Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | IVAKADINADINA NI VAKAVUNA NA KALOU NA IVOLATABU

Na iVolatabu—E ‘Vakavuna Dina na Kalou’?

Na iVolatabu—E ‘Vakavuna Dina na Kalou’?

O VAKABAUTA ni vakavuna na Kalou na iVolatabu, se volai ga kina na vakasama vakatamata?

Qori e dua na ka era dau veiletitaka vakalevu o ira era kaya nira lotu vaKarisito. Kena ivakaraitaki, era vakatarogi eso na lewe i Merika ena 2014 ra qai kaya e levu ni “tiko e dua na ka e semati rau vata na iVolatabu kei na Kalou.” Ia e rauta ni 1 mai na 5 era vakatarogi era kaya ni iVolatabu e ivola ga ni “itukuni, itukutuku makawa, kei na vakasama vakatamata.” Na duidui rai qori me baleta na iVolatabu e vu ni kena dikevi tale na ibalebale ni vosa na “vakavuna.”—2 Timoci 3:16.

IBALEBALE NI “VAKAVUNA”

E 66 na ivola ena iVolatabu ra qai vola e rauta ni le 40. E volai na iVolatabu ena loma ni 1,600 na yabaki. Ke vola na tamata na iVolatabu, cava ga e tukuni kina ni “vakavuna na Kalou”? Na matavosa “vakavuna na Kalou” e dusia ni volai ena iVolatabu na itukutuku ni Kalou. E kaya na iVolatabu: “E tukuna ga na tamata na ka e vinakata na Kalou ena veiuqeti ni yalo tabu.” (2 Pita 1:21) Io, e vakayagataka na Kalou na nona igu tawarairai se na yalona tabu me vakadewataka vei ira na dauvola iVolatabu na nona itukutuku. E rawa ni vakatauvatani qori ina daunibisinisi e tukuna vei nona vunivola na ka me vola. Kena ibalebale o koya e tukuna na ka me volai e nona na ivola, e sega ni nona o koya e vola.

Eso na dauvola iVolatabu era rogoca sara ga na domo ni agilosi ni vakasavuya vei ira na itukutuku ni Kalou, eso tale era raivotu. E veitaratara tale ga na Kalou kei ira na dauvola iVolatabu ena tadra. E solia ena so na gauna na Kalou na galala vei ira na dauvola iVolatabu mera digia na vosa mera vakayagataka, ia ena so tale na gauna e dusimaki ira sara ga ena vosa me vakayagataki. Se mani cava e yaco, era vakasavuya na dauvola iVolatabu na nanuma ni Kalou, sega ni nodra nanuma ga.

Eda na vakadeitaka vakacava ni dusimaki ira na dauvola iVolatabu na Kalou? Meda raica mada e tolu na ivakadinadina ni vakavuna na Kalou na iVolatabu.