Jelemíi 17:1-27
17 “È sɔ́ wětín gannɔ dó wlán hwɛ e Judáa hu lɛ́ é ná.
È sɔ́ nǔwlánnú diamáanɔ dó wlán dó ayi yětɔn lɛ́ mɛ,bo wlán dó vɔ̌sákpe yětɔn lɛ́ sín zo lɛ́ wú,
2 hwenu e vǐ súnnu yětɔn lɛ́ ɖo vɔ̌sákpe yětɔn lɛ́ kpó dotín ɖeɖóvo* yětɔn lɛ́ kpó flín wɛ,ɖo atín e vun ganjí é kpá, ɖo só e yi jǐ lɛ́ é jí,
3 ɖo só ɖaxó lɛ́ jí ɖo gletoxo ɔ mɛ é.
Un ná ná nǔɖókan towe lɛ́ kpó dɔkun towe lɛ́ bǐ kpó nǔ e è vɔ to bo bɛ́ lɛ́ é ɖɔhun.Ɛɛn, un ná ná nɔtɛn ɖeɖóvo towe lɛ́ ɖó hwɛ e a hu gbɔn to towe mɛ lɛ́ é wú.
4 Hwiɖésúnɔ ná jló bo ná gbɛ́ gǔ e un ná we é.
Un ná bló bɔ a ná wa mɛsɛntɔ́zɔ́ nú kɛntɔ́ towe lɛ́ ɖo to e a ma tuun ǎ é mɛ,ɖó a dó xomɛsin nú mì syɛ́nsyɛ́n myɔ wɛ è flɔ́ ɖɔhun.*
É ná ji káká sɔ́yi.”
5 Nǔ e Jexóva ɖɔ é ɖíe:
“Nu wɛ è dó mɛ* e nɔ ɖeji dó gbɛtɔ́ yǎyá wú é,ɛɛn, mɛ e nɔ gán jɛ hlɔ̌nhlɔ́n gbɛtɔ́ tɔn wú é,mɛ e sín ayi ma ɖo Jexóva jí ǎ é.
6 É ná wá cí atín e ɖo éɖokpó ɖo gbětótló mɛ é ɖɔhun.
Ényí nǔ ɖagbe ja ɔ, é ná nɔ mɔ ǎ,loɔ, é ná nɔ fí e xú ɖo gbětótló mɛ lɛ́ é,é ná nɔ jɛ sín ayǐkúngban e jí mɛ ɖě ma sixú nɔ ǎ é jí.
7 È ná kɔn nyɔ̌ná dó mɛ* e nɔ gán jɛ Jexóva wú,bo nɔ ɖeji dó Jexóva wú é jí.
8 É ná cí atín e è tun ɖó tɔ tó,bɔ é nyi ɖɔ tɔn lɛ́ dó tɔsisa mɛ é ɖɔhun.
Ényí yǒzo wá ɔ, é ná ɖɔ nǔ ɖě n’i ǎ,loɔ, ama tɔn lɛ́ ná nɔ vun tɛgbɛ.
Bɔ xwe e mɛ akú ná ɖó é ɔ, ado ná hu i ǎ,mɔ̌ jɛ́n é ma ná gɔn sínsɛ́n ná ǎ é nɛ́.
9 Ayi nɔ blɛ́ mɛ* hú nǔ ɖěvo ɖěbǔ, bo ɖo gbesisɔmɛ nú nǔ bǐ.*
Mɛ̌ ka sixú tuun i?
10 Nyɛ Jexóva wɛ nɔ ba do nú ayi,un nɔ gbéjé linlin e ɖo hwlǎhwlá lɛ́ é* kpɔ́n,bo ná dó ná nǔ mɛ ɖokpó ɖokpó sɔgbe xá walɔ tɔn lɛ́,sɔgbe xá sínsɛ́n e azɔ̌ tɔn lɛ́ ná é.
11 Mɛ e nɔ xo dɔkun kplé gbɔn nǔagɔwiwa gblamɛ é,*cí asɔklé e nɔ xo azin e é ma ɖó ǎ é kplé é ɖɔhun.
Dɔkun tɔn ná jó è dó hwenu kpɛɖé gúdo,bɔ ɖo vivɔnu ɔ, ayivɔvúnnánɔ e é nyí é ná jɛ wě.”
12 Fí e mǐ nɔ sɛn Mawu ɖe é ɔ, axɔ́súzinkpo susunɔ ɖé wɛ,bɔ è sɔ́ su sín bǐbɛ́mɛ.
13 Jexóva, nukúnɖíɖó Izlayɛ́li tɔn è,mɛ ɖěɖěe jó we dó lɛ́ é bǐ ná ɖu winnyá.
È ná wlán mɛ ɖěɖěe nɔ fɔ́n gǔ dó jǐ towe* lɛ́ é sín nyǐkɔ dó kɔ́gúdu mɛ,ɖó yě jó Jexóva e nyí jɔtɛn sin e nɔ ná gbɛ mɛ é tɔn é dó.
14 Jexóva è, gbɔ azɔn nú mì, énɛ́ ɔ, azɔn ce ná gbɔ.
Hwlɛ̌n mì, énɛ́ ɔ, è ná hwlɛ́n mì gán,ɖó un nɔ kpa susu nú we.
15 Éɖíe! Nǔ e ɖɔ nú mì wɛ mɛɖé lɛ́ ɖe é ɖíe:
“Fítɛ́ xó Jexóva tɔn ka ɖe?
Ní bo jɛnu!”
16 Amɔ̌ nyɛ ɔ, un gɔn xwixwedó we ǎ, un ka lɛ́ gɔn lɛ̌ngbɔ́nyitɔ́zɔ́ wa ǎ,mɔ̌ jɛ́n un ma ɖó nukún ɖɔ awěxomɛzán ní wá ǎ é nɛ́.
A tuun nǔ e nufló ce lɛ́ ɖɔ é ganjí;bǐ wɛ jɛnu ɖo nukún towe mɛ!
17 Ma bló bónú xɛsi ɖaxó ní jɛ jǐ ce ó.
Hwi wɛ nyí bibɛtɛn ce ɖo awěxomɛzángbe.
18 Yadónúmɛtɔ́ ce lɛ́ ní ɖu winnyá,amɔ̌, ma lɔn nú nyɛ ɖu winnyá ó.
Xɛsi ɖaxó ní jɛ yě jí,amɔ̌, ma lɔn nú xɛsi ɖaxó ní jɛ nyɛ jí ó.
Blǒ bónú azǎn e gbe awě ná xo yě é ní wá,gbǐdí yě, bo sú kún dó nú yě bǐ mlɛ́mlɛ́.*
19 Nǔ e Jexóva ɖɔ nú mì é ɖíe: “Yi, bo yi nɔ te ɖo vǐ súnnu togun ɔ tɔn sín hɔntogbó, éé nu axɔ́sú Judáa tɔn lɛ́ nɔ gbɔn bo nɔ byɔ́ mɛ, bo nɔ tɔ́n é ta, bo nɔ te ɖo hɔntogbó Jeluzalɛ́mu tɔn lɛ́ bǐ ta.
20 A ɖó ná ɖɔ nú yě ɖɔ: ‘Axɔ́sú Judáa tɔn lɛ́, togun Judáa tɔn ɔ bǐ kpó mɛ e nɔ nɔ Jeluzalɛ́mu lɛ́ é bǐ kpó, ɛɛn, mi mɛ e nɔ gbɔn hɔntogbó énɛ́ lɛ́ nu lɛ́ é mi, mi ɖótó xó e Jexóva ɖɔ é.
21 Nǔ e Jexóva ɖɔ é ɖíe: “Mi cɔ́ miɖée,* bo ma dó kɔ agban ɖěbǔ mɛ ɖo gbɔjɛzángbe, alǒ hɛn agban ɖěbǔ gbɔn hɔntogbó Jeluzalɛ́mu tɔn lɛ́ nu byɔ́ mɛ ó.
22 Mi ɖó ná ɖe agban ɖěbǔ sín xwé mitɔn lɛ́ gbe ɖo gbɔjɛzángbe ǎ; mi ɖó ná wa azɔ̌ ɖěbǔ ǎ. Gbɔjɛzán ɔ ní kpo ɖo nǔ mímɛ́ nyí nú mi wɛ lěe un ɖe gbe tɔn nú tɔ́gbó mitɔn lɛ́ gbɔn é.
23 Amɔ̌, yě ɖótó, alǒ tɛ́ tó ǎ, bo lɛ́ gbɛ́ kpó ta syɛ́nsyɛ́n kpó* ɖɔ émí kún ná se tónú, alǒ yí kplɔ́n ó.”’
24 “‘“É ɖo mɔ̌ có, ényí mi se tónú nú mì tɛ́nwín lɛnwín ɔ,” wɛ Jexóva ɖɔ, “ényí mi ma hɛn agban ɖěbǔ byɔ́ toxo élɔ́ mɛ gbɔn hɔntogbó tɔn lɛ́ nu ɖo gbɔjɛzángbe ǎ, bo ma wa azɔ̌ ɖěbǔ ɖo gbɔjɛzán ɔ gbe ǎ dó hɛn ɛ ɖó mǐmɛ́ jí ɔ,
25 axɔ́sú kpó axɔ́ví kpó e jínjɔ́n axɔ́súzinkpo Davídi tɔn jí lɛ́ é lɔ ná byɔ́ toxo élɔ́ mɛ gbɔn hɔntogbó tɔn lɛ́ nu, bo ná zɔn kɛkɛ́ví lɛ́ mɛ, lobo ná xá sɔ́, yě kpó axɔ́ví yětɔn lɛ́ kpó, súnnu Judáa tɔn lɛ́ kpó mɛ e nɔ nɔ Jeluzalɛ́mu lɛ́ é kpó; bɔ gbɛtɔ́ ná nɔ toxo élɔ́ mɛ káká sɔ́yi.
26 Mɛ lɛ́ ná gosín toxo Judáa tɔn lɛ́ mɛ wá, yě ná gosín fí e lɛ́ lɛ̌ dó Jeluzalɛ́mu lɛ́ é, sín Bɛnjamɛ́ɛ to mɛ, sín tɔdo lɛ́ mɛ, sín sókan lɛ́ mɛ, bo ná gosín Nɛgɛ́bu,* bo ná hɛn nǔníná e è nɔ dó blěbú tɔn zo lɛ́ é, vɔ̌sánú lɛ́, nǔníná jinukún tɔn lɛ́, zǎlínkpɔ́n wěwé kpó vɔ̌sánú kúdídó tɔn lɛ́ kpó wá xwé Jexóva tɔn gbe.
27 “‘“Amɔ̌, ényí mi ma se tónú nú mì ǎ ɔ, énɛ́ wɛ nyí ɖɔ, ényí mi ma hɛn gbɔjɛzán ɔ ɖó mǐmɛ́ jí ǎ, bo dó kɔ agban lɛ́ mɛ, lobo hɛn yě byɔ́ Jeluzalɛ́mu gbɔn hɔntogbó lɛ́ nu ɖo gbɔjɛzángbe ɔ, un ná dó hɔntogbó tɔn lɛ́ zo, bɔ é ɖo wɛn ɖɔ atɔxwɛ syɛ́nsyɛ́n Jeluzalɛ́mu tɔn lɛ́ ná ji zo, bɔ è ná xo cí ǎ.”’”
Tínmɛ e ɖo do lɛ́ é
^ Kpɔ́n Xógbe ɖé lɛ́ sín tínmɛ.
^ Alǒ vlafo, “ɖó è flɔ́ we myɔ ɖɔhun ɖo xomɛsin ce mɛ.”
^ Alǒ “mɛ hlɔ̌nhlɔ́nnɔ.”
^ Alǒ “mɛ hlɔ̌nhlɔ́nnɔ.”
^ Alǒ “flú mɛ.”
^ Alǒ vlafo, “bɔ è sixú gbɔ azɔn n’i ǎ.”
^ Alǒ “lěe nǔ cí nú mɛ ɖo gɔngɔn mɛ bǐ lɛ́ é.”
^ Alǒ “bɔ é ma ka nyí kpó hwɛjijɔ kpó ǎ é.”
^ Blǔju tɔn, “jǐ ce,” bo sixú ko ɖo gesí dó Jexóva wɛ.
^ Alǒ “azɔn we.”
^ Alǒ “lǐndɔ̌n mitɔn lɛ́.”
^ Blǔju tɔn, “syɛ́n kɔ yětɔn.”
^ Alǒ “tofɔligbé.”
