Xwewu xwewu ɔ, è nɔ ylɔ́ mɛ e ɖò sinsɛnzɔ́ hwebǐnu tɔn bǔnɔ mɛ gbɔn gbɛ̀ ɔ bǐ mɛ lɛ é alɔsɛ́xwi bǔ ɖé, bonu ye na yì Wemaxɔmɛ Biblu Kpinkplɔn Watchtower Galadi Tɔn e è nɔ bló ɖò Nɔtɛn Wema Kplɔnkplɔn Tɔn Watchtower Tɔn ɖò Patterson ɖò New York é. a Ðò wemaxɔmɛ enɛ ɔ, wemaxɔmɛví lɛ nɔ kplɔ́n lee alɔ na bí nú ye ɖò azɔ̌ vovo e è nɔ sɔ́ d’así nú ye ɖò tutoblonunu Jehovah tɔn mɛ lɛ é d’eji gbɔn é. Azɔ̌kplɔnmɛ enɛ nɔ d’alɔ ye bɔ ye nɔ na hlɔnhlɔn agun lɛ kpo alaxɔ lɛ kpo e gbɔn gbɛ̀ ɔ mɛ lɛ é, bo nɔ lɛ bló bɔ ye nɔ lidǒ.

 Galadi ɔ, wemaxɔmɛ ɖé wɛ é nyí nú mɛ e gosin gbɛ̀ ɔ bǐ mɛ lɛ é nǔgbo. Ði kpɔ́ndéwú ɔ, ɖò klási 147gɔ́ e wá yì ɖò 2019 é mɛ ɔ, wemaxɔmɛví 56 wɛ wá bo gosin tò 29 mɛ. Wemaxɔmɛví ɖěɖee nɔ yì Galadi lɛ é nɔ ko ɖò sinsɛnzɔ́ hwebǐnu tɔn bǔnɔ ɖé lɛ mɛ, ɖi mɛ e nɔ w’azɔ̌ ɖò Betɛli lɛ é, nukúnkpénuwutɔ́ lɛdo tɔn lɛ, mɛsɛ́dó lɛ, alǒ gbexosin-alijitɔ́ titewungbe lɛ.

 È nɔ ko ɖò nǔ sɔ́ nú klási ɔ wɛ xóxó cobɔ akpáxwé nukɔntɔn klási ɔ tɔn nɔ bɛ́. Ði kpɔ́ndéwú ɔ, Azɔ̌xɔsa Tomɛyiyi Tɔn Hɔ̌nkan Gbɛ̀ ɔ Tɔn Mǐtɔn tɔn nɔ xɔ tikée jɔmɛhun didó tɔn lɛ (billets d’avion) nú mɛ ɖěɖee na wá wemaxɔmɛ ɔ lɛ é. Nú klási 147gɔ́ ɔ, bonu è má akwɛ e wemaxɔmɛví lɛ na zán dó wá Patterson bo lɛ́ lɛkɔ lɛ é ɖó zɛ̌nzɛ̌n ɔ, ye mɛ ɖokpo ɖokpo tɔn na bló ɖɔ̌la Amɛlika tɔn 1 075. Wemaxɔmɛví e gosin Îles Salomon lɛ é ɖó na dó jɔmɛhun vovo ɛnɛ cobo na wá Patterson, bo na lɛ́ dó vovo atɔn cobo na lɛkɔ yì xwé. Kilomɛtlu e ye bló é bǐ kplékplé bló 35 400! Jɔmɛhun didó enɛ lɛ bǐ sín akwɛ bló ɖɔ̌la Amɛlika tɔn 2 300 nú wemaxɔmɛví ɖokpo ɖokpo. Bo na dó nyi alɔ nú akwɛ wósúwósú zinzán ɔ, Azɔ̌xɔsa Tomɛyiyi Tɔn Hɔ̌nkan Gbɛ̀ ɔ Tɔn Mǐtɔn tɔn nɔ zán tuto ɔdinatɛ́ɛ jí tɔn dó ba tikée ɖěɖee akwɛ yetɔn kpɔ́n te lɛ é. Nú è na bo tlɛ ko xɔ tikée lɛ ɔ, tuto ɔdinatɛ́ɛ jí tɔn ɔ nɔ zán aklunɔzán gbla gegě kpo sun gegě kpo bo nɔ kpò ɖò ɖěɖee sín akwɛ na kpɔ́n te hugǎn lɛ é ba wɛ. Azɔ̌xɔsa ɔ nɔ lɛ́ zán jɔmɛhun didó sín ajɔ e è nɔ na lɛ é dó xɔ tikée e è na dó dó jɔmɛhun na lɛ é.

 Wemaxɔmɛví gegě tíìn bo ɖó na ɖó visa cobo na wá États-Unis. Bo na dó kpé enɛ wu ɔ, Azɔ̌xɔsa Hwɛɖiɖɔ Tɔn Hɔ̌nkan Gbɛ̀ ɔ Tɔn Mǐtɔn tɔn nɔ d’alɔ ye bɔ ye nɔ mɔ visa wema kplɔnkplɔn tɔn. Nú è má wema lɛ xixokplé sín akwɛ kpo visa ɔ ɖesu sín akwɛ kpo ɖó zɛ̌nzɛ̌n ɔ, é bló ɖɔ̌la Amɛlika tɔn 510 nú wemaxɔmɛví ɖokpo ɖokpo.

 Nɛ̌ mǐ ka nɔ ɖu azɔ̌ e è nɔ kplɔ́n wemaxɔmɛví enɛ lɛ é sín lè gbɔn? Hendra Gunawan nyí mɛxo agun tɔn ɖé ɖò Tofɔligbé-Zǎnzǎnhweji Azíi tɔn. É ɖò agun e mɛ asú kpo asì kpo e yí kúnnuɖewema Galadi tɔn é ɖé ɖè é. É ɖɔ: “Ð’ayǐ ɔ, gbexosin-alijitɔ́ hwebǐnu tɔn ɖě ɖò agun mǐtɔn mɛ ǎ. Amɔ̌, ee ye wá é ɔ, kanɖodónǔwu yetɔn kpo gbigbɔ mɛɖéezejo tɔn yetɔn kpo sísɛ́ mɛ gegě bɔ ye wá gbeta ɔ kɔn bo bɛ́ gbexosin-alijitɔ́zɔ́. Nukɔnmɛ ɔ, nɔví nyɔnu ɖé ɖò agun mǐtɔn mɛ, bo tlɛ yì Wemaxɔmɛ nú Wɛnɖagbejlatɔ́ Axɔ́suɖuto ɔ tɔn lɛ!”

 Sergio Panjaitan nɔ w’azɔ̌ ɖó kpɔ́ xá mɛ ɖěɖee yí kúnnuɖewema Galadi tɔn lɛ é ɖò Betɛli ɖé mɛ ɖò Tofɔligbé-Zǎnzǎnhweji Azíi tɔn. É ɖɔ: “Azɔ̌ e è kplɔ́n ye é nyí nyɔna nú yeɖokponɔ ɖé kɛɖɛ ǎ; é lɛ́ nyí nyɔna ɖé nú mǐ lɔmɔ̌. Nǔ gegě wɛ ye kplɔ́n! É ka nɔ sín enɛ wu bonu ye nɔ sɔ́ yeɖée d’aga ǎ, é nyɔ́ wà ɔ, ye nɔ má nǔ e ye kplɔ́n lɛ é xá mɛ ɖevo lɛ. Enɛ nɔ dó wusyɛn lanmɛ nú mǐ, bɔ mǐ lɔ nɔ wá dó wusyɛn lanmɛ nú mɛ ɖevo lɛ.”

 Nɛ̌ è ka nɔ sú akwɛzinzan wemaxɔmɛ enɛ tɔn lɛ sín dò gbɔn? Nǔ e è nɔ na dó nɔ gudo nú azɔ̌ e wà wɛ mǐ ɖè gbɔn gbɛ̀ ɔ bǐ mɛ lɛ é wɛ nɔ nyí tɔn, bɔ wlɛnwín e ɖò donate.jw.org jí lɛ é wɛ è zán dó na nǔ enɛ lɛ gegě. É na cɛ́ nú mi, nú alɔhundónanǔmɛ mǐtɔn. É nɔ nɔ gudo nú wemaxɔmɛ enɛ e wemaxɔmɛví lɛ nɔ gosin gbɛ̀ ɔ bǐ mɛ bo nɔ wá é.