Raica sara na lewena

Raica na lewenivola

 IVAKASALA INA VUVALE | VAKAWATI

Sala me Veivosakitaki Kina na Leqa

Sala me Veivosakitaki Kina na Leqa

ITUVAKI DREDRE

Na cava e dau yaco ni drau veivosakitaka vakaveiwatini e dua na leqa? Ke o dau vakila ni o sa qai rarawa ga vakalevu, o rawa ni cakava eso na ka me vinaka kina na ituvaki. Ia e bibi mo na kila toka e liu ni duidui na ivakarau ni veivosaki ni tagane kei na yalewa. *

KA MO KILA

Era dau via veivosakitaka e liu na leqa na yalewa ni bera nira rogoca na kena iwali. Ena so na gauna e dau iwali ga ni leqa na veivosaki.

“Gauna au talaucaka kina na lomaqu au qai raica ni kauaitaka o watiqu na ituvaki au sotava, au dau lomavakacegu sara ga. Levu na gauna ni oti ga e vica na miniti na neirau veitalanoa, sa daumaka tale tu na bula.”—Silipa. *

“Au na sega ni lomavakacegu keu sega ni talaucaka vei watiqu na lomaqu. Au rawa ga ni guilecava na leqa e yaco ke sa veivosakitaki oti.”—Amelia.

“E vaka ga na nodra veivaqaqai na ovisa. Ni caka tiko na veivosaki, au dau saga meu vakasamataka se cava sara mada na vu ni leqa.”—Lusi.

Era kauaitaka ga na tagane na iwali ni leqa. E sega ni kurabuitaki qori baleta era kila na tagane nira na nuitaki ke ra walia rawa e dua na leqa. Ni vakatututaka e dua na tagane na iwali ni leqa, e via vakaraitaka tiko vei watina ni rawa ni vukei koya. Qori na vuna era dau kidroa kina na tagane vakawati ni sega ni ciqomi rawarawa nodra vakatutu. E kaya o Vili e dua na tagane vakawati: “Au sega ni taura rawa se cava me veivosakitaki kina na leqa ke o sega ni vinakata e dua na kena iwali!”

E kaya na ivola The Seven Principles for Making Marriage Work “ni bibi me kilai rawa na ituvaki ni bera na veivakasalataki. Ni bera ni o vakatututaka na iwali ni leqa, vakaraitaka rawa vei watimu ni o kauaitaka na ituvaki e sotava tiko, o kauaitaki koya  tale ga. Levu na gauna e sega ni vinakata o watimu mo vakasamataka e dua na iwali ni leqa, e vinakata ga mo rogoci koya.”

KA O RAWA NI CAKAVA

Tagane vakawati: Saga mo dau rogoci watimu vinaka, mo kila na ituvaki e sotava tiko. E kaya e dua na tagane vakawati o Tomasi: “Ni talaucaka o watiqu na lomana ena so na gauna, au dau nanuma ‘ni sega sara ga ni yaga’ na noqu vakarorogo. Ia qori ga na ka e dau vinakata ena levu na gauna o watiqu, meu rogoci koya.” E kaya o Sitiveni e dua tale na tagane vakawati: “Au raica ni vinaka meu kua ni vosa, meu vakarorogo tu ga ni talaucaka o watiqu na lomana. Levu na gauna ni oti na nona vosa, e dau kaya ni cegu sara ga na lomana.”

Tovolea qo: Ni drau veivosakitaka tale vakaveiwatini e dua na leqa, kua ni veivakasalataki ke sega ni gadrevi. Raici koya ena gauna e vosa tiko kina, qai rogoca vinaka na ka e kaya. Deguvacu, cavuta tale eso na ka e tukuna mo vakaraitaka kina ni o sa taura rawa na ka a vakamacalataka. E kaya e dua na tagane vakawati o Jale: “E dau via vakadeitaka ga ena so na gauna o watiqu niu kila na kena ituvaki, niu na tokoni koya tale ga.”—iVakavuvuli vakaivolatabu: Jemesa 1:19.

Yalewa vakawati: Tukuna vei watimu na ka o vinakata me cakava. E tukuna o Eleni e dua na yalewa vakawati: “Eda na rairai nanuma ena so na gauna nira kila na keda isa na veika eda vinakata, ia ena so tale na gauna ena vinakati meda vakamatatataka vei ira.” Qo na nona vakatutu e dua na yalewa vakawati o Lisa: “Au na rairai kaya, ‘Dua na ka au kauai tiko kina, au kerea mo rogoci au mada. Au sega ni vinakata mo walia na leqa, au vinakata ga mo kila na lomaqu.’”

Tovolea qo: Ke vakatututaka totolo o watimu na iwali ni leqa, kua ni nanuma ni sega ni kauai. De dua e via vukei iko ga. E kaya o Eseta e dua na yalewa vakawati: “Au saga meu kua ni dau cudru, meu nanuma tiko ni kauaitaki au o watiqu, e via rogoci au, e via veivuke tale ga.”—iVakavuvuli vakaivolatabu: Roma 12:10.

Tagane, yalewa vakawati: Eda dau cakava vei ira eso tale na veika eda vinakata mera cakava tale ga vei keda. Ia ni drau veivosakitaka vakaveiwatini e dua na leqa, e bibi mo drau dui vakasamataka na veika e vinakata o kemudrau isa. (1 Korinica 10:24) E kaya o Maikeli e dua na tagane vakawati: “Me yalorawarawa o tagane vakawati me vakarorogo. O yalewa vakawati me yalorawarawa tale ga ena so na gauna me rogoca na iwali ni leqa e vakatututaki. Ena vinaka nomudrau bula vakawati ke drau yalorawarawa ruarua.”—iVakavuvuli vakaivolatabu: 1 Pita 3:8.

^ para. 4 Na veika ena veivosakitaki ena ulutaga qo ena rairai sega ni ganiti ira kece na veiwatini. Ia na kena ivakavuvuli e rawa ni vukea e dua na tagane se yalewa vakawati me kila vinaka na kena isa, me vakavinakataka tale ga na nona ivakarau ni veivosaki.

^ para. 7 Sa veisau na yaca ena ulutaga qo.