“‘Un tuun linlin e ɖó nú mi wɛ un ɖe lɛ́ é,’ wɛ Jexóva a ɖɔ, ‘linlin fífá tɔn lɛ́ wɛ, é nyí awěxomɛ tɔn lɛ́ ǎ, bo ná dó ná mi sɔgúdo ɖagbe ɖé kpó nukúnɖíɖó ɖé kpó.’”—Jelemíi 29:11, Biblu gbɛ yɔ̌yɔ́ ɔ tɔn.

 “‘Un tuun tuto e un sɔ́ ɖó te nú mi é,’ wɛ AKLÚNƆ ɖɔ, ‘tuto bo ná dó dɔkun nú mi, é nyí bo ná wa nǔ dó mi wú ǎ, tuto bo ná ná nukúnɖíɖó kpó sɔgúdo kpó mi.’”—Jelemíi 29:11, New International Version.

Tínmɛ Jelemíi 29:11 tɔn

 Jexóva Mawu d’akpá nú mɛsɛntɔ́ tɔn lɛ́ ɖɔ fífá wɛ émí sɔ́ ɖó te nú yě ɖo sɔgúdo. Togun Mawu tɔn hwexónu tɔn wɛ è wlán xó énɛ́ lɛ́ ɖ’ayǐ ná có, xó énɛ́ lɛ́ kpo ɖo linlin e Mawu nɔ ɖó nú mǐ ɖo égbé é xlɛ́ wɛ. É wɛ nyí “Mawu e nɔ ná mɛ nukúnɖíɖó é.” (Hlɔ̌manu lɛ́ 15:13) È ná ɖɔ ɔ, é zɔ́n bɔ è wlán akpá mɔ̌hun lɛ́ ɖ’ayǐ nú mǐ bónú “mǐ ní dó sixú ɖó nukún nǔ.”—Hlɔ̌manu lɛ́ 15:4.

Nǔ e lɛ́ lɛ̌ dó Jelemíi 29:11 lɛ́ é

 Xó énɛ́ lɛ́ ɔ, Izlayɛ́li ví e è wlí kannumɔ yětɔn sín Jeluzalɛ́mu b yi Babilɔ́nu lɛ́ é wɛ è wlán sɛ́dó. (Jelemíi 29:1) Mawu ɖɔ nú Izlayɛ́li ví e è wlí yi kannumɔgbénu lɛ́ é ɖɔ ɖó yě ná nɔ kannumɔgbénu nú hwenu línlín wútu ɔ, yě ní gbá xwé lɛ́, bló jikpá lɛ́, bo lɛ́ ɖó xwédo lɛ́ ayǐ. (Jelemíi 29:4-9) É ɖo mɔ̌ có, Mawu ɖɔ gɔ́ ná ɖɔ: “Hwenu e xwe 70 e mi ná bló ɖo Babilɔ́nu é ná wá vivɔnu é ɔ, un ná sɔ́ ayi ɖó mi jí, bo ná kplá mi lɛ́ kɔ wá nɔtɛn élɔ́ dó ɖe akpá e un dó é.” (Jelemíi 29:10) Mɔ̌ mɛ ɔ, Mawu ná gǎnjɛwú yě ɖɔ émí kún ná wɔn yě ó, lé nukúnɖíɖó kɔlílɛ́ wá xwé tɔn yětɔn ná jɛnu.—Jelemíi 31:16, 17.

 Mawu ɖe akpá e é dó nú Izlayɛ́li ví lɛ́ é. Lěe é ko ɖɔ ɖ’ayǐ gbɔn é ɔ, axɔ́sú Pɛ́si tɔn Silúsi ɖu ɖo Babilɔ́nu jí. (Ezayíi 45:1, 2; Jelemíi 51:30-32) Énɛ́ gúdo ɔ, Silúsi jó Jwifu lɛ́ bɔ yě lɛ́ kɔ yi to yětɔn mɛ. Yě nɔ kannumɔgbénu nú xwe 70 gúdo é ɔ, yě lɛ́ kɔ yi Jeluzalɛ́mu.—2 Tan 36:20-23; Ɛsd 3:1.

 Jijɛnu Jelemíi 29:11 tɔn nɔ ná gǎnjɛwú mɛ ɖěɖěe nɔ gán jɛ akpá Mawu tɔn lɛ́ wú égbé lɛ́ é. Fífá mɛ ninɔ ɖo Axɔ́súɖuto Mawu tɔn e nu Jezu Klísu ná nɔ é glɔ́ ɖo akpá énɛ́ lɛ́ mɛ.—Ðɛhan 37:10, 11, 29; Ezayíi 55:11; Matíe 6:10.

Nukúnnúmɔjɛnǔmɛ agɔ ɖé lɛ́ dó Jelemíi 29:11 wú

 Nukúnnúmɔjɛnǔmɛ agɔ: Mawu ná bló bɔ mɛsɛntɔ́ tɔn lɛ́ ná jɛ dɔkun ɖo agbaza lixo.

 Nǔgbó: Xókwín “dɔkun” e tɔ́n ɖo Jelemíi 29:11 mɛ bɔ è mɔ ɖo Biblu ɖé lɛ́ mɛ é ɔ, xókwín Ebléegbe tɔn ɖé wɛ bɔ tínmɛ tɔn nyí “fífá kpó ganjíninɔ kpó.” Sɔgbe xá nǔ e lɛ́ lɛ̌ dó wěmafɔ ɔ lɛ́ é ɔ, fífá kpó ganjíninɔ kpó sín akpá wɛ Mawu dó nú Izlayɛ́li ví e è kplá yi kannumɔgbénu lɛ́ é, é nyí dɔkun ǎ. Akɔta ɔ ná kpo ɖo te, bo ná wá lɛ́ kɔ wá Jeluzalɛ́mu gbe ɖokpó.—Jelemíi 29:4-10.