Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Nira Lolosi na Gone

Nira Lolosi na Gone

Ke o lolositaka tiko nona takali e dua na lewe ni nomu vuvale, na cava ena rawa ni vakacegui iko? Raica mada na sala e vakacegui ratou kina e tolu na itabagone na iVolatabu ena gauna eratou lolosi voli kina.

TALANOATAKA O DAMI

Dami

A mosi ga vakalailai na ului noqu ta. Gauna sa kaukaua kina na mosi, a qirita sara na lori e dau usa tauvimate i valenibula o noqu na. Au se nanuma vinaka tu na nona kau o noqu ta i valenibula, au sega ni kila ni sa iotioti ni gauna ya keirau na veirai kina. Oti e tolu na siga, a mate o noqu ta ena matenimona. Au se qai yabaki ono ga ena gauna qori.

E vica na yabaki noqu beitaki au voli ena nona mate o noqu ta. Au dau vakasamataka na gauna sa kau kina i valenibula, au qai veinanuyaka: ‘Cava au duri tu ga kina vakadua, au sega ni bau cakava e dua na ka?’ Niu raici ira na itabaqase era tautauvimate, au dau vakasamataka, ‘Cava e mate kina o noqu ta, ra qai bula tiko o ira qo?’ Ni toso na gauna, sa qai vukei au o noqu na meu talaucaka na lomaqu. Era veivuke tale ga na lewenilotu, o ira na iVakadinadina i Jiova.

Era nanuma eso ni o na lolosi ena gauna ga e takali kina e dua, oti sa na seavu nomu rarawa. Ia a sega ni va qori na ka au sotava. Au qai lolosi niu sa itabagone.

Au kerei kemuni na itabagone oni lolositaka tiko na nona takali na nomuni itubutubu, “moni talaucaka na lomamuni. Na totolo ga ni nomuni talaucaka na lomamuni, na kena vinaka.”

E mosimosi dina ni sa sega ni tiko o ta me keirau marautaka vata na veika totoka e yaco ena noqu bula. Ia e veivakacegui na yalayala ena Vakatakila 21:4, e tukuni kina ni na ‘qusia tani na Kalou na wainimata kece mai na matada, sa na sega tale na mate, na lolosi, na tagiyaso, kei na mosi.’

TALANOATAKA O DERRICK

Derrick

Au dau nanuma lesu na neirau lai siwa kei na neirau dau keba ena veiulunivanua kei noqu ta. E dau taleitaka vakalevu o koya me lako ina veiulunivanua.

E tauvi ta voli ena loma ni dua na gauna na mateniuto, au lai sikovi koya vakadua se vakarua e valenibula niu se gone. Ia au sega ni kila ni sa tauvimate bibi sara. A mate o ta ena mateniuto niu se qai yabaki ciwa.

Ena gauna e mate kina, au tagi tu ga. Au nanuma ga ni sa na tasogo noqu icegu, au qai sega ni via veitalanoa kei na dua. E se qai bau vakadua meu rarawa vakalevu, au sega sara ga ni via cakava e dua na ka. Era kauaitaki au na itabagone ena lotu au lewena,  ia e seavu totolo ga na nodra kauai. Era dau kaya na lewe ni lotu, “sa kena gauna ga me lako kina o nomu ta,” se “sa kacivi koya na Kalou,” se “sa tiko mai lomalagi.” E sega ni veivakacegui na vosa va qori, ia au sega tu ni kila na cava e kaya na iVolatabu me baleti ira na mate.

A qai vulica na iVolatabu o na kei ira na iVakadinadina i Jiova, keirau tomani koya tale ga kei tuakaqu. Keitou vulica na kedra ituvaki na mate, kei na yalayala ni Kalou me baleta na veivakaturi. (Joni 5:28, 29) Ia na tikinivolatabu e vukei au vakalevu na Aisea 41:10, e tukuna kina na Kalou: “Mo kua ni rere niu tokoni iko. Kua ni taqaya niu nomu Kalou. Au na vakaukauataki iko, io, au na vukei iko.” Noqu kila ni dau tokoni au o Jiova e veivakacegui vakalevu ena gauna au lolosi kina, e se vakacegui au tiko ga qo.

TALANOATAKA O JEANNIE

Jeannie

Niu se qai yabaki vitu, e mate o noqu na ena kenisa. E vaka ga au tadra tu ena siga taucoko. Rau a tiko tale ga o tutu kei bubu ena gauna a mate kina e vale o na. Keitou a vakayakavi yaloka ena yakavi ya. Niu vakasamataka lesu, e sega ni bau dua vei keitou e vakaraitaka ni rarawa. Ia e tuburi au e dua na veilecayaki levu.

Ena gauna a takali kina o na kei na veiyabaki e muri, au nanuma ni dodonu meu vakaukauataki au ena vukui taciqu. Qori na vuna au kubuta lo kina noqu rarawa. Ena gauna mada ga qo, au dau kubuta lo na ituvaki rarawataki au sotava. Ia au kila ni sega ni vinaka ya.

Dua na ka na loloma era vakaraitaka na iVakadinadina i Jiova kei na nodra veitokoni. E se qai tekivu ga neitou lai lotu kei ira, ia nodra kauaitaki keitou na lewe ni lotu e vaka ga keimami sa veikilai makawa tu. E dua taucoko na yabaki nona sega tu ni vakasaqa vakayakavi o ta, nira sa dau vakarautaka mai na lewe ni lotu.

Dua na tikinivolatabu au dau taleitaka na Same 25:16, 17. E kerea e keri na daunisame vua na Kalou: “Ni vagolea vei au na matamuni qai nanumi au, niu tu taudua qai vakaloloma. Sa vakalevutaki na rarawa ni lomaqu, ni sereki au mai na noqu yaluma.” Na nomu kila ni na tu e yasamu na Kalou me tokoni iko ena gauna ni rarawa sa bau veivakacegui dina. E vakaukauataki au na iVolatabu meu kua ni soro, meu vakasamataka tale ga na veika totoka e yalataki tu kina me vaka na veivakaturi. Au nuidei niu na raici noqu na tale. Gauna keirau sota tale kina, sa na marautaki tu ena vuravura parataisi na bula uasivi.—2 Pita 3:13.

O na via vulica eso tale na itukutuku veivakacegui ena iVolatabu me baleti ira na lolosi? E rawa ni download na brochure “Ni Mate e Dua na Wekamu Voleka.” Rai ena www.jw.org, gole ina KA E VAKARAUTAKI > IVOLA & BROCHURE.