Jelemíi 10:1-25
10 Togun Izlayɛ́li tɔn è, mi ɖótó xó e Jexóva ɖɔ dó mi wú é.
2 Nǔ e Jexóva ɖɔ é ɖíe:
“Mi ma kplɔ́n nǔwalɔ akɔta lɛ́ tɔn ó,mi ma ɖi xɛsi nú wuntun jǐnukúnsin tɔn lɛ́,ɖó yě dó xɛsi nú akɔta lɛ́ wútu ó.
3 Ðó nǔwalɔ togun lɛ́ tɔn nyí nǔɖéwanú ǎ.*
Atín zungbó mɛ tɔn e è gbo,bɔ alɔlyɛnzɔ́watɔ́* sɔ́ azɔ̌wanú tɔn dó w’azɔ̌ ɖ’é wú é ɖé kpowun wɛ.
4 Yě nɔ zán kpatágan kpó siká kpó dó ba acɔ́ n’i,bo nɔ zán nǔxwenú kpó hǔnjɛ́n kpó dó hɛn ɛ ɖó te, bónú é ní ma j’ayǐ ó.
5 Xɛblɛ́nú e ɖo kɔnkɔ́nbugle mɛ é ɖɔhun ɔ, yě sixú ɖɔ xó ǎ;sɔ́ wɛ è ɖó ná sɔ́ yě, ɖó yě sixú ɖi zɔnlin ǎ.
mi ma ɖi xɛsi nú yě ó, ɖó yě sixú wa nǔ nyanya ɖě ǎ,mɔ̌ jɛ́n yě ma ka sixú lɛ́ wa nǔ ɖagbe ɖě ǎ é nɛ́.”
6 Jexóva è, mɛ ɖěbǔ cí hwiɖɔhun ǎ.
A d’agba, bɔ nyǐkɔ towe d’agba bo ɖó hlɔ̌nhlɔ́n.
7 Axɔ́sú akɔta lɛ́ tɔn è, mɛ̌ ma ka ɖó ná ɖó sísí e gɔ́ngɔ́n é nú we ǎ? A jɛxá ǎ cé?Ðó, ɖo nǔnywɛ́tɔ́ e ɖo akɔta lɛ́ mɛ lɛ́ é bǐ kpó axɔ́súɖuto yětɔn lɛ́ bǐ kpó mɛ ɔ,mɛ ɖěbǔ cí hwiɖɔhun ǎ.
8 Yě mɛ ɖě nɔ lin tamɛ ǎ, bɔ yě mɛ bǐ lɛ́ nyí xlonɔ.
Atín ná kplɔ́n nǔ mɛ sín xó ɔ nyi ta fí ɖě ǎ.*
9 È nɔ hɛn kpatágan gbajagbaja sín Taasísi, bo nɔ hɛn siká sín Ufázi,alɔlyɛnzɔ́watɔ́* sín azɔ̌ wɛ, bo nyí azɔ̌ e gankɔntɔ́ sɔ́ alɔ tɔn lɛ́ dó wa é.
Kan e ɖó sinmɛ fɛ́sinnɔ é kpó lɛ̌ngbɔ́fún vɔvɔ e wi d’é mɛ é kpó wɛ è zán dó bló awu yětɔn lɛ́ ná.
Azɔ̌watɔ́ alɔsekpɛ́nnánɔ lɛ́ wɛ bló bǒcyɔ énɛ́ lɛ́ bǐ.
10 Amɔ̌, Mawu wɛ Jexóva nyí nǔgbó.
É wɛ nyí Mawu gbɛɖe ɔ, bo nyí Axɔ́sú mavɔmavɔ ɔ.
Ðó xomɛsin tɔn wútu ɔ, ayǐkúngban ɔ ná dán wǔ,bɔ akɔta lɛ́ ɖě ná dɛ ɖo xomɛsin tɔn syɛ́nsyɛ́n ɔ nu ǎ.
11 * Nǔ e mi ɖó ná ɖɔ nú yě é ɖíe:
“Nǔmɛsɛn e ma bló jǐnukúnsin kpó ayǐkúngban kpó ǎ lɛ́ éná dɔn ɖo ayǐkúngban ɔ jí, bo ná lɛ́ dɔn ɖo hwe glɔ́.”
12 É wɛ nyí Mɛ e bló ayǐkúngban ɔ gbɔn hlɔ̌nhlɔ́n tɔn gblamɛ é,Mɛ e ɖó ayǐkúngban e nɔ ná sínsɛ́n é gbɔn nǔnywɛ́ tɔn gblamɛ é,bo lɛ́ nyí Mɛ e vlɔ́n jǐnukúnsin gbɔn nukúnnúmɔjɛnǔmɛ tɔn gblamɛ é.
13 Ényí é bló bónú è se gbe tɔn ɔ,sin e ɖo jǐnukúnsin lɛ́ é nɔ xo zǐn,bɔ é nɔ bló bɔ akpɔ́kpɔ́* nɔ sí te sín fí e ayǐkúngban ɔ kponu ɖó lɛ́ é.
É nɔ bló bɔ jǐ nɔ kɛwun* hwenu e jǐ ɖo jija wɛ é,bo nɔ ɖe jɔhɔn tɔ́n sín sɛxwetɛn tɔn lɛ́.
14 Mɛ ɖěbǔ nɔ lin tamɛ cóbó nɔ wa nǔ ǎ, bɔ yě nɔ lɛ́ wa nǔ kpó nǔtuuntuun kpó ǎ.
È ná dó winnyá gankɔntɔ́ lɛ́ bǐ ɖó bǒcyɔ kpikpa ɔ wútu;ɖó bǒcyɔ tɔn e è sɔ́ gan dó bló é* nyí nǔɖéwanú ǎ,bɔ funfún* ɖě ɖo bǒcyɔ énɛ́ lɛ́ mɛ ǎ.
15 Yě nyí nǔɖéwanú ǎ,* azɔ̌ e è sixú ɖɔ slamɛ wú é wɛ yě nyí.
Ényí azǎn e gbe yě ná ɖó gbe é su ɔ, yě ná dɔn.
16 Mǐmá Jakɔ́bu tɔn cí nǔ énɛ́ lɛ́ ɖɔhun ǎ,ɖó é wɛ nyí Mɛ e bló nǔ bǐ é,bɔ Izlayɛ́li nyí gǔ tɔn sín kpo.
Jexóva ahwankpá lɛ́ tɔn wɛ nyǐkɔ tɔn nɔ nyí.
17 Hwi nyɔ̌nu e è ján go dó é,bɛ̌ nǔɖókan towe lɛ́ sín kɔ́mɛ.
18 Ðó nǔ e Jexóva ɖɔ é ɖíe:
“Un ɖo mɛ e nɔ nɔ to ɔ mɛ lɛ́ é nya* sín to ɔ mɛ wɛ ɖo hwe élɔ́ nu din,bɔ un ná bló bɔ yě ná tuun nǔ e wǔvɛ́ nyí é.”
19 Heelú mì, ɖó azɔn ce* wú!
Akpa ce sixú kú ǎ.
Bɔ un ɖɔ: “É ɖo wɛn ɖɔ azɔn ce wɛ, bɔ un ɖó ná nɔ nu.
20 È gba goxɔ ce hánnyá, bo wɛ́n goxɔ ce sín kan lɛ́.
Vǐ ce lɛ́ jó mì dó, yě sɔ́ tíin ǎ.
Mɛ ɖěbǔ sɔ́ kpo bo ná vlɔ́n goxɔ ce, alǒ vlɔ́n goxɔ ce sín avɔ lɛ́ ǎ.
21 Ðó lɛ̌ngbɔ́nyitɔ́ lɛ́ wa xlonɔnú,gɔ́ ná ɔ, yě kan nǔ byɔ́ Jexóva ǎ.
Nǔ e wú yě ma wa nǔ kpó nukúnnúmɔjɛnǔmɛ kpó ǎ é nɛ́,bɔ lɛ̌ngbɔ́hwan yětɔn bǐ gba dó.”
22 Mi ɖótó! Gbeɖíɖó ɖé wɛ! É ja!
Zǐngídi ɖaxó ɖé wɛ, bo gosín to e ɖo totaligbé é mɛ,bo ná bló bɔ toxo Judáa tɔn lɛ́ ná jɛ vɔ̌, bo ná húzú fí e cukú gbě tɔn lɛ́ nɔ nɔ é.
23 Jexóva è, un tuun ganjí ɖɔ gbɛtɔ́ kún sixú xlɛ́ ali éɖée ó.
Gbɛtɔ́ e ɖo zɔnlin ɖi wɛ é tlɛ sixú xlɛ́ ali afɔ éɖésúnɔ tɔn ǎ.
24 Jexóva è, gbɛ̌ nǔ nú mì kpó hwɛjijɔ kpó,amɔ̌, ní ma nyí ɖo xomɛsin towe mɛ ó, é ma nyí mɔ̌ ǎ ɔ, a táá sú kún dó nú mì.
25 Kɔn xomɛsin towe dó akɔta e ma nɔ ké ya nú we ǎ lɛ́ é jí,bo kɔn dó xwédo e ma nɔ ylɔ́ nyǐkɔ towe ǎ lɛ́ é jí.
Ðó yě vúnvún Jakɔ́bu,ɛɛn, yě vúnvún i káká bo sú kún tɔn dó,yě bló bɔ to tɔn jɛ vɔ̌.
Tínmɛ e ɖo do lɛ́ é
^ Alǒ “nǔ yǎyá.”
^ Alǒ “aɖawunzɔ́watɔ́.”
^ Alǒ “nǔ yǎyá wɛ.”
^ Alǒ “aɖawunzɔ́watɔ́.”
^ Alámugbe mɛ wɛ è wlán wěf. 11gɔ́ ɔ dó ɖo gbe dodó ɔ mɛ.
^ Alǒ “azizɔ.”
^ Alǒ vlafo, “nɔ ɖe sinhwín nú jǐ.”
^ Alǒ “bǒcyɔ tɔn e è xo zo dó é.”
^ Blǔju tɔn, “gbigbɔ.”
^ Alǒ “nyí nǔ yǎyá.”
^ Alǒ “da dó gbě.”
^ Alǒ “xú ce e wɛ́n é.”
