Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA RAI NI IVOLATABU

Na Kauveilatai

Na Kauveilatai

Era nanuma e levu ni ivakatakarakara ni lotu vaKarisito na kauveilatai. Ia eso tale era nanuma ni sega ni dodonu me taubeni na kauveilatai se vakaliligi e loma ni vale se valenilotu.

Vakacava a mate o Jisu ena kauveilatai?

KA ERA TUKUNA ESO

 

Era vakamatei Jisu na kai Roma ena kauveilatai, e vakayagataki kina e rua na tiki ni kau.

KA E KAYA NA IVOLATABU

 

A vakamatei o Jisu “ni vakaliligi ena dua na vunikau.” (Cakacaka 5:30, The New Jerusalem Bible) Na vosa ruarua era vakayagataka na dauvola iVolatabu me vakamacalataka na sala e vakamatei kina o Jisu, e vakaraitaka ni a vakayagataki ga e dua na kau, sega ni rua. E kaya na ivola na Crucifixion in Antiquity ni vosa vaKirisi na stau·rosʹ, e vakaibalebaletaka ga “e dua na kau balavu. E duidui na ‘kauveilatai.’” Na vosa na xyʹlon e vakayagataki ena Cakacaka 5:30, e dusia “e dua ga na tolonikau dodonu se kau balavu momoto era dau vakoti ira kina era cala na kai Roma.” *

E tautauvata kei na dua na lawa a soli vei ira na Isireli na ka e kaya na iVolatabu me baleta na sala a vakamatei kina o Jisu. A tukuni ena lawa: “Ke dua e valavala ca qai kena itotogi na mate, sa vakamatei o koya qai vakaliligi ena kau, . . . o koya e vakaliligi ena kau e cudruvi vua na Kalou.” (Vakarua 21:22, 23) A vakaibalebaletaka tiko na lawa qori na yapositolo o Paula ni kaya me baleti Jisu: “A cudruvi ena vukuda, ni volai: ‘E cudruvi o koya e vakaliligi ena kau [xyʹlon].’” (Kalatia 3:13) A kaya tiko e keri o Paula ni a vakamatei o Jisu ena kau, dua ga na tolonikau.

“Era vakamatei koya nira vakaliligi koya ena dua na vunikau.”Cakacaka 10:39, The New Jerusalem Bible.

 Eratou vakayagataka beka ena nodratou sokalou na tisaipeli i Jisu na kauveilatai? Eratou vakabauta ni ivakatakarakara ni lotu vaKarisito?

KA E KAYA NA IVOLATABU

 

Sega vakadua ni tukuni ena iVolatabu nira vakabauta na lotu vaKarisito taumada ni ivakatakarakara ni lotu vaKarisito na kauveilatai. Era dau vakayagataka ga na kai Roma na kauveilatai me ivakatakarakara ni nodra kalou. Oti e rauta ni 300 na yabaki na mate i Jisu, a vakayagataka na empara ni Roma o Constantine na kauveilatai me ivakatakarakara ni nona mataivalu. Sega ni dede sa vakabauti tale ga me ivakatakarakara ni lotu “vaKarisito.”

Era vakayagataka na lotu butobuto na kauveilatai ena nodra sokalou, ia era sega ni cakava qori na tisaipeli i Jisu. Era kila ni se vakarota makawa sara na Kalou me kua ni vakayagataki ena sokalou “na ivakatakarakara,” mera “dro tani mai na qaravi matakau” na lotu vaKarisito. (Vakarua 4:15-19; 1 Korinica 10:14) “E yalo na Kalou,” e sega nida raici koya rawa na tamata. Qori na vuna era sega ni vakayagataka kina na ivakatakarakara na lotu vaKarisito taumada mera toro voleka kina vua na Kalou. Era sokalou ga “vakayalo” ni dusimaki ira na yalo tabu, qai yavutaki ena “dina” nodra sokalou me salavata kei na loma ni Kalou ena iVolatabu.—Joni 4:24.

‘Era na sokalou vakayalo o ira era sokalou dina, ena yavutaki tale ga ena dina nodra sokalou.’Joni 4:23.

Mera vakaraitaka vakacava na lotu vaKarisito nira dokai Jisu?

KA ERA TUKUNA ESO

 

“E dodonu me dokai qai sokaloutaki na ivakatakarakara ena rawati kina na bula. . . . O koya e sokaloutaka na ivakatakarakara, sa sokaloutaki koya tiko e vakatakarakarataka.”New Catholic Encyclopedia.

KA E KAYA NA IVOLATABU

 

E yaga dina vei ira na lotu vaKarisito na mate i Jisu, e rawa nira torova kina na Kalou, vosoti nodra ivalavala ca, qai nuitaka na bula tawamudu. (Joni 3:16; Iperiu 10:19-22) Ia e sega ni tukuni mera rokovi Jisu ena nodra bulia e dua na kena ivakatakarakara. E sega tale ga ni rauta mera kaya nira vakabauti koya. Na vuna? “Na vakabauta . . . ena mate ke sega na cakacaka.” (Jemesa 2:17) E bibi mera cakacakataka na lotu vaKarisito na nodra vakabauti Jisu. Era na cakava vakacava qori?

E kaya na iVolatabu: “Ni uqeti keitou na loloma i Karisito, e va kina qo na neitou lewa, e mate e le dua ena vukuda kece . . . mera kua kina ni bula ena vukudra ga o ira era bula tiko, mera bula ga ena vuku i koya e mate ena vukudra, qai vakaturi cake.” (2 Korinica 5:14, 15) Na ivakaraitaki vakasakiti ni loloma i Jisu e uqeti ira na lotu vaKarisito mera veisautaka nodra ivakarau ni bula qai muria nona ivakaraitaki. Nodra cakava qori mera dokai Jisu kina e vakaibalebale cake mai na nodra vakayagataka e dua na ivakatakarakara.

“Qo na loma i Tamaqu, me bula tawamudu o koya yadua e raica na Luvena qai vakaraitaka ni vakabauti koya.”Joni 6:40.

^ para. 8 A Critical Lexicon and Concordance to the English and Greek New Testament, ika11 ni iTabataba, vola o Ethelbert W. Bullinger, tabana e 818-819.