Far beinleiðis til innihaldið

Far til undirvalmynd

Far til innihaldsyvirlit

Jehova vitni

Føroyskt

Góð tíðindi frá Gudi

 11. PARTUR

Hvussu gagna meginreglurnar í Bíbliuni okkum?

Hvussu gagna meginreglurnar í Bíbliuni okkum?

1. Hví hava vit tørv á leiðbeining?

Hvat fær meginreglan, um at lívið er ein gáva frá Gudi, okkum at gera? — SÁLMUR 36:10.

Skaparin er nógv vísari, enn vit eru. Sum ein góður pápi, vil hann okkum tað besta. Hann ætlaði ikki, at vit skuldu ráða okkum sjálvum. (Jeremias 10:23) Eins og eitt barn hevur brúk fyri leiðbeining frá foreldrunum, hava vit øll tørv á leiðbeining frá Gudi. (Esaias 48:17, 18) Meginreglurnar í Bíbliuni geva okkum leiðbeining, sum er ein gáva frá Gudi. — Les 2 Timoteus 3:16.

Lógir og meginreglur Jehova læra okkum besta mátan at liva nú og vísa okkum, hvussu vit kunnu fáa ævigar signingar í framtíðini. Av tí at Gud skapti okkum, er tað bert rímiligt, at vit taka væl ímóti hansara leiðbeining. — Les Sálm 19:8, 12; Opinberingina 4:11.

2. Hvat er ein bíbilsk meginregla?

Ein bíbilsk meginregla er ein grundleggjandi sannleiki. Ein lóg verður hinvegin nýtt í serstøkum viðurskiftum. (5 Mósebók 22:8) Skulu vit skilja, hvussu ein meginregla kann brúkast í eini ávísari støðu, mugu vit brúka okkara vit. (Orðtøkini 2:10-12) Til dømis lærir Bíblian, at lívið er ein gáva frá Gudi. Hesin grundleggjandi sannleikin kann leiðbeina okkum, tá ið vit eru til arbeiðis, úti í ferðsluni ella heima. Hann hjálpir okkum at taka tey fyrivarni, sum eru neyðug. — Les Ápostlasøguna 17:28.

3. Hvørjar tvær meginreglur eru mest týðandi?

Jesus nevndi tvær meginreglur av alstórum týdningi. Hin fyrra sigur frá sjálvari meiningini við lívinum — at kenna Gud, elska hann og tæna honum trúføst. Vit eiga at hugsa um hesa  fyrru meginregluna, hvørja ferð vit skulu taka eina avgerð. (Orðtøkini 3:6) Gera vit tað, verða vit vinir Guds, vit verða lukkulig og fáa ævigt lív. — Les Matteus 22:36-38.

Seinna meginreglan kann hjálpa okkum at fáa eitt friðarligt samband við onnur. (1 Korintbræv 13:4-7) At liva eftir hesi meginregluni ber í sær at fylgja leiðbeiningini frá Gudi um, hvussu vit skulu fara við fólki. — Les Matteus 7:12; 22:39, 40.

4. Hvussu gagna meginreglurnar í Bíbliuni okkum?

Meginreglurnar í Bíbliuni læra familjur, hvussu tær kunnu verða sameindar í kærleika. (Efesusbrævið 4:32; Kolossebrævið 3:12, 14) Guds orð verjir eisini familjur við eini aðrari meginreglu, nevniliga at hjúnabandið skal vera varandi. — Les 1 Mósebók 2:24.

Tað kann verja okkum fíggjarliga og kensluliga at fylgja meginreglunum í Bíbliuni. Til dømis dámar arbeiðsgevarum ofta best at hava arbeiðsfólk, sum liva samsvarandi meginreglunum í Bíbliuni um at vera ærligur og íðin. (Orðtøkini 10:4, 26; Hebrearabrævið 13:18) Guds orð lærir okkum eisini at vera nøgd við tað, sum er fyri neyðini, og at virðismeta vinalagið við Gud meiri enn tað materiella. — Les Matteus 6:24, 25, 33; 1 Timoteus 6:8-10.

Tað verjir okkara heilsu at liva eftir meginreglunum í Bíbliuni. (Orðtøkini 14:30; 22:24, 25) Um vit til dømis akta Guds lóg um drykkjuskap, verða vit vard ímóti deyðiligum sjúkum og óhappum. (Orðtøkini 23:20) Jehova loyvir okkum at njóta rúsdrekka, men bert við máta. (Sálmur 104:15; 1 Korintbræv 6:10) Guds meginreglur gagna okkum, tí tær læra okkum at ansa eftir, hvat vit gera og eisini, hvat vit hugsa. (Sálmur 119:97-100) Tó fylgja sonn kristin ikki bert Guds reglum fyri sína egnu skyld. Tey gera tað fremst av øllum fyri at æra Jehova. — Les Matteus 5:14-16.

 

LÆR MEIRA

Hvat lærir Bíblian veruliga?

Ein liviháttur, sum dámar Gudi

Tú kanst gleða Jehova við tínum livihátti. Tað ber enntá til at verða vinur hansara.

Hvat lærir Bíblian veruliga?

Lívið — sum Gud metir tað

Hvussu metir Gud fosturtøku, blóðflutning og tað at drepa dýr?

Um Jehova vitni

Fá eitt bíbliuskeið

Fá eitt ókeypis bíbliuskeið. Tú velur sjálvur tíð og stað.