Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 BULA VAKAIDEWADEWA SE BULI?

Sala Veivakurabuitaki e Rawata Kina na Rokana

Sala Veivakurabuitaki e Rawata Kina na Rokana

DUA na mataqali kau e tubu vakalevu ena yasayasa vakaAferika na Pollia condensata. Na kau duadua ga qo e karakarawa buto na vuana. Ni sega ni solia na rokana e dua na ka e tiko ena vuana, e basika ga mai vakacava na karakarawa buto?

Vakasamataka mada: E tiko ena kuli ni vua ni Pollia condensata e dua na mataqali sela, na iolo ni sela qori e veitaqataqai tu kina na wa lalai era tuva vaka na masese. Ni laurai na kedra tuvai na wa lalai, na iyatu e cake e duidui mai na iyatu e ra qai vaka na ibulibuli ni viko. E sega ni karakarawa na roka ni wa lalai, se tiko ena vua ni Pollia condensata na wai (pigment) e solia na rokana. Na sala ga e tuvai kina na wa lalai e vakavuna na karakarawa buto ni vuana qai rawa ni veiveisau na roka. Levu na vua ni Pollia condensata e vaka me karakarawa ni o raica yani. Ia e rawa ni drokadroka, piqi, se dromodromo, ni vakatau ena kedra tuvai na wa lalai. Ni laurai vakavoleka na vua ni Pollia condensata, e sega ni dua ga na roka, e rawa ni vica sara toka na roka me vaka ga eda dau raica ena kompiuta.

Ke lutu mada ga na vua ni Pollia condensata, ena sega ni yali na rokana. Eso na vuana era se maroroi tu ena duanadrau na yabaki sa oti, e se totoka tu ga na kena irairai kei na rokana. Ni vakasorena ga na vua ni Pollia condensata, e sega ni rawa ni laukana. Ia era kaya na dauvakadidike ni dau siwati ira na manumanuvuka na vuana.

Era vakabauta na saenitisi ni rawa ni vakatotomuri na iwalewale e rawata kina na rokana na vua ni Pollia condensata. Qori ena kena buli na kesa e sega ni siawa rawarawa, kei na pepa e sega ni rawa ni kopitaki vakailawaki (counterfeit-resistant paper).

Cava o nanuma? E vu mai na bula vakaidewadewa na karakarawa ni vua ni Pollia condensata se sa buli vata ga mai?