Raica sara na lewena

Raica na lewenivola

Na ivakavuvuli yaga e vaka na kabasi nuitaki ena rawa ni dusimaki luvemu ena sala me muria

 VEI IRA NA ITUBUTUBU

7: iVakavuvuli

7: iVakavuvuli

CAVA E OKATI KINA?

Na ivakavuvuli e rawa ni okati kina na ivakarau o digia mo muria. Kena ivakaraitaki, e nomu ivakarau mo daudina ena ka kece? De dua qori tale ga na ivakarau o vinakata mo tuberi luvemu kina.

Na ivakavuvuli e okati tale ga kina na itovo. Kena ivakaraitaki, o koya e vakavulici vinaka e dau gugumatua, sega ni veitovaki, qai dauveinanumi. Na itovo kece qori e vinaka me se tekivu bucini sara ga ni se gone e dua.

IVAKAVUVULI VAKAIVOLATABU: “Mo vakavulica na gone ena sala me muria, ni qase mai ena sega ni gole tani mai kina.”—Vosa Vakaibalebale 22:6.

VUNA E BIBI KINA NA IVAKAVUVULI

Bibi me vinaka na veituberi ni sa levu na iyaya vovou vakalivaliva ena gauna qo. E kaya e dua na tina o Karyn: “Sa rawa ni saravi na ka ca ena iyaya vakalivaliva ena gauna cava ga e vinakata kina e dua. E rawa ni sarava mada ga o luveda na ka tawakilikili ni dabe toka e yasada!”

IVAKAVUVULI VAKAIVOLATABU: ‘O ira na matua e vakavulici nodra vakasama mera vakaduiduitaka na ka e donu mai na ka e cala.’—Iperiu 5:14.

Bibi me vakavulici na gone me vakaitovo. E okati kina eso na ka lalai sara me vaka na nona kerekere se vakavinavinaka. Me vakavulici tale ga me veikauaitaki, sa tu tu yadua me laurai na itovo qori ena gauna qo ni sa kauaitaki vakalevu cake na iyaya vakalivaliva mai na tamata.

IVAKAVUVULI VAKAIVOLATABU: “Na ka . . . oni vinakata mera cakava vei kemuni na tamata, moni cakava tale ga vei ira.”—Luke 6:31.

KA O RAWA NI CAKAVA

Vakamatatataka na ivakavuvuli me muri. Kena ivakaraitaki, e laurai ena vakadidike ni o ira na itabagone era vakavulici ni cala na veiyacovi ni bera na vakawati, era sega ni dau vakayacora na ivalavala qori.

VAKATUTU: Vakayagataka e dua na itukutuku butakatakata me yavu ni nomu veivosakitaka na itovo. Kaya mada ke o rogoca ena nius ni vakayacora e dua na ivalavala kaukaua vua e dua tale ena dela ni cudru, o rawa ni kaya: “E vakadomobula na sala era vakaraitaka kina eso nikua na nodra cudru. Cava o nanuma ni vakavuna na nodra cudru?”

“Ena dredre mera vakatulewataka na gone na ka e vinaka kei na ka e ca, ke ra sega mada ga ni kila na ka e vinaka kei na ka e ca.”—Brandon.

Veituberi ena itovo vinaka. E rawa mada ga nira vakavulici na gonelalai mera kaya “kerekere” se “vinaka,” mera dau veinanumi tale ga. E kaya na ivola na Parenting Without Borders: “Ke ra tuberi na gone mera kua ni nanumi ira ga ena nodra vuvale, koronivuli, se itikotiko, era na sega ni cakava na veika e yaga ga vei ira, ia na veika e yaga vei ira eso tale.”

VAKATUTU: Solia vei ira na luvemu eso na cakacaka e vale mera vulica kina mera dau veivuke.

“Ke ratou vakamatauni rawa qo na luvequ ena cakacaka ni vale, ena rawarawa sara me ratou qaravi ratou ga. Eratou na sega ni vulagi ena cola itavi.”—Tara.