Raica sara na lewena

Raica na lewenivola

Na cakacaka vakaukaua e vaka ga na vakaukauayago, ena yaga vei iko ena gauna qo kei na gauna se bera mai

 VEI IRA NA ITABAGONE

11: Dau Cakacaka

11: Dau Cakacaka

CAVA E OKATI KINA?

O ira era dau cakacaka era sega ni madua na cakacaka. Ke ra sega mada ga ni taleitaka eso tale na ka era cakava, era na cakacaka ga vakaukaua mera vakarautaka na ka mera bula kina, ra veivukei tale ga.

VUNA E BIBI KINA MO DAU CAKACAKA

Ke o taleitaka se sega, e levu na itavi me qaravi ena noda bula. E levu nikua era sega ni taleitaka mera cakacaka vakaukaua, ia ena yaga vei iko nomu cakacaka vakaukaua.—Dauvunau 3:13.

“Au raica ni o na vakila na lomavakacegu qai taleitaki ni o cakacaka vakaukaua. Au taleitaka na cakacaka baleta ni solia vei au na lomavakacegu. Ni vinaka na nomu ivakarau ni cakacaka ena vinaka tale ga na kemu irogorogo.”—Reyon.

IVAKAVUVULI VAKAIVOLATABU: “E yaga na cakacaka kaukaua kece.”—Vosa Vakaibalebale 14:23.

KA O RAWA NI CAKAVA

Bucina na rai donu me baleta na cakacaka ni o muria eso na vakatutu yaga qo.

Saga mo cakava vinaka nomu cakacaka. Ke o mani cakava na nomu itavi e vale, lesoni e koronivuli, se cakacaka saumi, saga mo vulica vinaka na nomu cakacaka. Ke o cakava vinaka mada ga nomu itavi, vakasamataka na sala mo vakavinakataka tiko ga kina nomu cakacaka. Saga mo dau totolo ena nomu cakacaka, qai tosoya cake tiko ga kena ivakatagedegede. O na marautaka vakalevu nomu cakacaka ke o kenadau kina.

IVAKAVUVULI VAKAIVOLATABU: “O sa bau raica e dua e kenadau ena nona cakacaka? Ena tu o koya e matadra na tui; ena sega ni tu e matadra na tamata wale.”—Vosa Vakaibalebale 22:29.

Me donu nomu rai. Ena yaga vei ira eso tale na nomu kauaitaka na nomu itavi. Kena ivakaraitaki, ni o makutu ni cakava nomu itavi, ena mamada na icolacola vei ratou na nomu vuvale.

IVAKAVUVULI VAKAIVOLATABU: “E marau vakalevu o koya e solia na ka, vakalailai o koya e taura na ka.”—Cakacaka 20:35.

Vakaliuliu. Kua ni nanuma mo cakava e vica ga na itavi e soli vei iko, saga me levu tale na ka o cakava. Kena ibalebale e tu sara ga vei iko na lewa ena levu ni ka mo cakava. O na sega ni vakasaurarataki, ia me vu sara ga mai lomamu na ka o via cakava.—Maciu 5:41.

IVAKAVUVULI VAKAIVOLATABU: “Me rawa ni vu mai lomamu na ka vinaka o cakava, mo kua ni vakasaurarataki kina.”—Filimoni 14.

Me veiraurau na ka o cakava. O ira na dau cakacaka era sega ni vucesa, se bobula ina nodra cakacaka. Era saga mera veiraurautaka na ka era cakava, me rawa nira marautaka nodra cakacaka kei na nodra gauna ni vakacegu.

IVAKAVUVULI VAKAIVOLATABU: “E vinaka me sinai e dua na liga ena vakacegu, e ca ni sinai ruarua na liga ena cakacaka kaukaua qai tautauvata kei na cemuria na cagi.”​—Dauvunau 4:6.