Raica sara na lewena

Raica na lewenivola

 IVAKASALA INA VUVALE | VEISUSU

Yaga ni Nodra Lesi na Gone ena Cakacaka e Vale

Yaga ni Nodra Lesi na Gone ena Cakacaka e Vale

ITUVAKI DREDRE

Ena so na vuvale, era dau marau na gone mera veivuke ena cakacaka e vale. Ena so tale na vuvale, era marau na gone ni lailai ga na veika era namaka vei ira na nodra itubutubu. Ia era sega ni rawaka vinaka kina na gone.

Era raica na dauvakadidike ena levu na vanua nira sega ni dau veitokoni na gone, era waraka tu ga me soli se caka vei ira na ka. E kaya e dua na itubutubu o Steven: “Levu na gone nikua sa nodra ivakawele tu ga na qito ena vidio, vakayagataki ni Internet, kei na sara tivi. E sega ni soli vei ira eso na cakacaka yaga e vale mera cakava.”

Cava o nanuma? Ena yaga beka ena vuvale kei na nona bula o gone ena veigauna se bera mai ke lesi vua eso na itavi e vale?

KA MO KILA

Era sega ni lesia vei ira na luvedra eso na itubutubu na cakacaka e vale, nira nanuma sa rui levu na nodra ka ni vuli kei na so tale na ka era vakaitavi kina ni oti na vuli. Ia ena yaga vakacava vei ira na gone na nodra lesi ena so na itavi e vale?

Ena vakayalomatuataki ira na gone. Era rawaka vinaka e koronivuli na gone era dau veivuke e vale. E sega ni kurabuitaki qori baleta na nona dau veivuke e vale e dua na gone ena vulica kina eso na ka yaga. Kena ivakaraitaki, ena vulica me nuidei, lewa vinaka, me kua tale ga ni dau soro totolo.

Ena vukei ira na gone mera dau veinanumi. Era kaya eso ni o ira na gone era dau veivuke e vale ena rawarawa nodra veivuke ena itikotiko nira sa uabula. Na nodra lesi na gone ena so na itavi e vale sa vakavulici ira sara tiko ga mera dau veinanumi, mera kua ni nanumi ira ga. Ia e kaya o Steven sa cavuti oti mai: “Ke sega ni soli vei ira na gone eso na itavi mera cakava, era na nanuma ni dodonu me caka tu ga vei ira na ka. E rawa tale ga nira nanuma ni na rawarawa tu ga na bula nira tubucake tiko, ena sega ni gadrevi mera cola itavi se cakacaka vakaukaua.”

Ena uqeta na duavata ena vuvale. Ni soli vei ira na gone eso na cakacaka e vale, era na kila ni tiko na kedra yaga ena vuvale, ni tiko tale ga nodra itavi. Era na sega ni kila qori na gone ke bibi cake vei rau na itubutubu mera vakaitavi ena so na ka e dau caka ni oti na vuli, rau sega kina ni lesia vei ira eso na itavi e vale. E vinaka mo taroga ke o itubutubu, ‘Cava na kena yaga ke veivolekati o luvequ kei ira na lewe ni nona timi ni soka, ia e yawaka na nona vuvale?’

 KA O RAWA NI CAKAVA

Tekivu nira se lalai na gone. Era kaya eso ni dodonu mera sa tekivu lesia na itubutubu eso na itavi vei ira na gone nira se yabaki tolu. Eso tale era kaya me caka qori nira se yabaki rua na gone se ra se bera mada ga ni yacova na yabaki rua. Me nanumi tiko nira dau taleitaka na gone mera cakacaka vata kei na nodra itubutubu, mera vakatotomuri ira tale ga.iVakavuvuli vakaivolatabu: Vosa Vakaibalebale 22:6.

Lesia vei ira na gone na itavi e veiganiti kei na nodra yabaki. Kena ivakaraitaki, e rawa ni tomi iyaya ni vakatatalo e dua na gone yabaki tolu, qusia na ka e tasova, se wasea na isulu me sava. O ira na qase cake e rawa nira sasamaki, savata na motoka, se veivuke ena kena vakarautaki na kakana. Lesia vei luvemu na itavi o kila ni na rawa ni cakava. O rawa ni kurabuitaka tale na levu ni nona makutu, se na nona taleitaka na itavi e lesi vua.

Me donu na ka e vakaliuci. Ena dredre toka qori ke levu na ka ni vuli me cakava e veisiga o gone. Ia e kaya na ivola The Price of Privilege ni nodra sega ni lesi na gone ena itavi e vale me vinaka kina na kedra maka e koronivuli, e “vakaraitaka ni cala na ka e vakaliuci.” Me vaka ga sa vakamacalataki oti mai, ena veivuke ena nodra rawaka na gone e koronivuli na nodra dau lesi ena so na itavi e vale. Ena vakarautaki ira tale ga ina gauna era sa na vakavuvale kina.—iVakavuvuli vakaivolatabu: Filipai 1:10.

Kua ni kauaitaka na ka e rawata o gone, kauaitaka ga na veika ena vulica. Ena rairai sega ni vakaotia totolo o luvemu e dua na itavi me vaka o namaka. De dua o na raica tale ga ni sega ni vinaka sara na ivakarau ni nona cakacaka. Ni yaco qori, kua ni saga mo cakava na itavi e lesi vua. Kua ni vakatauvatani luvemu kei na dua e sa uabula se mo nanuma me tautauvata nodrau ivakarau ni cakacaka. Vukei luvemu ga me nuitaki ena itavi e lesi vua, me vakila tale ga na yaga ni cakacaka.—iVakavuvuli vakaivolatabu: Dauvunau 3:22.

Vakatulewa vinaka. Era kaya eso ni dodonu me saumi na gone me vulica kina me dau cakacaka. Ia era kaya eso tale ni iwalewale ya ena vakavuna me kauaitaka ga o gone na veika ena rawata ena vuvale, sega ni ka e rawa ni cakava me veitokoni kina. E rawa tale ga ni bese ni cakava o gone na itavi e lesi vua ke sa levu toka vua na ilavo. Ke yaco ya, sa seva toka na inaki ni kena lesi vua eso na itavi e vale. Ke soli gona vei gone e dua na ilavo, e vinaka me kua ni tukuni vua ni oya na isau ni nona cakacaka.