Ezayíi 11:1-16
11 Alaví ɖé ná tɔ́n sín atínta Jɛsée tɔn mɛ,bɔ kun e ná tɔ́n sín ɖɔ tɔn lɛ́ mɛ é ná ná sínsɛ́n.
2 Bɔ gbigbɔ Jexóva tɔn ná wá bo ná nɔ jǐ tɔn,gbigbɔ nǔnywɛ́ kpó nukúnnúmɔjɛnǔmɛ kpó tɔn,gbigbɔ wěɖexámɛ kpó hlɔ̌nhlɔ́n kpó tɔn,gbigbɔ nǔtuuntuun kpó sísí e gɔ́ngɔ́n é ɖíɖó nú Jexóva kpó tɔn.
3 Sísí e gɔ́ngɔ́n é ɖíɖó nú Jexóva ná nɔ dó xomɛhunhun n’i.
É ná zɔn dó nǔ e nukún tɔn mɔ lɛ́ é jí dó ɖɔ hwɛ xá mɛ ǎ,mɔ̌ jɛ́n é ma ná zɔn dó nǔ e é se lɛ́ é jí kpowun dó kɛ nu dó nǔ wú nú mɛ ǎ é nɛ́.
4 É ná ɖɔ hwɛ xá mɛmaɖómɛɖé kpó hwɛjijɔ* kpó,é ná kɛ nu dó nǔ wú nú mɛ dó mɛɖéesɔ́hwetɔ́ e ɖo ayǐkúngban ɔ jí lɛ́ é tamɛ kpó nǔjlɔ́jlɔ́wiwa kpó.
É ná xo ayǐkúngban ɔ kpó kpo e ɖo nu tɔn mɛ é kpó,bo ná zán xó tɔn lɛ́* dó hu mɛdídá ná.
5 Nǔjlɔ́jlɔ́wiwa ná nyí gǒjíblánú ɖo alin tɔn,bɔ gbejíninɔ ná nyí gǒjíblánú ɖo alin tɔn.
6 Hla ná nɔ kpɔ́ xá lɛ̌ngbɔ́ví nú hwenu ɖé,bɔ gbɔ̌ví kpó kpɔ kpó ná mlɔ́ kpɔ́,nyibúví kpó kinnikínní* kpó, kpódó kanlin e dó jǒ é bǐ kpán ná nɔ kpɔ́;*súnnuví ɖé wɛ ná kplá yě.
7 Nyibú kpó lɔnmɔ kpó ná ɖu nǔ ɖó kpɔ́,bɔ vǐ yětɔn lɛ́ ná mlɔ́ kpɔ́.
Kinnikínní ná ɖu gběhan nyibú ɖɔhun.
8 Vǐ e ɖo anɔ̌ nu é ná d’ayihún ɖo do e mɛ xlibó nɔ nɔ é nu,bɔ vǐ e è ɖe anɔ̌ ná é ná sɔ́ alɔ tɔn ɖó do e mɛ dan aɖǐvɛ́nɔ nɔ nɔ é nu.
9 È ná wa nǔ nyanya ɖěbǔ,alǒ hɛn nǔ ɖěbǔ gblé ɖo só mímɛ́ ce blěbú jí ǎ,ɖó é ɖo wɛn ɖɔ nǔtuuntuun dó Jexóva wú ná gɔ́ ayǐkúngban ɔ jí,lěe sin cyɔ́n xuzan jí gbɔn é ɖɔhun.
10 Ðo azǎn énɛ́ gbe ɔ, ɖɔ Jɛsée tɔn ná sí te wuntun* ɖé ɖɔhun nú togun lɛ́.
Akɔta lɛ́ ná ba wěɖexámɛ ɖo gɔ̌n tɔn,*bɔ gbɔjɛtɛn tɔn ná ɖó susu.
11 Ðo azǎn énɛ́ gbe ɔ, Jexóva ná lɛ́ dlɛ́n alɔ tɔn azɔn wegɔ́ ɔ, bo ná bɛ́ mɛ e kpo ɖo togun tɔn mɛ bɔ è jó dó nyi Asilíi, Ejípu, Patlɔ́si, Kúci, Elámu, Cináa,* Hamáti kpó xu ɔ sín tɔtɛ́ntinto kpó mɛ lɛ́ é lɛ́ kɔ.
12 É ná sɔ́ wuntun* ɖé dó jǐ nú akɔta lɛ́, bo ná xo Izlayɛ́li sín mɛ e ɖo gbějá gbějá lɛ́ é kplé, bo ná xo Judáa sín mɛ e fúnfún kpé lɛ́ é kplé sín wɛ̌kɛ́zo ɛnɛ ayǐkúngban ɔ tɔn lɛ́ mɛ.
13 Wǔhwinhwan Eflayímu tɔn ná yi xɔ,bɔ mɛ ɖěɖěe nɔ ɖe kɛnfɔ xá Judáa lɛ́ é ɔ, è ná hu yě.
Eflayímu ná nɔ hwan wǔ Judáa ǎ,mɔ̌ jɛ́n Judáa ma ná nɔ ɖe kɛnfɔ xá Eflayímu ǎ é nɛ́.
14 Yě ná wá Filisitɛ́ɛn lɛ́ sín só ɖaxó lɛ́ sín akpá ɖokpó xwé* ajijimɛ ɖo gbadahwe jí;yě ná nɔ kpɔ́ bo ná bɛ́ togun e ɖo zǎnzǎnhwe jí é sín nǔɖókan lɛ́.
Yě ná dlɛ́n alɔ yětɔn bo ná wa nǔ dó Edɔ́mu kpó Mɔwábu kpó wú,*Amɔníti lɛ́ ná húzú mɛ e jí è ná kp’acɛ dó lɛ́ é.
15 Jexóva ná má Ejípu xu ɔ sín akpáxwé* ɖé,*bo ná húnhún alɔ tɔn dó Tɔsisa ɔ* jí.
É ná xo tɔsisa ɔ sín tɔhwín tɛ́nwe lɛ́* kpó funfún* tɔn zozo ɔ kpó,bo ná bló bɔ mɛ lɛ́ ná ɖo afɔkpa mɛ bo ná ɖi zɔnlin gbɔn mɛ dín.
16 Ali ɖaxó ɖokpó ná gosín Asilíi nú togun tɔn e kpo bɔ è jó dó é,lěe é nyí gbɔn nú Izlayɛ́li ɖo azǎn e gbe é tɔ́n sín Ejípu to mɛ é ɖɔhun.
Tínmɛ e ɖo do lɛ́ é
^ Alǒ “nǔjlɔ́jlɔ́wiwa.”
^ Alǒ “gbigbɔ tɔn.”
^ Alǒ “kinnikínní wínnyáwínnyá e ɖó kɔjafún é.”
^ Alǒ vlafo, “nyibúsú wínnyáwínnyá kpó kinnikínní kpó ná ɖu nǔ ɖó kpɔ́.”
^ Alǒ “asyákpo.”
^ Alǒ “Akɔta lɛ́ ná ba ɛ.”
^ Énɛ́ wɛ nyí, “Babilɔníi.”
^ Alǒ “asyákpo.”
^ Blǔju tɔn, “abɔ̌ta.”
^ Alǒ “ná vlɔ́n kan nú hlɔ̌nhlɔ́n yětɔn dó Edɔ́mu kpó Mɔwábu kpó jí.”
^ Blǔju tɔn, “ɖɛ̌.”
^ Alǒ vlafo, “Jexóva ná bló bɔ xu ɔ sín akpáxwé ɖé ná xú.”
^ Énɛ́ wɛ nyí, “Efláti tɔ ɔ.”
^ Alǒ vlafo, “É ná má tɔsisa ɔ ɖó tɔhwín tɛ́nwe.”
^ Alǒ “gbigbɔ.”
