Raica sara na lewena

Raica na lewenivola

 Bula Vakaidewadewa se Buli?

Veivakurabuitaki na Sala e Bula Rawa Kina e Wai

Veivakurabuitaki na Sala e Bula Rawa Kina e Wai

LEVU na manumanu ni wai era bula rawa ena vanua batabata ni vakatakatai ira na vavaku ni uro e yagodra. Ia e dua tale na manumanu ni wai e vakatokai na sea otter e vakatakatai koya na yagona vutivutia.

Vakasamataka mada: E sega ni dua tale na manumanu me tautauvata kei na sea otter ena kena vutivutia. Dua mada ga na sedimita vakarivirivi ni yagona e toka kina e rauta ni 155,000 na vutina. Ni qalo na manumanu ni wai qo, e maroroya na cagi na vutina. Na cagi sara ga qori e veivakatakatai, e taqomaka na kuli ni sea otter mai na wai batabata qai maroroya na katakata sa bau tiko rawa e yagona.

Era vakabauta na saenitisi nira rawa ni vulica e dua na ka ena vuti ni sea otter. Era mani vakadikeva e levu na kote vutivutia ra qai vakatauvatana na balavu kei na veiyawaki ni vuti ni kote yadua. Era kaya na dauvakadidike: “Na levu ga ni vutina kei na kena balavu, na kena mamaca vinaka tale ga qai sega ni curumi wai.” Kena ibalebale e nona iyaragi vinaka dina na sea otter na vutina.

Era nuitaka na kenadau ni na yaga na nodra vakadidike ena kena cula na isulu ena sega ni curumi wai ena gauna e daramaki kina. Ena yaga vakalevu qori vei ira na dau nunu ena wai batabata. Ke dua na nodra isulu ni nunu e taqomaka na yago me vaka na vuti ni sea otter, sa na totoka sara!

Na cava o nanuma? E buli na vuti ni sea otter se vu mai na bula vakaidewadewa?