Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Laurai vakalevu ena ivolavivigi taumada vakaivolatabu, na yaca ni Kalou ena matuavosa vakaIperiu

 NA RAI NI IVOLATABU

Na Yaca ni Kalou

Na Yaca ni Kalou

Era dau vakayagataka na icavuti vakarokoroko e vica vata na milioni nira masu vua na Kalou, me vaka na Turaga, O Koya e Tawamudu, Allah, se ra dau cavuta ga na Kalou. Ia ke tiko na yaca ni Kalou, o nanuma ni bibi mo vakayagataka?

O cei na yaca ni Kalou?

KA ERA KAYA ESO

 

Levu vei ira na kaya nira lotu vaKarisito era vakabauta ni yaca ni Kalou o Jisu. Eso era kaya ni dua ga na Kalou Kaukaua Duadua, e sega ni gadrevi kina me dua na yacana. Eso tale era nanuma ni sega ni veiganiti me vakayacani na Kalou.

KA E KAYA NA IVOLATABU

 

E sega ni yaca ni Kalou Kaukaua Duadua o Jisu baleta e sega ni Kaukaua Duadua o koya. A vakavulici ira nona imuri o Jisu mera kaya nira masu vua na Kalou: “Tamai keimami, me vakarokorokotaki na yacamuni.” (Luke 11:2) O Jisu mada ga a kaya ena nona masu vua na Kalou: “Tamaqu, moni vakalagilagia na yacamuni.”—Joni 12:28.

E kaya na Kalou ena iVolatabu: “O yau o Jiova. Qori na yacaqu; Au sega ni solia na noqu lagilagi vua e dua tale.” (Aisea 42:8) Na yaca “Jehovah” e vakadewa vakavalagi ni va na matuavosa vakaIperiu na YHWH, e vakatakarakarataka na yaca ni Kalou. E rauta ni 7,000 na vanua ena iVolatabu vakaIperiu e volai kina na yaca ni Kalou. * E sega ni va qori na levu ni kena vakayagataki na icavuti me vaka na “Kalou,” “Kaukaua Duadua,” kei na “Turaga,” se so tale na yaca e cavuti ena iVolatabu me vaka na Eparama, Mosese, se Tevita.

E sega ni vakatabuya o Jiova ena iVolatabu me vakayagataki na yacana. E tukuni ena iVolatabu nira vakayagataka vakalevu na tamata ni Kalou na yacana. Na ibalebale mada ga ni yaca e soli vei luvedra e cavuti kina na yaca ni Kalou. Kena ivakaraitaki, na yaca Ilaija e kena ibalebale “Noqu Kalou o Jiova,” na yaca Sakaraia e kena ibalebale “Nanuma o Jiova.” Era dau vakayagataka tale ga na tamata ni Kalou na yacana nira veivosaki e veisiga.—Ruci 2:4.

E vinakata na Kalou meda vakayagataka na yacana. Eda uqeti meda “vakavinavinaka vei Jiova, kaciva na yacana.” (Same 105:1) E taleitaki ira era “vakananuma . . . na yacana.”—Malakai 3:16.

“Mera kila na tamata ni o kemuni, na yacamuni ga o Jiova, o kemuni ga oni Cecere Duadua e vuravura taucoko.”Same 83:18.

 Na cava na ibalebale ni yaca ni Kalou?

Era vakabauta eso na daunivakadidike ni yaca Jiova ena vosa vakaIperiu e kena ibalebale “O Koya e Vakavuna me Yaco.” Qori e vakadeitaka ni rawa ni cakava na Kalou na cava ga e gadrevi me yaco kina nona inaki se rawa ni vakayagataka e dua nona ibulibuli me cakava qori. Na yaca Jiova e ganita duadua ga na Dauveibuli cecere.

KENA YAGA VEI IKO

 

Na nomu kila na yaca ni Kalou ena veisautaka nomu rai me baleti koya. Ena rawarawa tale ga nomu toro voleka vua nida dau veivolekati ga kei na dua eda kila vinaka. Ke sega ni vinakata na Kalou meda toro voleka vua, ena sega ni vakaraitaka vei keda na yacana.—Jemesa 4:8.

Ena sega vakadua ni daro na ka e kaya na Kalou o Jiova me vaka ga e veivakadeitaki kina na ibalebale ni yacana. Sa rauta me tukuna na iVolatabu: “Era na vakararavi vei kemuni o ira na kila na yacamuni.” (Same 9:10) Na nomu kila ni vakavotui na yaca i Jiova ena nona itovo vaka na loloma, yalololoma, veinanumi, kei na lewadodonu ena uqeti iko mo vakararavi vua. (Lako Yani 34:5-7) E veivakacegui dina noda kila ni dau dina o Jiova ena nona yalayala, qai vakavotui vinaka na nona itovo ena ka e cakava.

Io, dua na ka dokai meda kila na yaca ni Kalou Kaukaua Duadua. Eda na vakalougatataki kina ena gauna qo kei na gauna se bera mai. E yalataka na Kalou: “Au na taqomaki koya ni kila na yacaqu.”—Same 91:14.

“Era na bula o ira kece era masuta na yaca i Jiova.”Joeli 2:32.

^ para. 9 Era kauta laivi e levu na vakadewa ni iVolatabu na yaca ni Kalou, era sosomitaka ena icavuti “TURAGA” qai volai ena matanivola levu. Eso tale na vakadewa era digitaka ga na tikinivolatabu me volai kina na yaca ni Kalou, se biu ga ena ivakamacala e ra. Ia na iVolatabu Vakadewa ni Vuravura Vou e vakayagataka na yaca ni Kalou ena iVolatabu taucoko.