛ́li sín mɛ e kpo lɛ́ é.’
8 Un ɖo yě kplá lɛ́ kɔ sín to e ɖo totaligbé é mɛ wɛ.
Un ná xo yě kplé ɖó kpɔ́ sín fí e jɛ zɔ hú gǎn ɖo ayǐkúngban ɔ jí lɛ́ é.
Nukúntɔ́nnɔ kpó afɔkponɔ kpó ná ɖo yě mɛ,gɔ́ nú nyɔ̌nu xoxónɔ kpó éé ɖo ajidonu é kpó bǐ.
Yě ná nyí agun ɖaxó ɖé bo ná lɛ́ kɔ wá fí.
9 Yě ná ɖo avǐ ya wɛ bo ná wá.
Un ná nɔ nukɔn nú yě, hwenu e yě ná sa vo bo byɔ́ fɛ́nú ce é.
Un ná xlɛ́ ali yě yi tɔsisa lɛ́ kɔn,gbɔn ali e jlɔ́ bo ma ná zɔ́n bɔ yě ná klɛ́n afɔ ǎ é jí.
Ðó un nyí tɔ́ nú Izlayɛ́li, bɔ Eflayímu nyí nukɔngbéví ce.”
10 Akɔta lɛ́ mi, mi ɖótó xó Jexóva tɔn,mi jlá gbɔn tɔtɛ́ntinto e ɖo fí línlín lɛ́ é mɛ ɖɔ:
“Mɛ e fúnfún Izlayɛ́li kpé é ná xo è kplé.
É ná nya xɛ ɖo jǐ tɔn, lěe lɛ̌ngbɔ́nyitɔ́ ɖé nɔ bló nú lɛ̌ngbɔ́hwan tɔn gbɔn é ɖɔhun.
11 Ðó Jexóva ná vɔ́ Jakɔ́bu xɔ,bo ná hwlɛ́n ɛ* sín mɛ e ɖó hlɔ̌nhlɔ́n hu i é sín alɔ mɛ.
12 Yě ná wá bo ná sú xó kpó awǎjijɛ kpó ɖo Sinyɔ́ɔ só ɔ jí,nukúnmɛ yětɔn ná kɔ́n ɖó ɖagbewiwa Jexóva tɔn* wú,ɖó jinukún, vɛ̌ɛn yɔ̌yɔ́ kpó ami kpó wú,ɖó lɛ̌ngbɔ́ wínnyáwínnyá lɛ́ kpó kanlin wínnyáwínnyá lɛ́ kpó wú.
Yě* ná wá cí jikpá e è hú sin ná ganjí é ɖɔhun,bo sɔ́ ná ba gǎn kpo kpɔ́n ǎ.”
13 Ðo azǎn énɛ́ gbe ɔ, ɖyɔ̌vǐ ɖo alɔjí ɔ ná ɖú we kpó awǎjijɛ kpó,gɔ́ nú dɔ̌nkpɛvú lɛ́ kpó degénɔ lɛ́ kpó lɔ.
Un ná bló bɔ aluwɛ yětɔn ná húzú agbojlaka ɖúɖú.
Un ná dó gbɔ nú yě bo ná ná awǎjijɛ yě, bɔ yě sɔ́ ná nɔ ná alě ɖě ǎ.
14 Un ná ná nǔɖuɖu vɔ̌sánúxwlémawutɔ́ lɛ́ bɔ é ná túnflá,ɖagbewiwa ce ná jɛmɛ nú togun ce,” wɛ Jexóva ɖɔ.
15 Nǔ e Jexóva ɖɔ é ɖíe:
‘È se mɛ e ɖo gbɛvíhan dó wɛ bo ɖo avǐ ya wɛ vívɛ́ vívɛ́ é ɖé sín gbe ɖo Hlǎma:
Hlacɛ́li wɛ ɖo vǐ tɔn lɛ́ sín avǐ ya wɛ.
É gbɛ́ ɖɔ è ní ma dó gbɔ nú émí ɖó vǐ émítɔn lɛ́ wú ó,ɖó yě ɖě sɔ́ tíin ǎ.’”
16 Nǔ e Jexóva ɖɔ é ɖíe:
“‘Ma sɔ́ ya avǐ ɖě ó; súnsún ɖasin sín nukúnmɛ,ɖó azɔ̌ e a wa é sín ajɔ ɖe,’ wɛ Jexóva ɖɔ.
‘Yě ná lɛ́ kɔ sín kɛntɔ́ ɔ sín to mɛ.’
17 ‘Nukúnɖíɖó tíin nú we ɖo sɔgúdo,’ wɛ Jexóva ɖɔ.
‘Vǐ towe lɛ́ ná lɛ́ kɔ yi ayǐkúngban yěɖésúnɔ tɔn jí.’”
18 “Un se céɖécéɖé bɔ Eflayímu ɖo alě ná wɛ bo ɖɔ:‘Nyibúví e è ma ko dé ǎ é ɖɔhun ɔ,a kplɔ́n mì, bɔ un yí kplɔ́n.
Lɛ̌ kɔ nú mì, énɛ́ ɔ, un ná yá wǔ lɛ́ kɔ,ɖó hwi wɛ nyí Jexóva Mawu ce.
19 Ée un lɛ́ kɔ wá Mawu gɔ́n gúdo é ɔ, nǔ e un wa é vɛ́ nú mì;ée è bló bɔ un mɔ nukúnnú jɛ mɛ gúdo é ɔ, un xo asá ce kpó aluwɛ kpó.
Winnyá hu mì bɔ wi ce lɛ́ kɔ́n,ɖó hwɛ e un hu ɖo wǐnnyáwínnyá mɛ lɛ́ é hu winnyá nú mì.’”
20 “Eflayímu nyí vǐ xɔ akwɛ́, ɛɛn, vǐ vívɛ́ná ɖé nú mì ǎ cé?
Un ná bo nɔ gbɛ́ nǔ n’i ɔ, un nɔ kpo ɖo flínflín i wɛ.
Énɛ́ wú wɛ nǔ tɔn byɔ́ lanmɛ nú mì* tawun.
Bɔ é ɖo wɛn ɖɔ un ná kú nǔbláwǔ n’i,” wɛ Jexóva ɖɔ.
21 “Zǎn awǐnnya lɛ́ dó ɖó wuntun ali towe lɛ́,bo zán dotín lɛ́ dó bló wuntun lɛ́.
Hɛn ayi dó ali ɖaxó ɔ, ɛɛn, ali e a ɖó ná gbɔn é wú.
Ðyɔ̌vǐ ɖo alɔjí Izlayɛ́li tɔn è, lɛ̌ kɔ, lɛ̌ kɔ wá toxo towe élɔ́ lɛ́ mɛ.
22 Ðyɔ̌vǐ gbejímanɔtɔ́ è, káká jɛ hwetɛ́nu a ná xo nǔ kpɔ́n yi jɛ?
Ðó Jexóva dá nǔ yɔ̌yɔ́ ɖokpó ɖo ayǐkúngban ɔ jí:
nyɔ̌nu ná jɛ súnnu gúdo kpó akpakpa sɔ́ mɛ kpó.”
23 Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Yě ná lɛ́ vɔ́ xó élɔ́ lɛ́ ɖɔ ɖo to Judáa tɔn kpó toxo tɔn lɛ́ kpó mɛ hwenu e un ná lɛ́ kɔ nú kannumɔ yětɔn lɛ́ é: ‘Nɔtɛn nǔjlɔ́jlɔ́wiwa tɔn è, ɛɛn, só mímɛ́ è, Jexóva ní kɔn nyɔ̌ná dó jǐ towe.’
24 Judáa kpó toxo tɔn lɛ́ bǐ kpó ná nɔ kpɔ́ ɖo fínɛ́, ɛɛn, glesi lɛ́ kpó kanlinnyitɔ́ lɛ́ kpó.
25 Ðó un ná ná hlɔ̌nhlɔ́n mɛ* e nǔ ci kɔ ná tawun é, bo ná sú hudó mɛ* e ba gǎn kpo lɛ́ é ɖokpó ɖokpó tɔn.”
26 Énɛ́ ɔ, un fɔ́n bo hun nukún ce lɛ́, bɔ amlɔ e un dɔ́ é hun xomɛ nú mì.
27 “Éɖíe! Hwe ɔ nu jawě,” wɛ Jexóva ɖɔ, “bɔ un ná dó gbɛtɔ́ kún kpó kanlin kún kpó nyi togun Izlayɛ́li tɔn kpó akɔta Judáa tɔn kpó mɛ.”
28 “Un ɖó ayi te bo hɔn ɖɔ nú yě, mu yě zin dɛ́, gba yě, sú kún dó nú yě lobo hɛn nǔ gblé dó yě wú, mɔ̌ ɖokpó ɔ, un ná ɖó ayi te bo gbá yě lobo tun yě,” wɛ Jexóva ɖɔ.
29 “Ðo hwe énɛ́ nu ɔ, yě sɔ́ ná ɖɔ: ‘Tɔ́ lɛ́ ɖu vǐwun xɛ́lú, bɔ vǐ lɛ́ sín aɖǔ wɛ ka jí’* ɖě ǎ.
30 Amɔ̌, mɛ ɖokpó ɖokpó ná kú ɖó nǔwanyido éɖésúnɔ tɔn wú. Mɛ ɖěbǔ ɖu vǐwun xɛ́lú ɔ, aɖǔ éɖésúnɔ tɔn wɛ ná jí.”
31 “Éɖíe! Hwe ɔ nu jawě,” wɛ Jexóva ɖɔ, “bɔ un ná jɛ akɔ yɔ̌yɔ́ ɖokpó xá togun Izlayɛ́li tɔn kpó akɔta Judáa tɔn kpó.
32 É ná cí akɔ e un jɛ xá tɔ́gbó yětɔn lɛ́ gbe e gbe un hɛn alɔ yětɔn bo kplá yě tɔ́n sín Ejípu to mɛ é ɖɔhun ǎ; nyi wɛ nyí gǎn* yětɔn nǔgbó ɔ có, yě gba akɔjijɛ énɛ́,’ wɛ Jexóva ɖɔ.”
33 “Ðó akɔ e un ná jɛ xá togun Izlayɛ́li tɔn ɖo azǎn énɛ́ lɛ́ gúdo é ɖíe,” wɛ Jexóva ɖɔ. “Un ná sɔ́ sɛ́n ce dó xo yětɔn mɛ, bo ná wlán dó ayi yětɔn mɛ. Un ná húzú Mawu yětɔn bɔ yě ná húzú togun ce.”
34 “Mɛ ɖokpó ɖokpó sɔ́ ná kplɔ́n nǔ nɔzo tɔn alǒ nɔví tɔn bo ná ɖɔ: ‘Tuun Jexóva!’ ɖě ǎ, ɖó yě mɛ bǐ ná ko tuun mì, sín mɛ kpɛví bǐ e ɖo yě mɛ é jí, káká jɛ mɛ ɖaxó bǐ ɔ jí,” wɛ Jexóva ɖɔ. “Ðó un ná sɔ́ nǔwanyido yětɔn kɛ yě, bo sɔ́ ná flín hwɛ yětɔn ɖě ǎ.”
35 Nǔ e Jexóva,Mɛ e dá hwe bɔ é nɔ ná wěziza kéze,bo ná sɛ́n* lɛ́ sun kpó sunví lɛ́ kpó bɔ yě nɔ ná wěziza zǎnmɛ,lobo nɔ fɔ́n xu sí te, bo nɔ bló bɔ aslɔkɛ́ tɔn lɛ́ nɔ wa adǎn,bɔ nyǐkɔ tɔn nɔ nyí Jexóva ahwankpá lɛ́ tɔn é ɖɔ é ɖíe:
36 “‘Ényí gbetakɛ́n énɛ́ lɛ́ cifo gbeɖé ɔ,’ wɛ Jexóva ɖɔ,‘hwe énɛ́ nu jɛ́n kúnkan Izlayɛ́li tɔn ma sɔ́ ná nyí akɔta ɖé ɖo nukɔn ce ǎ káká sɔ́yi.’”
37 Nǔ e Jexóva ɖɔ é ɖíe: “‘Ényí è sixú jlɛ́ jǐnukúnsin ɖo aga bo gbéjé dodónu ayǐkúngban ɔ tɔn lɛ́ kpɔ́n ɖo do ɔ, hwe énɛ́ nu jɛ́n un sixú gbɛ́ kúnkan Izlayɛ́li tɔn ɔ bǐ ɖó nǔ e yě wa é bǐ wútu,’ wɛ Jexóva ɖɔ.”
38 “Éɖíe! Hwe ɔ nu jawě,” wɛ Jexóva ɖɔ, “bɔ è ná gbá toxo ɔ nú Jexóva, sín Atɔxwɛ Hananɛ́li tɔn kɔn yi Zwemɛhɔntogbó ɔ kɔn.
39 È ná jlɛ́ nǔjlɛ́kan ɔ tlélé káká yi Galɛ́bu só ɔ kɔn bo ná lílɛ́ wá yi Gowa.
40 Tɔdo nǔkúkú lɛ́ kpó afín kpó tɔn lɛ́ bǐ, gɔ́ nú gle lɛ́ bǐ káká yi Sedlɔ́n tɔdo ɔ kɔn, káká jɛ Sɔ́hɔntogbó ɔ sín zwe jí ɖo zǎnzǎnhwe jí ná nyí nǔ mímɛ́ nú Jexóva. È sɔ́ ná hɔn ɖɔ ná alǒ mu zin dɛ́ kpɔ́n gbeɖé ǎ.”
Tínmɛ e ɖo do lɛ́ é
^ Alǒ “un kpo ɖo wǎnyíyí e ma nɔ sɛ do ǎ é ɖe xlɛ́ we wɛ.”
^ Alǒ “kpó mɛ e ɖo nǔ ko wɛ lɛ́ é kpó.”
^ Alǒ “lɛ́ kɔ n’i.”
^ Alǒ “nǔ ɖagbe e gosín Jexóva gɔ́n lɛ́ é.”
^ Alǒ “Lǐndɔ̌n yětɔn.”
^ Blǔju tɔn, “adɔkan ce lɛ́ mɛ.”
^ Alǒ “lǐndɔ̌n.”
^ Alǒ “lǐndɔ̌n.”
^ Blǔju tɔn, “lin.”
^ Alǒ vlafo, “asú.”
^ Alǒ “gbetakɛ́n.”
