Raica sara na lewena

Raica na lewenivola

Veivakurabuitaki na Manumanunidrumani

Manumanunidrumani seninawanawa

Veivakurabuitaki na Manumanunidrumani

SEGA ni dua tale na ika me dreta vakalevu na matada me vaka na manumanunidrumani. Na serau ni rokana e via tautauvata kei na nodra isulu duiroka na dau vakalasalasa. E vakatokayacataki donu na ika qo ni nona itikotiko na drumani votovotoa.

E dau taleitaka me taba na manumanunidrumani me vakataki ira ga na dau vakaraitaki ena iyaloyalo ena gauna qo. Era kila na daununu kei ira na taleitaka na sarasara e loma ni wai ni na rawarawa nodra tabaka na manumanunidrumani ni dau toka voleka ga ena nona itikotiko qai sega ni dau madua.

E veivakurabuitaki na ika qo ni bolea me vakaitikotiko ena drumani votovotoa. Qori e vaka ga na taravale ena kedra maliwa na gata. Ia e laurai ni rau veitokani vinaka rau dau qai cakacaka vata na manumanunidrumani kei na drumani. E rawa vakacava ya?

VEIVUKEI

Manumanunidrumani e rua na itosi vulavula e toka e yagona

Erau dau veivukei na manumanunidrumani kei na drumani me vakataki keda ga na tamata. Na bula ni manumanunidrumani  e vakatau toka vakalevu ena veitaqomaki ni drumani. Era kaya na dau dikeva na veikabula ni waitui ni leqataki na bula ni ika qo ke sega na drumani, baleta e sega ni kila vinaka na qalo ra qai tu wavoki na meca era rawa ni kani koya. Ke sega gona na veitaqomaki ni drumani, kalougata me bau tini na yabaki na dede ni nona bula na manumanunidrumani.

E vanua vinaka tale ga ni nona vakalutu yaloka na ika qo na drumani. Erau na yadrava sara toka ga na yaloka na itubutubu me yacova na gauna e saulaki kina. Dua tale na gauna eda na qai rai, eratou sa na qalo vata toka ena veidrumani na veitamani.

Vakacava na drumani, e yaga vakacava vua na nona veitokani kei na manumanunidrumani? E vaka toka na yadra na manumanunidrumani, e dau cemuri ira na ika era via kania na lawe ni drumani. E tiko e dua na mataqali drumani e vakatautaka sara tu ga vua na manumanunidrumani na nona bula kei na mate. Dua na gauna era kauta tani mai na drumani qori na dauvakadidike na manumanunidrumani. Cava e yaco? Era yali kece na drumani ena loma ga ni 24 na aua nira kanalaka kece eso tale na ika.

E tukuni ni tiko vua na manumanunidrumani eso na ka e yaga vua na drumani. Dua na mataqali pouta e kaburaka e vakatotolotaka na tubu ni drumani. E veivuke tale ga ena kena vakadrodroi na cagi bulabula vua na drumani.

SEGA NI RERE

Manumanunidrumani piqi

E toka ena kuli ni manumanunidrumani na weli e dau taqomaki koya me kua ni laukati. Na weli tale ga qori e vakavuna me nanuma na drumani ni rau vuvale vata ga kei na manumanunidrumani. E kaya e dua e dau dikeva na veika bula ni waitui ni vaka ga e “vakaisulu me vaka na drumani” na manumanunidrumani.

E laurai ena so na vakadidike ni dau saga na manumanunidrumani me vakamatauni koya rawa ena vanua ena vakaitikotiko kina. Kena ivakaraitaki, ena vakacakava toka eso na ka me terega kina na yagona na drumani. Ena cakava mada vakadua, oti e vica na aua ena cakava tale. Ena cakava tiko qori me yacova ni sa vakadeitaka ni na taqomaki koya mai na drumani votovotoa na weli e tiko e kulina. Ena rairai laukati vakalailai na ika qo ni saga tiko me rau veikilai kei na drumani, ia sega ni dede rau sa na veitokani vinaka.

Eda vulica ena nodra cakacaka vata na duidui kabula meda dau veitokonitaka na ka. Sa vakadinadinataki ni rawa vinaka nodra sasaga e levu era cavutu mai na duidui matatamata baleta nira cakacaka vata. Eda na vaka na manumanunidrumani ena so na gauna ni na rairai taura toka na gauna qai vinakati na sasaga meda rawa ni cakacaka vata kei ira eso tale. Ia eda na tauca e muri na vua ni noda sasaga.