Raica sara na lewena

Raica na lewenivola

Na isausau e vaka na peleni ni vale, ena vinakati na sasaga me qai vakavotukana

 VEI IRA NA ITABAGONE

12: iSausau

12: iSausau

CAVA E OKATI KINA?

Na isausau e sega wale ga ni tatadrataki, e dua na ka o vinakata me yaco dina. E okati kina na inakinaki, yalorawarawa, kei na sasaga.

Eso na isausau e lekaleka ga na gauna e rawati kina (vica ga na siga se macawa), eso ena via balavu toka (vakavula), so tale ena taura toka e dua na gauna (dua na yabaki se sivia). E dau sasagataki e liu na isausau lalai, oti sa qai sasagataki na isausau lelevu.

VUNA E BIBI KINA NA ISAUSAU

Ni o rawata na nomu isausau, o na nuidei, marau vakalevu, ena qaqaco tale ga nomu veitokani.

Kua ni beci iko: Ni o tekia qai sauva na isausau lalai, o na nuidei mo sauva na isausau lelevu. O na nuidei tale ga ni o sotava na veika dredre e veisiga. Kena ivakaraitaki, o na sega ni vakamalumalumu ena nodra veivakamuai eso tale mo cakava na ka ca.

Veitokani: E dau marautaki na veimaliwai kei ira e tiko nodra isausau. O ira qori era kila na ka era vinakata, ra qai yalorawarawa mera cakacakataka na ka era vinakata. Na sala vinaka duadua me vaqaqacotaki kina na veitokani, oya mo cakacaka vata kei na dua e tautauvata nomudrau isausau.

Marau: Ni o tekia qai sauva nomu isausau, o na marautaka na nomu rawaka.

“E dau vakamarautaki au na noqu isausau. Au sega kina ni vakalusi gauna, qai uqeti au meu sasaga tiko ga. Ni o sauva nomu isausau, o na vakila na marau, o na rairai kaya, ‘Au sega sara ga ni tadra niu na rawata na noqu isausau.’”—Christopher.

IVAKAVUVULI VAKAIVOLATABU: “Ke o waraka sara na gauna e donu kina vei iko na cagi kei na draki, o na sega ni teitei, sega tale ga ni tatamusuki.”​—Dauvunau 11:4, Today’s English Version.

KA O RAWA NI CAKAVA

Muria na vakatutu qo mo tekia qai sauva kina nomu isausau.

Dikeva nomu isausau. Cakava e dua na lisi, qai tuvani ira me tekivu sara ga mai na kena e bibi duadua. Digia na isausau mo na sauva duadua e liu, kena ikarua, ikatolu, ra qai veitaravi yani na kena vo.

Lalawa. Cakava qo ena nomu isausau yadua:

  • Lokuca e dua na gauna me rawati kina nomu isausau.

  • Lalawataka na ka mo cakava.

  • Vakasamataka na veika dredre e rawa ni yaco, kei na sala mo walia kina.

Tekivu sara. Kua ni waraka me tu kece na itukutuku matailalai ni ka mo cakava mo qai tekivu. E vinaka mo taroga, ‘Na cava na imatai ni ka meu cakava meu sauva kina noqu isausau?’ Cakava sara qori. Vola na ka o rawata ni o sasagataka tiko nomu isausau.

IVAKAVUVULI VAKAIVOLATABU: “Na lalawa ni tamata gumatua ena tini vinaka ga.”​—Vosa Vakaibalebale 21:5.