Raica sara na lewena

Raica na lewenivola

Bula Vakayalo

Bula Vakayalo

Me vaka ga e tukuni ena imatai ni ulutaga, era kaya e levu ni iVolatabu e ivola ni lotu. Na gauna era wilika kina ra qai muria na kena veidusimaki, e dau vakayaloqaqataki ira vakayalo, ra kila tale ga na inaki ni nodra bula.

E vakayagataka na iVolatabu na “ka vakayalo” ni dusia na itovo se rai me baleta na bula. (Juta 18, 19) Ia o koya e vakayago nona rai, ena kauaitaka ga na veika me baleti koya. Ia ke vakayalo nona rai ena mareqeta na ivakatagedegede ni Kalou.—Efeso 5:1.

INUINUI

IVAKAVUVULI VAKAIVOLATABU: “Ke o yalolailai ena siga ni rarawa, ena lailai na nomu kaukaua.”—Vosa Vakaibalebale 24:10, vmr.

KENA IBALEBALE: Na yalolailai e rawa ni vakaseavutaka noda vosota na ituvaki dredre. Ia na inuinui ena vakayaloqaqataki keda meda kua ni soro. E veivakacegui dina noda kila ni lekaleka wale na veika dredre qori, e rawa tale ga ni vakilai kina eso na ka vinaka.

KA O RAWA NI CAKAVA: Saga me donu tiko ga na nomu rai me baleta na veigauna se bera mai. Kua ni lomaleqataka na veika o nanuma ni na rairai yaco, se mo namaka me dua na kena gauna veiganiti, mo cakacakataka ga na veika e salavata kei na nomu isausau. Ia eso na gauna e dau yaco “na ka e sega ni namaki.” (Dauvunau 9:11) Levu na gauna ena vinaka na ka e qai yaco ni vakatauvatani kei na veika eda namaka taumada. E kaya gona na iVolatabu ena dua na ivakatautauvata ni teitei: “Mo kaburaka na nomu sorenikau ena mataka, me kua ni cegu na ligamu me yacova na yakavi, ni o na sega ni kila na kena ena tubu, na kena qo se na kena oya, se rau na tubu vinaka ruarua.”—Dauvunau 11:6.

 ISAUNITARO BIBI ME BALETA NA BULA

IVAKAVUVULI VAKAIVOLATABU: “Ni solia vei au na yalomatua . . . ni nomuni vosa na ka dina.”—Same 119:144, 160.

KENA IBALEBALE: E sauma na iVolatabu na taro era dau vakataroga e levu. Kena ivakaraitaki, e sauma na taro me vaka qo

  • Eda vu mai vei?

  • Eda mai bula tu vakacava eke?

  • Na cava e yacovi ira na mate?

  • Qo ga na inaki ni bula?

E vica vata na milioni na lewe i vuravura sa vinaka sara nodra ivakarau ni bula nira kila na isaunitaro qori kei na levu tale.

KA O RAWA NI CAKAVA: Mo vakadinadinataka sara ga na ka e vakavuvulitaka na iVolatabu. Kerea e dua na iVakadinadina i Jiova me vukei iko mo kila vinaka na iVolatabu. Rai tale ga ena neimami website, na jw.org, se tiko ena dua na neimami soqoni sega ni saumi qai dola raraba tu vei ira na lewenivanua.

ESO TALE NA IVAKAVUVULI VAKAIVOLATABU

Sarava na vidio Vuna mo Vulica Kina na iVolatabu? ena jw.org. Sa tu tale ga ena sivia na 880 na vosa

KAUAITAKA NOMU BULA VAKAYALO.

“Era marau o ira na kauaitaka nodra bula vakayalo.”—MACIU 5:3.

VULICA E LEVU NA KA ME BALETA NA KALOU E VAKAVUNA NA IVOLATABU.

“Vakasaqara na Kalou . . . kunei koya sara . . . ni sega ni yawa o koya vei keda yadua.”—CAKACAKA 17:27.

WILIKA QAI VAKASAMATAKA NA ITUKUTUKU NI IVOLATABU.

“E marautaka na lawa i Jiova, * qai vakasamataka vakatitobu nona lawa ena siga kei na bogi. . . . Na ka kece e cakava ena vuavuaivinaka.”—SAME 1:2, 3, vmr.

^ para. 23 O Jiova na yaca ni Kalou e tukuni ena iVolatabu.