Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA RAI NI IVOLATABU

Cakava na ka ena Kena Gauna

Cakava na ka ena Kena Gauna

O ira mada ga na dau yalobalavu era vakabauta ni vinaka me caka na ka ena kena gauna. E tokona tale ga na vakasama qori na iVolatabu, qai tu kina e levu na ivakasala yaga ena vukei keda.

Cava me caka kina na ka ena kena gauna?

VUNA E BIBI KINA

Era raica eso nira sega ni lomaocaoca vakalevu ke ra yaco totolo ina vanua e dodonu mera gole kina. Ena vinaka tale ga na keda irogorogo nida dau cakava na ka ena kena gauna. Kena ivakaraitaki:

Ena kilai nida dau lewa vinaka. Noda dau cakava na ka ena kena gauna e vakaraitaka nida rawa ni vakatulewataka vinaka na veika e vauca noda bula. Eda sega ni vakalaiva na ituvaki eda dau sotava me vakalatilati ena noda cakava na veika eda vinakata.

Ena kilai nida nuitaki. Era dau dokai o ira era dina ena ka era kaya, ni levu nikua era sega ni daudina ena nodra yalayala se na veidinadinati era cakava. Ke da tamata nuitaki, era na dokai keda noda itokani kei na lewe ni noda vuvale. O ira na boso ni cakacaka era taleitaki ira era dau yaco totolo yani ena vanua ni cakacaka ra qai cakava na ka ena kena gauna. E rawa ni toso cake na kedra isau na tamata cakacaka era nuitaki, qai rawa ni lesi vei ira e levu tale na itavi.

KA E KAYA NA IVOLATABU

E vakamacalataki ena iVolatabu eso na ka e vauca noda cakava na ka ena kena gauna. Kena ivakaraitaki, e kaya e dua na tikinivolatabu: “Na ka kece e caka me rakorako qai tuvanaki vakamatau.” (1 Korinica 14:40) Ke rau lokuca e le rua na gauna kei na vanua me rau sota kina, e dodonu me rau dina ena ka erau veivosakitaka. E kaya e dua tale na tikinivolatabu: “E vagauna na ka kece ga, na gauna ni ka kece e caka e ruku i lomalagi.” (Dauvunau 3:1) E laurai ena ikotokoto ni tikinivolatabu qori ni tiko “na gauna ni teitei kei na gauna me cavu kina.” (Dauvunau 3:2) Era sega ni dau berata na dauteitei na gauna ni nodra teitei nira vinakata mera tatamusuki ena kena gauna donu. Ke bera nodra teitei, ena sega ni vinaka tale ga na ka era tamusuka.

E kaya na iVolatabu ni noda cakava na ka ena kena gauna e vakaraitaka nida dokai ira eso tale qai kauaitaka na veika me baleti ira, wili kina na nodra gauna. (Filipai 2:3, 4) Ia ke da sega ni daudina ena gauna eda lokuca meda sota kina kei na dua, sa vaka ga eda butakoca tiko na nona gauna.

Kua ni kauaitaka ga na ka e baleti kemuni, ni kauaitaka tale ga na ka e baleti ira tale eso.’Filipai 2:4.

 Cava ena vukei iko mo cakava na ka ena kena gauna?

KA E KAYA NA IVOLATABU

E uqeti keda na iVolatabu meda lalawa rawa. (Vosa Vakaibalebale 21:5) Ke o raica ni o sa dau bera tu ga ina vanua e dodonu mo gole kina, ena rairai vinakati mo raica tale mada nomu ituvatuva. Biuta vakatikitiki na veika e sega soti ni yaga qai vakalusi gauna. Raica me veirauti na gauna o gole kina mai na dua na vanua ina dua tale, qai saga mo yaco totolo e kea. Ena yaga vakalevu qori ni sotavi na ituvaki tawanamaki, me vaka na oso ni gaunisala kei na draki ca.

E veiuqeti tale ga na iVolatabu meda dau yalomalumalumu. (Vosa Vakaibalebale 11:2) Meda nanuma tiko ni vakaiyalayala ga na ka eda rawa ni cakava. Ni bera gona ni o vakadonuya e dua na ka e tukuni vei iko, vakasamataka vinaka o na cakava rawa se sega. O na vakalomaocaocataki iko ga kei ira na so tale ke o vakaiotaka e levu na ka, ia o sega ni cakava rawa!

E kaya tale ga na iVolatabu meda vakayagataka vinaka na noda gauna. (Efeso 5:15, 16) Cakava e liu na itavi e bibi duadua. (Filipai 1:10) Kena ivakaraitaki, ni o gole tiko ina dua na vanua se o waraka tiko e dua, o rawa ni tosoya nomu wiliwili ena dua na ivola se tuvanaka eso tale na ka o via cakava ena siga ya.

“Na lalawa ni tamata gumatua ena tini vinaka ga.”Vosa Vakaibalebale 21:5.