Jelemíi 29:1-32
29 Gbeyíɖɔ Jelemíi nɔ Jeluzalɛ́mu bo sɛ́ wěma dó tomɛxó e kpo ɖo mɛ e yi kannumɔgbénu lɛ́ é mɛ lɛ́ é, vɔ̌sánúxwlémawutɔ́ lɛ́, gbeyíɖɔ lɛ́ kpó togun ɔ bǐ kpó, ɛɛn, mɛ ɖěɖěe Nabukodonɔzɔ́ɔ kplá sín Jeluzalɛ́mu yi kannumɔgbénu ɖo Babilɔ́nu lɛ́ é bǐ.
2 Nǔ nyí mɔ̌ hwenu e axɔ́sú Jekoniyási, na ɔ,* axɔ́súzɔ́watɔ́ hɔnmɛ tɔn lɛ́, axɔ́ví Judáa tɔn lɛ́ kpó Jeluzalɛ́mu tɔn lɛ́ kpó, alɔlyɛnzɔ́watɔ́* lɛ́ kpó gankɔntɔ́ lɛ́* kpó tɔ́n sín Jeluzalɛ́mu gúdo é.
3 É sɛ́ wěma ɔ dó gbɔn Elása Cafáni ví ɔ kpó Gemalíya Ilukíya ví ɔ kpó jí, yě wɛ Judáa xɔ́sú Sedesiyási sɛ́ dó Babilɔ́nu xɔ́sú Nabukodonɔzɔ́ɔ gɔ́n ɖo Babilɔ́nu. Wěma ɔ ɖɔ:
4 “Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ nú mɛ e yi kannumɔgbénu lɛ́ é bǐ, ɛɛn, mɛ e é bló bɔ yě gosín Jeluzalɛ́mu bo yi kannumɔgbénu ɖo Babilɔ́nu lɛ́ é ɖíe:
5 ‘Mi gbá xɔ bo nɔ mɛ. Mi bló jikpá lɛ́ bo ɖu sínsɛ́n yětɔn.
6 Mi da asi bo ji vǐ súnnu kpó vǐ nyɔ̌nu kpó; mi da asi nú vǐ súnnu mitɔn lɛ́ bo ná vǐ nyɔ̌nu mitɔn lɛ́ asú, bónú yě lɔ ní dó sixú ji vǐ súnnu kpó vǐ nyɔ̌nu kpó. Mi gba kún ɖo fínɛ́, kɛ́n mitɔn ní ma ɖe kpo ó.
7 Mi ba fífá toxo e mɛ un bɛ́ mi yi kannumɔgbénu ɖe é tɔn, bo xo ɖɛ sɛ́ dó Jexóva dó ta tɔn mɛ, ɖó toxo ɔ ɖo fífá mɛ ɔ, mi lɔ ná nɔ fífá mɛ.
8 Ðó nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “Mi ma lɔn nú gbeyíɖɔ kpó amɔɛkantɔ́ kpó mitɔn e ɖo tɛ́ntin mitɔn lɛ́ é flú mi ó, mi ma ka ɖótó dlɔ̌ e kú wɛ yě ɖe lɛ́ é ó.
9 Ðó ‘adingban ɖó nú mi wɛ yě ɖe ɖo gbeyíɖɔzɔ́ yětɔn kɔn ɖo nyǐkɔ ce mɛ. Un sɛ́ yě dó ǎ,’ wɛ Jexóva ɖɔ.”’”
10 “Ðó nǔ e Jexóva ɖɔ é ɖíe: ‘Hwenu e xwe 70 e mi ná bló ɖo Babilɔ́nu é ná wá vivɔnu é ɔ, un ná sɔ́ ayi ɖó mi jí, bo ná kplá mi lɛ́ kɔ wá nɔtɛn élɔ́ dó ɖe akpá e un dó é.’
11 “‘Ðó un tuun linlin e ɖó nú mi wɛ un ɖe lɛ́ é,’ wɛ Jexóva ɖɔ, ‘linlin fífá tɔn lɛ́ wɛ, é nyí awěxomɛ tɔn lɛ́ ǎ, bo ná dó bló bɔ sɔgúdo ná nyɔ́ nú mi bɔ mi ná lɛ́ ɖó nukúnɖíɖó.
12 Bɔ mi ná ylɔ́ mì, bo ná wá gɔ̌n ce, lobo xo ɖɛ sɛ́ dó mì, bɔ un ná ɖótó mi.’
13 “‘Mi ná ba mì, bo ná mɔ mì, ɖó mi ná ba mì kpó ayi mitɔn bǐ kpó wútu.
14 Un ná jó nyiɖée dó bɔ mi ná mɔ mì,’ wɛ Jexóva ɖɔ. ‘Un ná kplé kannumɔ towe lɛ́, bo ná xo mi kplé sín akɔta lɛ́ bǐ mɛ, sín fí e un fúnfún mi kpé gbɔn lɛ́ é,’ wɛ Jexóva ɖɔ. ‘Un ná lɛ́ kɔ nú mi wá fí e mi ɖe bɔ un bló bɔ mi yi kannumɔgbénu é.’
15 “Loɔ, mi ɖɔ: ‘Jexóva ko ná gbeyíɖɔ lɛ́ mǐ ɖo Babilɔ́nu.’
16 Ðó nǔ e Jexóva ɖɔ nú axɔ́sú e jínjɔ́n axɔ́súzinkpo Davídi tɔn jí é kpó togun e nɔ nɔ toxo élɔ́ mɛ lɛ́ é bǐ kpó é, ɛɛn, nɔví mitɔn ɖěɖěe ma xwedó mi yi kannumɔgbénu ǎ lɛ́ é ɖíe:
17 ‘Nǔ e Jexóva ahwankpá lɛ́ tɔn ɖɔ é ɖíe: “Un ɖo hwǐ, adɔ kpó jɛmɛjí* kpó sɛ́ dó yě wɛ, un ná bló bɔ yě ná cí fígi gblégblé* e gblé sɔmɔ̌, bɔ è ma sixú ɖu ǎ lɛ́ é ɖɔhun.”
18 “‘Un ná zán hwǐ, adɔ kpó jɛmɛjí kpó dó jɛ gǒ mɛ nú yě; un ná bló bɔ yě ná húzú nǔ e xyɔ́ wǔ é nú axɔ́súɖuto ayǐkúngban jí tɔn lɛ́ bǐ, bo ná nyí nudómɛ, nǔkpácámɛnú, nǔ kiko* kpó winnyánú kpó ɖo akɔta ɖěɖěe tɛ́ntin un fúnfún yě kpé gbɔn lɛ́ é bǐ mɛ,
19 ɖó yě ɖótó xó ce e un ɖɔ sɛ́ dó yě, gbɔn mɛsɛntɔ́ ce gbeyíɖɔ lɛ́ gblamɛ lɛ́ é ǎ,’ wɛ Jexóva ɖɔ. ‘Un sɛ́ yě dó azɔn gěgé.’*
“‘Mi ka ɖótó ǎ,’ wɛ Jexóva ɖɔ.
20 “Énɛ́ wú ɔ, mi mɛ e ɖo kannumɔgbénu lɛ́ é, ɛɛn, mi mɛ e un bɛ́ sín Jeluzalɛ́mu yi Babilɔ́nu lɛ́ é mi, mi bǐ ní ɖótó xó Jexóva tɔn.
21 Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ dó Akábu Koláya ví ɔ kpó Sedesiyási Maaséya ví ɔ kpó, éé nɔ ɖó adingban nú mi ɖo nyǐkɔ ce mɛ ɖo gbeyíɖɔzɔ́ yětɔn kɔn lɛ́ é wú é ɖíe: ‘Un ɖo yě jó dó nyi alɔ mɛ nú Babilɔ́nu xɔ́sú Nabukodonɔzɔ́ɔ* wɛ, bɔ é ná hu yě ɖo nukún mitɔn mɛ.
22 Bɔ nǔ e xá yě é ɔ, Judáanu e ɖo kannumɔgbénu ɖo Babilɔ́nu lɛ́ é bǐ ná nɔ sɔ́ dó dó nu mɛ ná. Yě ná ɖɔ: “Jexóva ní bló bónú a ní cí Sedesiyási kpó Akábu kpó e Babilɔ́nu xɔ́sú ɔ hi ɖo myɔ mɛ é ɖɔhun!”
23 Ðó yě wa winnyánú lɛ́ ɖo Izlayɛ́li, énɛ́ wɛ nyí ɖɔ yě dó afɔ gbě nú nɔzo yětɔn lɛ́ sín asi, bo ɖɔ adingbanxó lɛ́ ɖo nyǐkɔ ce mɛ, un ka ɖe gbe tɔn nú yě ǎ.
“‘“Nyɛ wɛ nyí Mɛ e tuun é, bo nyí kúnnuɖetɔ́ tɔn,” wɛ Jexóva ɖɔ.’”
24 “Bɔ a ná ɖɔ nú Cemáya e gosín Nɛxelámu é ɖɔ:
25 ‘Nǔ e Jexóva ahwankpá lɛ́ tɔn, Mawu Izlayɛ́li tɔn ɖɔ é ɖíe: “A sɛ́ wěma dó mɛ e nɔ nɔ Jeluzalɛ́mu lɛ́ é bǐ, bo sɛ́ dó vɔ̌sánúxwlémawutɔ́ Sofoníi Maaséya ví ɔ kpó vɔ̌sánúxwlémawutɔ́ lɛ́ bǐ kpó ɖo nyǐkɔ towe mɛ, bo ɖɔ:
26 ‘Jexóva sɔ́ we vɔ̌sánúxwlémawutɔ́ ɖó vɔ̌sánúxwlémawutɔ́ Yexoyáda tɛnmɛ, bónú a ná húzú xwé Jexóva tɔn sín nukúnkpénǔwútɔ́, bo ná kpé nukún dó taɖunɔ ɖěbǔ e ná wa nǔ gbeyíɖɔ ɖɔhun é wú, lobo ná sɔ́ ɛ ɖó sókpo kpó kɔgan kpó mɛ;
27 étɛ́wú a ma ka gbɛ́ nǔ nú Jelemíi Anatɔ́tinu e ɖo nǔ wa wɛ gbeyíɖɔ ɖɔhun ɖo tɛ́ntin mitɔn é ǎ lo?
28 É tlɛ sɛ́ wɛn dó mǐ ɖo Babilɔ́nu bo ɖɔ: “Mi ná nɔ kannumɔgbénu nú hwenu línlín! Mi gbá xɔ bo nɔ mɛ. Mi bló jikpá lɛ́ bo ɖu sínsɛ́n yětɔn . . .”’”’”
29 Hwenu e vɔ̌sánúxwlémawutɔ́ Sofoníi xa wěmasɛ́dómɛ énɛ́ dó gbeyíɖɔ Jelemíi tó mɛ é ɔ,
30 Jexóva ɖɔ xó nú Jelemíi, bo ɖɔ:
31 “Dǒ wɛn élɔ́ sɛ́ dó mɛ e ɖo kannumɔgbénu lɛ́ é bǐ, bo ɖɔ: ‘Nǔ e Jexóva ɖɔ dó Cemáya e gosín Nɛxelámu é wú é ɖíe: “Cemáya wa gbeyíɖɔzɔ́ dó ta mitɔn mɛ, có un ka sɛ́ ɛ dó ǎ, é lɛ́ tɛ́n kpɔ́n bo ná bló bɔ mi ná ɖeji dó adingbanxó lɛ́ wú.
32 Énɛ́ wú ɔ, nǔ e Jexóva ɖɔ é ɖíe: ‘Un ná húzú kpan nukɔn Cemáya e gosín Nɛxelámu é kpó kúnkan tɔn kpó. Mɛ e ɖo kúnkan tɔn mɛ é ɖě ná gán ɖo togun élɔ́ mɛ ǎ, é ka ná lɛ́ mɔ ɖagbe e un ná wa nú togun ce é ǎ,’ wɛ Jexóva ɖɔ, ‘ɖó é sísɛ́ mɛ lɛ́ bɔ yě fɔ́n gǔ dó Jexóva jí.’”’”
Tínmɛ e ɖo do lɛ́ é
^ Alǒ “axɔ́sú ɔ sín nɔ.”
^ Alǒ “aɖawunzɔ́watɔ́.”
^ Alǒ vlafo, “mɛ e nɔ mɛ ahohó ɖaxó ɖaxó lɛ́ é.”
^ Alǒ “azɔn.”
^ Alǒ vlafo, “gbigba.”
^ Blǔju tɔn, “nǔ e tamɛ è ná kwínkwín dó é.”
^ Blǔju tɔn, “un nɔ sí te zǎnzǎn bo nɔ sɛ́ yě dó.”
^ Blǔju tɔn, “Nɛbukadlɛzáa,” alɔkpa ɖěvo e è nɔ wlán gbɔn é nɛ́.
