Hwenu e è mɔ xo towe é ɔ, nǔvíkún kpɛví títí ɖokpó wɛ a nyí; a hwe sɔmɔ̌ bɔ nukún tlɛ sixú mɔ we ǎ. É ɖo mɔ̌ có, sun ɖé lɛ́ gúdo ɔ, a wá húzú vǐ yɛ̌yɛ́. Nǔvíkún ɖokpó énɛ́ wá húzú nǔvíkún tɛnmɛ tɛnmɛ 200 jɛjí, bɔ lěe yě cí é gbɔn vovo, bɔ azɔ̌ vovo lɛ́ wɛ yě nɔ lɛ́ wa.

 Lin tamɛ d’é jí: Nǔvíkún ɖokpó nɔ bló bɔ wɛn e é hɛn é nɔ húzú we, bɔ éɖésúnɔ nɔ má ɖó we bo nɔ húzú nǔvíkún yɔ̌yɔ́ we. Nǔ ɖokpó ɔ nɔ jɛ dó nǔvíkún yɔ̌yɔ́ lɛ́ lɔ jí, bɔ nǔ nɔ nyí mɔ̌ azɔn mɔ̌kpán. Tlóló hwɛ̌ ɔ, nǔvíkún ɖokpó ɔ lɛ́ wɛ nǔvíkún yɔ̌yɔ́ lɛ́ bǐ nɔ nyí. Nǔ e sín hudó yě ɖó bo ná bló nǔvíkún tɛnmɛ tɛnmɛ lɛ́ é bǐ nɔ ɖo wɛn e yě hɛn é mɛ.

 Ényí kɛ́n jɛ mɛ wú b’ɛ bló aklúnɔzángbla ɖokpó gúdo ɔ, nǔvíkún lɛ́ nɔ wá húzú nǔvíkún wunmɛ we. Nǔvíkún ɖé lɛ́ nɔ wá húzú vǐ e ɖo adɔgo mɛ é, bɔ ɖěvo lɛ́ nɔ wá bló vǐkpo ɔ kpó ajɔxanú tɔn lɛ́ kpó, bo nɔ bló bɔ vǐ ɔ nɔ su ɖo xomɛ.

 Bɛ́ sín aklúnɔzángbla atɔngɔ́ ɔ mɛ ɔ, nǔvíkún e ná wá húzú vǐ ɔ lɛ́ é nɔ bló gbɛ̌ta atɔn ɖě ɖo ɖě jí. Ðěɖěe ɖo gbɛ̌ta aga tɔn mɛ lɛ́ é ná wá húzú agbazakan lɛ́, tamɛfɔn, nu, wǔtu, kpó nǔvíkún ɖěvo lɛ́ kpó. Nǔvíkún e ɖo gbɛ̌ta tɛ́ntin tɔn mɛ lɛ́ é ná wá húzú hun, xú lɛ́, ayi lɛ́, adǎn lɛ́, kpó nǔvíkún ɖěvo lɛ́ kpó. Nǔvíkún e ɖo gbɛ̌ta do tɔn mɛ lɛ́ é ná wá húzú nǔ e nɔ w’azɔ̌ ɖo xomɛ lɛ́ é ɖi fíjó, aɖɔ̌kpo, kpó nǔ ɖěvo e kunkplá fí e nǔɖuɖu nɔ gbɔn ɖo adɔgo mɛ lɛ́ é kpó.

 Ðo xo ɔ hwenu ɔ, nǔvíkún ɖé lɛ́ nɔ sɛ tɛn sín vǐ ɔ sín akpáxwé ɖé lɛ́ yi ɖěvo lɛ́; ɖé lɛ́ nɔ sɛ tɛn yěɖokpónɔ, ɖěvo lɛ́ nɔ sɛ tɛn ɖo gbɛ̌ta mɛ. Nǔvíkún ɖěvo lɛ́ nɔ xo yěɖée kplé dó gbɛ̌ta mɛ ɖě ɖo ɖě jí, alǒ cá yěɖée ɖó kpɔ́ dó bló nǔ kan ɖɔhun lɛ́. Nǔvíkún lɛ́ ɖó ná w’azɔ̌ ɖó kpɔ́ ganjí cóbó ná kpé wú bo bló nǔ énɛ́ lɛ́. Ði kpɔ́ndéwú ɔ, hweɖénu nɔ wá su bɔ nǔvíkún lɛ́ sín gbɛ̌ta lɛ́ nɔ xásá bo nɔ bló kan kpɛví kpɛví tiyóo ɖɔhun lɛ́. Nǔ énɛ́ nɔ jɛ ɖo vǐ ɔ sín akpáxwé vovo lɛ́ zɛ̌ɛ́n. Énɛ́ gúdo ɔ, kan kpɛví kpɛví énɛ́ lɛ́ nɔ jɛ ga ɖi jí, bo nɔ lɛ́ ɖo sóbwésóbwé wɛ, lobo nɔ wá cá bɔ bǐ nɔ húzú kan e mɛ hun nɔ sa gbɔn lɛ́ é.

 Ényí vǐ yɛ̌yɛ́ e ɖo ganjí é ɖé wá gbɛ ɔ, nǔvíkún tɔn lǐva donu kanweko mɔ̌kpán lɛ́ nɔ ko ɖó azɔ̌ tawun ɖé lɛ́ bá wa, bo ná wa ɖo fí e jɛxá é, ɖo hwetɔnnu.

 Étɛ́ a ka lin? Nǔwúkpíkpé e nǔvíkún lɛ́ ɖó bo nɔ húzú nǔvíkún vovo lɛ́, bá dó sixú wa azɔ̌ tawun tawun lɛ́ ɖo agbaza mɛ é wá nú éɖée wɛ a? Alǒ dǎ wɛ è dá?