Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 VEIYASA I VURAVURA | YASAYASA VAKAMERIKA

Dikevi na Yasayasa vakaMerika

Dikevi na Yasayasa vakaMerika

E vakadinadinataki ena so na irogo mai na ra ni noda vuravura ni yaga dina na ivakasala ena iVolatabu.

VAKALAILAITAKA NA NUIQAWAQAWA

E rawa ni vakalailaitaki na nuiqawaqawa ke lewai vinaka na levu ni gauna e raici kina na imeli, de dua me vakatolu ga ena dua na siga. Qori na ka e laurai ena dua na vakadidike e vakayacori mai Vancouver, Kenada. E kaya o Kostadin Kushlev a liutaka na vakadidike qori: “Se mani vakacava na kena dredre, e bibi me lewai vinaka na kena dau raici na imeli ni na vakalailaitaka na nuiqawaqawa.”

ME VAKASAMATAKI: Eda donuya tu qo na gauna e “vakilai kina e levu na ka dredre,” meda lewa vinaka gona na ka eda cakava me kua ni ikuri ni noda nuiqawaqawa.2 Timoci 3:1.

KATOA TALE NA IQOLIQOLI

“E laurai ni sa levu tale na veimataqali vivili, urau kei na ika ena so na vanua e vakatabui tu me qolivi” e Belize kei na so na yasayasa ena Caribbean. Qori na macala ni dua na ripote a vakau ina isoqosoqo e dau valataka nodra taqomaki na veika bula na Wildlife Conservation Society (WCS). E tukuni tale ga ena ripote qori: “Ke biu na vakatatabu ena vanua e qolivi wasoma, e rawa ni katoa tale ena loma ga ni 1 ina 6 na yabaki. Ia ena taura toka e vicasagavulu na yabaki me qai katoa na iqoliqoli kece . . . sega ni kena ga e qolivi wasoma.” E kaya me baleta na vanua o Belize o Janet Gibson na dairekita ni WCS: “Na vakatatabu e rawa ni veivuke ena kena katoa tale na iqoliqoli, kei na kena vakalevutaki tale na iwiliwili ni veikabula.”

ME VAKASAMATAKI: E laurai votu na vuku ni Dauveibuli ena veika e bulia.Same 104:24, 25.

BASULAWA E BRAZIL

E tukuna na tabana ni itukutuku na Agência Brasil ni dua na ka na levu ni basulawa e Brazil. E sivia na 56,000 na laba e yaco ena 2012, qori na iwiliwili levu duadua me bau ripotetaka na Tabana ni Bula ena loma ni dua na yabaki. E nanuma e dua na turaga e kauai ena nodra taqomaki na lewenivanua o Luís Sapori ni sa vakaraitaka ga ya na torosobu ni itovo. E kaya tale ga ke sega ni rokovi na lawa ni vanua, “ena voravora nodra itovo na lewenivanua me rawa kina na ka era vinakata.”

O BAU KILA? E parofisaitaka na iVolatabu ni na “batabata” na loloma, qai tubu na ivalavala tawadodonu.Maciu 24:3, 12.