Raica sara na lewena

Raica na lewenivola

Bula Vakailavo

Bula Vakailavo

E levu era sega ni vakila na leqa vakailavo nira muria na ivakavuvuli vakaivolatabu.

ME DUA NA ITUVATUVA

IVAKAVUVULI VAKAIVOLATABU: “Na lalawa ni tamata gumatua ena tini vinaka ga, ia o ira kece era vakusakusa era na dravudravua.”—Vosa Vakaibalebale 21:5.

KENA IBALEBALE: O na rawaka ga ke o dei ena nomu ituvatuva. Wasewasea vinaka nomu ilavo ni bera ni o vakayagataka. Ena dredre mo volia na ka kece o vinakata. Vakayagataka gona vakavuku nomu ilavo.

KA O RAWA NI CAKAVA:

  • Kua ni vakayagataki ilavo vakaveitalia. Vola qai wasewasei ira na iyaya o vinakata, me vaka na kakana, isulu, kei na vale. E vakatau sara ga vei iko na levu ni ilavo mo vakayagataka. Ke sivia na ilavo o vakayagataka ena dua na iwasewase, rawa ni o musuka mai na ilavo ena dua tale na iwasewase. Kena ivakaraitaki, ke levu na ilavo e vinakati me saumi kina na waiwai ni motoka, rawa ni o kauta mai na kena vo ena ilavo e lalawataki tu ena so na ka e sega ni bibi me vaka na kana e valenikana.

  • Dinau ga vakarauta. Ke rawa, saga mo kua ni dau dinau. Ia mo maroroi ilavo mo rawa ni volia kina na ka o vinakata. Ke o vakayagataka na credit card, saga mo sauma na ilavo e namaki e veivula me kua ni levu kina na tubu. Ke sa sivia sara ga na nomu dinau, qara e dua tale na sala mo sausaumi kina qai dei ena ka o lalawataka qori.

    E tukuni ena dua na vakadidike, ni o ira e tiko nodra credit card era dau volivoli vakaveitalia. Ke tiko na nomu, mo lewa vakavinaka na kena vakayagataki.

 QARAUNA NA ITOVO CA

IVAKAVUVULI VAKAIVOLATABU: “Na vucesa ena sega ni siviyara ena vulaililiwa, ia ena kerekere ena gauna ni tatamusuki ni sega vua na ka.”—Vosa Vakaibalebale 20:4.

KENA IBALEBALE: Na vucesa e dau veivakadravudravuataki. Mo cakacaka gona vagumatua, qai lalawataka vakavinaka nomu vakayagataki ilavo ena veigauna se bera mai.

KA O RAWA NI CAKAVA:

  • Cakacaka vakaukaua. Ni o rawa ilavo tiko ena nomu cakacaka, saga sara mo dei kina ni o gugumatua qai nuitaki. Qori na ka era dau kauai kina vakalevu na boso ni cakacaka.

  • Daudina. Kua ni butako. Na lasu ena vakacacana na kemu irogorogo, qai dredre mo kunea e dua tale na cakacaka mo dei kina.

  • Kua ni kocokoco. Ke o sega ni dau vakayagataki ilavo vakavuku o na rawa ni vakaleqa nomu bula, kei na nomu veiwekani kei ira eso tale. E sega ni bibi na ilavo, e bibi ga na bula.

ESO TALE NA IVAKAVUVULI VAKAIVOLATABU

Wilika na iVolatabu ena internet ena vica na drau na vosa

KUA NI DAU VAKAOTI GAUNA SE VAKASABUSABU ILAVO.

“Ni na dravudravua na dau mateni kei na dau kana, na dau sosovu ena vakaisulu ena isulu madra.”​—VOSA VAKAIBALEBALE 23:21.

KUA NI LOMAOCAOCA.

“Dou kua ni lomaocaocataka na nomudou bula ena ka mo dou kania se ka mo dou gunuva, se ka mo dou tokara.”​—MACIU 6:25.

KUA NI VUVU.

“Na tamata vuvu e saga tiko na iyau, e sega ni kila ni na dravudravua kina.”​—VOSA VAKAIBALEBALE 28:22.