Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA RAI NI IVOLATABU

iValu

iValu

Nira gole ena ivalu na Isireli ena gauna makawa, era dau kaya nira cakava ya ena yaca ni nodra Kalou o Jiova. Kena ibalebale e vakadonuya na Kalou na ivalu e yaco tu nikua?

Na cava era vala kina na Isireli?

KA ERA TUKUNA ESO

 

Era sokaloutaka na Isireli na “kalou ni ivalu” e dau veivakalolomataki.

KA E KAYA NA IVOLATABU

 

Era ravuta na Isireli na veimatanitu e voravora qai torosobu na nodra ivalavala. Qori e okati kina na veiyacovi kei na manumanu, veiyacovi vakaveiwekani, kei na nodra cabori bulabula na gone. A solia vei ira na Kalou na gauna mera veisautaka nodra ivalavala, ia e kaya na Kalou ni oti e vica na senitiuri: “Qori na ka era vakadukadukalitaki ira tu kina na veimatanitu au vakatala laivi mai matamuni.”—Vunau ni Soro 18:21-25; Jeremaia 7:31.

“Ena vuku ga ni nodra ca na veimatanitu qori, e vakatalai ira laivi tiko kina mai matamuni o Jiova na nomuni Kalou.”​—Vakarua 9:5.

E dau veitokoni na Kalou ena ivalu ena gauna qo?

KA O RAIRAI VAKADINADINATAKA

 

Ni rau veivaluvaluti e rua na matanitu, rau dau kaya na italatala ni ito ruarua ni tokoni ira na Kalou. E kaya na ivola The Causes of War: “E dau veitokoni tu ga o lotu ena ivalu.”

KA E KAYA NA IVOLATABU

 

E sega ni dodonu mera valuti ira na kedra meca na lotu vaKarisito. A vola na yapositolo o Paula vei ira na nona itokani lotu vaKarisito: “Ke rawa, saga moni veiyaloni kei ira na tamata kece . . . Ni kua ni sauma na ca e caka vei kemuni.”—Roma 12:18, 19.

A sega ni tukuna o Jisu vei ira na nona imuri mera vala, a kaya ga: “Lomani ira tiko ga na kemudou meca, masulaki ira tale ga era vakacacani kemudou, me kilai kina ni dou luvei Tamamudou e tiko mai lomalagi.” (Maciu 5:44, 45) Ke vakaitavi mada ga ena ivalu na matanitu e veiliutaki ena nodra vanua, era na tawaveitovaki tiko ga na lotu vaKarisito qai “sega ni vakavuravura.” (Joni 15:19) E sega ni rawa ni veitokoni ena ivalu ena gauna qo na Kalou ni vinakata mera lomani ira na kedra meca na nona tamata se mani vanua cava era tiko kina.

“E sega ni vakavuravura na noqu Matanitu. Ke vakavuravura na noqu Matanitu, era na vala na noqu tamata meu kua ni soli yani vei ira na Jiu. Ia e sega sara ga ni vu eke na noqu Matanitu.”—Joni 18:36.

 Ena oti dina na ivalu?

KA ERA TUKUNA ESO

 

Ena sega ni tarovi rawa na ivalu. E kaya na ivola War and Power in the 21st Century: “Ena sega ni oti na ivalu. Sa sega tu ga ni rawa na veisaututaki e veiyasa i vuravura ena noda itabagauna qo.”

KA E KAYA NA IVOLATABU

 

Ena oti na ivalu ke sa sega ni lomana tale e dua me veivaluvaluti. Na matanitu ni Kalou e dua dina na matanitu, sa veiliutaki tiko mai lomalagi. Sa voleka sara qo ni vakarusa na iyaragi kece e vuravura qai vakavulici ira na lewenivanua mera saga na veiyaloni. E kaya na iVolatabu na Kalou ena “vakadodonutaka na ka ena vukudra na veimatanitu kaukaua era tu vakayawa. Era na tukitukia na nodra iseleiwau me batinisiviyara kei na nodra moto me isele ni sasamaki. Ena sega ni lave iseleiwau e dua na matanitu ina dua tale na matanitu, era na sega ni vulica tale na ivalu.”—Maika 4:3.

E kaya na iVolatabu ni na oti dina na ivalu ni sa lewa na vuravura na Matanitu ni Kalou. Na vuna? Sa ra na yali kece na matanitu era dau nanumi ira ga, vakalolomataki ira na lewenivanua, qai dau veivakaduiduitaki. Na veika sara ga qori e dau vakavuna ena gauna qo na vakaduduile, veicati vakamatatamata, kei na ivalu. E yalataka na Kalou: “Era na sega ni veivakaleqai se veivakarusai . . . ni na robota na vuravura na kilaka me baleti Jiova me vaka e ubia na wasawasa na wai.”​—Aisea 11:9.

“Ena mai vakaotia o koya na ivalu e vuravura taucoko. E musuka o koya na dakaititi qai vorolaka na moto, e vakama na qiqinivalu ena bukawaqa.”​—Same 46:9.