Kila na Dina ni iTukutuku
Vu ni Leqa
E dau yaco na veivakaduiduitaki ni sega ni kilai na dina ni dua na itukutuku. Qo eso na kena ivakaraitaki:
-
Era dau nanuma cala eso na boso ni cakacaka ni sega ni ganiti ira na yalewa na cakacaka e vinakati kina na igu kei na kila.
-
E Viti, era dau raicalataki na gole mai valagi nira mai suguta na cakacaka e rawa nira qarava ga na itaukei.
-
Levu era dau raicalataki ira na lokiloki nira dau cudrucudru qai levaleva.
O ira na vakabauta na rai va qori, era na vaqara iulubale me tokona kina nodra veivakaduiduitaki. Era nanuma nira lialia na sega ni duavata kei ira.
iVakavuvuli Vakaivolatabu
“Na tamata lecaika e sega ni vinaka.”—VOSA VAKAIBALEBALE 19:2.
Kena ibalebale: Eda na vakatulewa cala nida sega ni kila na dina ni dua na itukutuku. Ke da vakabauta na itukutuku lasu, eda na raicalataki ira eso tale.
Yaga ni Noda Kila na Dina ni Dua na iTukutuku
Nida kila na ka dina me baleta e dua na ilawalawa tamata, eda na sega ni vakabauta na ka lasu era tukuna eso me baleti ira. Ia nida kila ni cala na ka e tukuni vei keda me baleta e dua na ilawalawa eda dau raicalataka, ena vakavulici keda qori meda dau vakadeitaka na ka dina me baleti ira eso tale.
Ka o Rawa ni Cakava
-
Ena rairai tukuni tu eso na ka ca me baleta e dua na ilawalawa, ia mo nanuma tiko nira sega ni va kece qori na lewe ni ilawalawa ya.
-
Mo nanuma tiko ni o sega ni kila na itukutuku kece me baleta na ilawalawa qori.
-
Saga mo kila na dina ni dua na itukutuku.
Rawa ni o Wilika Tale ga
NA VALE NI VAKATAWA
Cava e Kaya na iVolatabu me Baleta na Lewadodonu?
E dau veivakaduiduitaki na Kalou? E vakalougatataka na Kalou eso na matatamata qai cudruva eso tale?
