Kena ivakaraitaki, raica mada na parofisai qo:

• “Era na veivaluvaluti na veivanua kei na veimatanitu, ena vakilai na leqa ni kakana qai yaco tale ga na uneune ena levu na vanua.”—Maciu 24:7.

• “Ni na duatani sara na iotioti ni veisiga, ena vakilai kina e levu na ka dredre. Nira na dau lomani ira ga na tamata, era na lomana na ilavo, era na dau tukutukuni ira, era na qaciqacia, era na dau veibeci, era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakauvosa, era na sega ni lewa vinaka na yalodra, era na voravora, era na sega ni vinakata na ka e dodonu, era na dau veiliumuritaki, era na domoqa, era na dokadoka, era na lomana ga na marau era sega ni lomana na Kalou.”—2 Timoci 3:1-4.

Na parofisai qori ena rairai vakavuna mera nanuma eso ni sa torosobu tiko ga na ituvaki kei vuravura, ena sega ni caka rawa kina e dua na ka. Dua na yasana e dina qori, sa sega ni cakava rawa e dua na ka na tamata me vakavinakataka kina na ituvaki kei vuravura. E kaya na iVolatabu ni sega vua na tamata na vuku kei na kaukaua me vakaotia kina na leqa. E vakadinadinataki qori ena veitikinivolatabu qo:

• “E tiko na sala e rairai donu vua na tamata, ia na kena itinitini na sala ga ni mate.”—Vosa Vakaibalebale 14:12.

• “Era veiliutaki . . . na tamata e tini ga ina leqa.”—Dauvunau 8:9.

• “E sega ni vu vua na tamata . . . me lewa na nona ilakolako.”—Jeremaia 10:23.

E rawa ni rusa na vuravura ke ra cakava tiko ga na tamata na ka era vinakata. Ia ena sega ni yaco qori! Na vuna? Dikeva mada na ka e kaya na iVolatabu:

• Na Kalou “sa vakataudeitaka na yavu ni vuravura . . . , ena sega ni yavalati mai na kena vanua me tawamudu, io me tawamudu.”—Same 104:5.

• “E lako yani e dua na itabatamata, e lako mai e dua na itabatamata, ia na vuravura ena tu ga me tawamudu.”—Dauvunau 1:4.

• “O ira na yalododonu era na taukena na vuravura, era na qai bula tawamudu kina.”—Same 37:29.

• “Ena levu na covuata e vuravura, ena vuabale ena dela ni veiulunivanua.”—Same 72:16.

 E saumi vakamatata noda vakatataro ena ivakavuvuli vakaivolatabu. Dua na gauna sa na sega ni mate na tamata ena matetaka, leqa ni kakana kei na wai, se na veivagagai ni cagi. Ena sega tale ga ni vakarusai na vuravura ena iyaragi vakaniukilia. Na vuna? Ena cakava na Kalou e dua na ka ena ituvaki kei vuravura ena gauna se bera mai. E solia na Kalou vei keda na galala ni vakatulewa. Ia eda na dui tamusuka na ka eda kaburaka. (Kalatia 6:7) Na vuravura e sega ni vaka na sitima e sega ni tarovi rawa na kena toso, qai vakadomobula na vanua e tini kina. Sa lokuca tu na Kalou na gauna me muduka kina na ivakarau ca ni tamata.—Same 83:18; Iperiu 4:13.

Ni sa cakava oti qori na Kalou, ena qai vakilai na ‘vakacegu levu.’ (Same 37:11) Na veika totoka e vakamacalataki ena ulutaga qo, e sabolo ga ni ka era vulica ena iVolatabu na iVakadinadina i Jiova me baleta na gauna se bera mai.

Era tu e vuravura raraba na iVakadinadina i Jiova, e duidui nodra yabaki ni bula ra qai cavutu mai na veimatatamata. Era sokaloutaka na Kalou dina duadua ga, e tukuna na iVolatabu ni yacana o Jiova. Era nuidei me baleta na veigauna se bera mai ni kaya na iVolatabu: “Qo na ka e tukuna o Jiova, o koya e bulia na lomalagi, na Kalou dina, o koya e bulia na vuravura, na Dauveibuli e vakataudeitaka, e sega ni bulia me lala, e bulia ga me tawa: ‘O yau o Jiova, e sega ni dua tale.’”—Aisea 45:18.