Raica sara na lewena

Raica na lewenivola

Bula Vakavuvale kei na Veitokani

Bula Vakavuvale kei na Veitokani

E levu e sega ni dau vinaka nodra veimaliwai ena vuvale se vei ira nodra itokani. Ia qo eso na ivakavuvuli vakaivolatabu ena vakavinakataka nomu veimaliwai kei ira eso tale.

KUA NI NANUMI IKO GA

IVAKAVUVULI VAKAIVOLATABU: “[Kua] ni kauaitaka ga na ka e baleti kemuni, ni kauaitaka tale ga na ka e baleti ira tale eso.”—Filipai 2:4.

KENA IBALEBALE: E yavutaki na veitokani vinaka ena soli ka, sega ni taura na ka. Ke o dau nanumi iko ga, ena rawa ni vakaleqa nomu veitokani kei ira eso tale. Kena ivakaraitaki, na isa ni vakawati e nanumi koya ga ena rawa ni tawayalodina vei watina. E sega tale ga ni dua ena via veitokani kei ira na dau uvudavuitaka na ka era taukena se kila. E kaya kina na ivola The Road to Character, ni dua e “dau nanumi koya ga ena sega ni vinaka nona vakatulewa.”

KA O RAWA NI CAKAVA:

  • Dau veivuke. Na veitokani vinaka e yavutaki ena ivau e dei kei na veinuitaki. E laurai ena so na vakadidike ni o ira na dau veivukei, era sega soti ni lomabibi, era nuidei tale ga.

  • Dau veinanumi. Qori noda dau vakila na nodra rarawa eso tale. Ke o dau veinanumi, o na sega ni vakalelewa, se tauca na vosa gaga mo vakamosia kina na lomana e dua tale.

    O na vosota tale ga na ka era cakava eso tale. Qori ena vukei iko mo kua ni veivakaduiduitaki, ia mo veitokani kei ira na duidui matatamata se isususu.

  • Dau veimaliwai. Na levu ga ni gauna o tiko kina  kei ira eso tale, o na kilai ira vinaka tale ga. Ena vakaibalebale na ka o veitalanoataka kei ira ke o via vakaitokani dina. Dau vakarorogo vinaka, kua ni vakawalena na ka era kauai kina nomu itokani. Ena dua na vakadidike wale tiko ga qo, e laurai ni “vaka vu marau na veitalanoa vinaka.”

DIGI IRA VINAKA NOMU ITOKANI

IVAKAVUVULI VAKAIVOLATABU: “Na ilala ca e vakacacana na itovo vinaka.”—1 Korinica 15:33.

KENA IBALEBALE: O ira sara ga na nomu ilala era rawa ni uqeti iko ena ka mo cakava se mani vinaka se ca. Era kaya na vuniwai era dau dikeva na itovo ni tamata, ni o ira na noda ilala era rawa ni vakamua vakalevu na noda ivakarau ni bula. Kena ivakaraitaki, ke o vakailala kei ira na dau vakatavako se ra lalawataka tiko mera veisere, o na rawa tale ga ni kana tavako, se uqeti mo veisere.

KA O RAWA NI CAKAVA: Vakailala ga kei ira e vinaka na nodra itovo, qai vakatotomuri ira. Kena ivakaraitaki, qarai ira na itokani era dau yalovinaka, veidokai, lomasavu qai veikauaitaki dina.

ESO TALE NA IVAKAVUVULI VAKAIVOLATABU

Rawa ni o sarava na vidio vakaivolatabu e vakarautaki me vukei ira na veiwatini, itabagone kei ira na gone me vinaka kina nodra veimaliwai ena vuvale

QARAUNA NA VOSA MOSIMOSI.

“Na vosa vakalialia e vaka na isua ni iseleiwau.”​—VOSA VAKAIBALEBALE 12:18.

DAU LOMASAVU.

“Na tamata lomasavu ena rawaka.”​—VOSA VAKAIBALEBALE 11:25.

CAKAVA VEI IRA TALE ESO NA KA O VINAKATA MERA CAKAVA VEI IKO.

“Na ka kece dou vinakata mera cakava vei kemudou na tamata, dou cakava tale ga vei ira.”​—MACIU 7:12.