Jelemíi 23:1-40
23 “Heelú lɛ̌ngbɔ́nyitɔ́ e ɖo kún sú dó nú lɛ̌ngbɔ́ e ɖo amagbo ce mɛ lɛ́ é wɛ, bo ɖo yě fúnfún kpé wɛ lɛ́ é!” wɛ Jexóva ɖɔ.
2 Énɛ́ wú ɔ, nǔ e Jexóva, Mawu Izlayɛ́li tɔn ɖɔ dó lɛ̌ngbɔ́nyitɔ́ ɖěɖěe ɖo togun tɔn nyi wɛ lɛ́ é wú é ɖíe: “Mi fúnfún lɛ̌ngbɔ́ ce lɛ́ kpé; mi fɔ́n bo ɖo yě gba dó wɛ, lobo ké ya nú yě ǎ.”
“Énɛ́ wú ɔ, un ná húzú kpan nukɔn mi ɖó nǔ nyanya e mi wa lɛ́ é wútu,” wɛ Jexóva ɖɔ.
3 “Énɛ́ gúdo ɔ, un ná xo lɛ̌ngbɔ́ ce e kpo lɛ́ é kplé sín to e mɛ un fúnfún yě kpé gbɔn lɛ́ é bǐ mɛ, bo ná kplá yě lɛ́ kɔ wá amagbo yětɔn mɛ, bɔ yě ná gba kún, bo ná sukpɔ́.
4 Un ná sɔ́ lɛ̌ngbɔ́nyitɔ́ e ná kpé nukún dó yě wú nǔgbó nǔgbó lɛ́ é ɖó nu yětɔn. Yě sɔ́ ná ɖi xɛsi, alǒ ado sɔ́ ná hu yě ɖě ǎ, bɔ yě ɖě ná hwe ǎ,” wɛ Jexóva ɖɔ.
5 “Éɖíe, hwe ɔ nu jawě,” wɛ Jexóva ɖɔ, “bɔ un ná bló bɔ nǔjlɔ́jlɔ́watɔ́ ɖokpó ná tɔ́n kun* ɖo kúnkan Davídi tɔn mɛ. Axɔ́sú ɖokpó ná kp’acɛ, é ná ɖe nukúnnúmɔjɛnǔmɛ xlɛ́, bo ná jɛ hun dó hwɛjijɔ kpó nǔjlɔ́jlɔ́wiwa kpó jí ɖo to ɔ mɛ.
6 Ðo hwetɔnnu ɔ, è ná hwlɛ́n Judáa gán, bɔ Izlayɛ́li ná nɔ ayijayǐ mɛ. Nyǐkɔ e è ná sɔ́ dó ylɔ́ ɛ ná é ɖíe: Jexóva gɔ́n wɛ nǔjlɔ́jlɔ́wiwa mǐtɔn gosín.”
7 “É ɖo mɔ̌ có, hwe ɔ nu jawě,” wɛ Jexóva ɖɔ, “bɔ yě sɔ́ ná ɖɔ: ‘Jexóva ɖo gbɛ jɛ́n wɛ ɔ, éyɛ́ mɛ e ɖe togun Izlayɛ́li tɔn tɔ́n sín Ejípu to mɛ é’ ɖě ǎ.
8 É nyɔ́ wa ɔ, yě ná ɖɔ: ‘Jexóva ɖo gbɛ jɛ́n wɛ ɔ, éyɛ́ mɛ e kplá togun Izlayɛ́li tɔn sín kúnkan tɔ́n sín to e ɖo totaligbé é kpó to ɖěɖěe mɛ é fúnfún yě kpé gbɔn lɛ́ é bǐ kpó mɛ, lobo lɛ́ kplá yě lɛ́ kɔ yi to énɛ́ lɛ́ mɛ é,’ bɔ yě ná nɔ to yěɖésúnɔ tɔn mɛ.”
9 Xó e un ɖɔ nú gbeyíɖɔ lɛ́ é ɖíe:
Ayi ce gba dó ɖo xomɛ.
Xú ce lɛ́ bǐ wɛ ɖo sísɔ́sísɔ́ wɛ.
Un cí mɛ e nu ahan mú é ɖɔhun,bo cí mɛ e vɛ̌ɛn ɖo jǐ tɔn é ɖɔhun,ɖó Jexóva kpó xó mímɛ́ tɔn lɛ́ kpó wútu.
10 Ðó afɔdógbě* wɛ gɔ́ to ɔ;é sín nudómɛ ɔ wú bɔ to ɔ byɔ́ aluwɛ mɛ,bɔ amagbo e ɖo gbětótló ɔ mɛ lɛ́ é xú.
Gbɛzán yětɔn báɖá, bɔ yě nɔ lɛ́ zán acɛ yětɔn nyi do.
11 “Gbeyíɖɔ lɛ́ kpó vɔ̌sánúxwlémawutɔ́ lɛ́ kpó bǐ wɛ nyí mɛ blíblí.*
Un tlɛ mɔ nǔnyanyawiwa yětɔn ɖo xwé nyiɖésúnɔ tɔn gbe,” wɛ Jexóva ɖɔ.
12 “Énɛ́ wú ɔ, ali yětɔn ná ɖíɖí, bo ná d’ablu;è ná sísɛ́ yě bɔ yě ná j’ayǐ.
Ðó un ná sɔ́ awě dó xo yě,ɖo xwe e mɛ yě ná ɖó gbe é,” wɛ Jexóva ɖɔ.
13 “Un mɔ nǔ e xyɔ́ wǔ é ɖo gbeyíɖɔ Samalíi tɔn lɛ́ sín fɛn nu.
Yě nɔ wa gbeyíɖɔzɔ́ ɖo Baálu nyíkɔ mɛ,bo nɔ bló bɔ togun ce Izlayɛ́li nɔ zɛ gbě.
14 Un mɔ nǔ baɖabaɖa ɖé lɛ́ ɖo gbeyíɖɔ e ɖo Jeluzalɛ́mu lɛ́ é sín fɛn nu.
Yě nɔ lɛ aga, bo nɔ lɛ́ ɖo adingban te;yě nɔ dó wǔsyɛ́n lanmɛ nú nǔnyanyawatɔ́ lɛ́,*bɔ yě nɔ lɛ́ kɔ sín nǔnyanyawiwa yětɔn gúdo ǎ.
Nú nyɛ ɔ, Sodɔ́mu ɖɔhun wɛ yě bǐ cí,bɔ mɛ e nɔ nɔ toxo ɔ mɛ lɛ́ é cí Gomɔ́ɔ ɖɔhun.”
15 Énɛ́ wú ɔ, nǔ e Jexóva ahwankpá lɛ́ tɔn ɖɔ dó gbeyíɖɔ lɛ́ wú é ɖíe:
“Un ɖo blǒbló wɛ bɔ yě ná ɖu vǐvɛ́,bo ɖo sin e mɛ è kɔn nǔvɛ́nu dó é ná yě wɛ bónú yě ná nu.
Ðó gǔfɔ́ndómawují bɛ́ sín gbeyíɖɔ Jeluzalɛ́mu tɔn lɛ́ jí bo gba kpé to ɔ bǐ mɛ.”
16 Nǔ e Jexóva ahwankpá lɛ́ tɔn ɖɔ é ɖíe:
“Mi ma ɖótó gbeyíɖɔ ɖěɖěe ɖo gbeyíɖɔzɔ́ wa dó ta mitɔn mɛ wɛ lɛ́ é sín xó ó.
Flúflú mi wɛ yě ɖe.*
Ayi yěɖésúnɔ tɔn mɛ wɛ nǔ e yě mɔ bo nɔ ɖɔ é gosín,é nyí nu Jexóva tɔn mɛ ǎ.
17 Yě nɔ fɔ́n bo nɔ ɖo ɖiɖɔ nú mɛ e ma nɔ sí mì ǎ lɛ́ é wɛ ɖɔ:‘Jexóva ɖɔ: “Mi ná nɔ fífá mɛ.”’
Bo nɔ ɖɔ nú mɛ e nɔ xwedó ayi ta syɛ́nsyɛ́n tɔn yětɔn lɛ́ é bǐ ɖɔ:‘Awě ɖěbǔ ná xo mi ǎ.’
18 Ðó mɛ̌ ka ɖo mɛ e vɛ́ xá Jexóva lɛ́ é mɛ,bo ná mɔ xó tɔn lobo lɛ́ se xó tɔn?
Mɛ̌ ka wlí tó xó tɔn wú bo ná mɔ tɛn dó se?
19 Éɖíe! Jɔhɔn ɖaxó Jexóva tɔn ná nyi kpó zǐngídi ɖaxó kpó;é ná nyi vuzuvuzu cyɔ́n mɛdídá lɛ́ sín ta jɔhɔn syɛ́nsyɛ́n ɖɔhun.
20 Ényí Jexóva ma wa nǔ sɔgbe xá linlin e ɖo ayi tɔn mɛ lɛ́ é, bo bló yi fó mlɛ́mlɛ́ ǎ ɔ,xomɛsin e jí é ɖe é ná fá ǎ.
Ðo azǎn gǔdo gúdo tɔn lɛ́ mɛ ɔ, mi ná mɔ nukúnnú jɛ mɛ céɖécéɖé.
21 Un sɛ́ gbeyíɖɔ lɛ́ dó ǎ, có yě kán wezun.
Un ɖɔ xó nú yě ǎ, có yě wa gbeyíɖɔzɔ́.
22 Amɔ̌, ényí yě ko nɔ mɛ e vɛ́ xá mì lɛ́ é mɛ wɛ ɔ,yě ná ko bló bɔ togun ce ná se xó ce lɛ́,bo ná ko bló bɔ yě ná lɛ́ kɔ sín ali nyanya jí, lobo jó nǔ nyanya e yě nɔ wa lɛ́ é dó.”
23 “Hwenu e un ɖo akpá mitɔn é kɛ́ɖɛ́ jɛ́n un nyí Mawu a?” wɛ Jexóva ɖɔ, “un lɛ́ nyí Mawu hwenu e un ɖo zɔ dó mi é ǎ cé?”
24 “Gbɛtɔ́ ka sixú hwlá éɖée dó nɔtɛn e ɖo nǔglɔ́ é bɔ mimɔ ɛ ná gló mì a?” wɛ Jexóva ɖɔ.
“Nǔɖé sixú hwlá dó mì ɖo jǐxwé, alǒ ɖo ayǐkúngban jí wɛ a?” wɛ Jexóva ɖɔ.
25 “Un se bɔ gbeyíɖɔ e nɔ ɖó adingban ɖo gbeyíɖɔzɔ́ yětɔn kɔn ɖo nyǐkɔ ce mɛ lɛ́ é nɔ ɖɔ: ‘Un kú dlɔ̌ ɖokpó! Un kú dlɔ̌ ɖokpó!’
26 Káká jɛ hwetɛ́nu gbeyíɖɔ lɛ́ ná fɔ́n bo ná ɖo adingban ɖó wɛ ɖo gbeyíɖɔzɔ́ yětɔn kɔn yi jɛ? Gbeyíɖɔ e nɔ ɖɔ mɛblɛ́blɛ́xó e ɖo ayi yěɖésúnɔ tɔn mɛ lɛ́ é wɛ nú yě.
27 Yě ba ná bló bɔ togun ce ná wɔn nyǐkɔ ce gbɔn dlɔ̌ e yě nɔ ɖɔ nú yěɖée lɛ́ é gblamɛ, lěe é sín Baálu wú bɔ tɔ́ yětɔn lɛ́ wɔn nyǐkɔ ce gbɔn é ɖɔhun.
28 Gbeyíɖɔ e kú dlɔ̌ é ní ɖɔ dlɔ̌ ɔ, amɔ̌, mɛ e sí xó ce ɖe é ɖó ná ɖɔ xó ce nǔgbó tɔn.”
“Étɛ́ nǔywɛ́ kpó nǔkún kpó ka ɖó ɖo bǔ?” wɛ Jexóva ɖɔ.
29 “Xó ce cí myɔ ɖɔhun ǎ cé?” wɛ Jexóva ɖɔ, “é cí zǔnkpé e è nɔ dó gba awǐnnya hánnyá ná é ɖɔhun ǎ cé?”
30 “Énɛ́ wú ɔ, éɖíe, un ná húzú kpan nukɔn gbeyíɖɔ lɛ́,” wɛ Jexóva ɖɔ, “yě mɛ ɖěɖěe nɔ fin xó ce lɛ́ ɖo yěɖée lɛ́ gɔ́n lɛ́ é.”
31 “Éɖíe, un ná húzú kpan nukɔn gbeyíɖɔ lɛ́,” wɛ Jexóva ɖɔ, “yě mɛ ɖěɖěe nɔ zán ɖɛ̌ yětɔn bo nɔ ɖɔ: ‘É ɖɔ!’ lɛ́ é.”
32 “Éɖíe, un ná húzú kpan nukɔn gbeyíɖɔ e nɔ ɖɔ dlɔ̌ adingban tɔn lɛ́ é,” wɛ Jexóva ɖɔ, “yě mɛ ɖěɖěe nɔ ɖɔ dlɔ̌ énɛ́ lɛ́, bo nɔ bló bɔ togun ce nɔ zɛ gbě ɖó adingban yětɔn lɛ́ kpó nugo e yě nɔ yí lɛ́ é kpó wú é.”
“Amɔ̌, un sɛ́ yě dó, alǒ ɖe gbe nú yě ǎ. Énɛ́ wú ɔ, yě ná hɛn le ɖě wá nú togun élɔ́ ǎ,” wɛ Jexóva ɖɔ.
33 “Ényí togun élɔ́, alǒ gbeyíɖɔ ɖé, alǒ vɔ̌sánúxwlémawutɔ́ ɖé kanbyɔ́ we ɖɔ: ‘Étɛ́ ka nyí Jexóva sín agban?’* a jí ɔ, a ɖó ná ɖɔ nú yě ɖɔ: ‘“Midɛɛ lɛ́ wɛ nyí agban ɔ! Bɔ un ná ɖe mi sín kɔ,” wɛ Jexóva ɖɔ.’
34 Gbeyíɖɔ, alǒ vɔ̌sánúxwlémawutɔ́, alǒ mɛ e nɔ ɖɔ: ‘Jexóva sín agban* ɖíe!’ é ɔ, un ná húzú kpan nukɔn mɛ énɛ́ kpó xwédo tɔn kpó.
35 Nǔ e mi mɛ ɖokpó ɖokpó ɖo ɖiɖɔ nú nɔzo mitɔn kpó nɔví mitɔn kpó wɛ é ɖíe: ‘Xósin tɛ́ Jexóva ka ná? Étɛ́ Jexóva ka ɖɔ?’
36 Amɔ̌, mi sɔ́ ɖó ná ɖɔ Jexóva sín agban* sín xó ɖě ǎ, ɖó xó mi mɛ ɖokpó ɖokpó tɔn wɛ nyí agban ɔ,* bɔ mi ɖyɔ́ Mawu gbɛɖe ɔ, Jexóva ahwankpá lɛ́ tɔn, Mawu mǐtɔn sín xó lɛ́.
37 “Nǔ e a ná ɖɔ nú gbeyíɖɔ ɔ é ɖíe: ‘Xósin tɛ́ Jexóva ka ná we? Xó tɛ́ Jexóva ka ɖɔ?
38 Ényí mi kpo ɖo “Jexóva sín agban!”* ɖɔ wɛ ɔ, nǔ e Jexóva ɖɔ é ɖíe: “Ðó un ɖɔ nú mi ɖɔ: ‘Mi ɖó ná ɖɔ “Jexóva sín agban!”* ǎ, bɔ mi ka nɔ ɖɔ: ‘Xó élɔ́ wɛ nyí Jexóva sín agban!’* wútu ɔ,’”
39 éɖíe, un ná sɔ́ mi dó jǐ, bo ná da mi dó gbě sín nukún ce mɛ, mi kpó toxo e un ná mi kpó tɔ́gbó mitɔn lɛ́ kpó bǐ é kpó.
40 Un ná kɔ́n wi mitɔn, bo ná dó winnyá mi bɔ è ná wɔn gbeɖé ǎ.”’”
Tínmɛ e ɖo do lɛ́ é
^ Alǒ “ná ɖu gǔ.”
^ Alǒ “mɛ e ma nɔ nɔ gbejí nú Mawu ǎ lɛ́ é.”
^ Alǒ “gǔfɔ́ndómawujítɔ́.”
^ Blǔju tɔn, “ná hlɔ̌nhlɔ́n nǔnyanyawatɔ́ lɛ́ sín alɔ.”
^ Alǒ “Nukúnɖíɖó vɔ̌tɔ́ lɛ́ ná mi wɛ yě ɖe.”
^ Alǒ “wɛn e kpɛn mɛ é.” Tínmɛ we wɛ xókwín ebléegbe tɔn ɔ ɖó: “xó agbɔ̌nnɔ e gosín Mawu gɔ́n é” alǒ “nǔ e kpɛn é.”
^ Alǒ “wɛn e kpɛn mɛ é.”
^ Alǒ “wɛn e kpɛn mɛ é.”
^ Alǒ “wɛn e kpɛn mɛ é.”
^ Alǒ “wɛn e kpɛn mɛ é.”
^ Alǒ “wɛn e kpɛn mɛ é.”
^ Alǒ “wɛn e kpɛn mɛ é.”
