Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 BULA VAKAIDEWADEWA SE BULI?

Na iWalewale ni Nona ro na Oni

Na iWalewale ni Nona ro na Oni

E SEGA ni dua na leqa vua na oni na vanua me ro kina. Se mani iwalewale cava e muria, ena ro ga vakavinaka. E rawa vakacava qori?

Vakasamataka mada: Me rawa ni ro vakavinaka na oni, ena vinakati me vuka vakamalua. Rua na ka me cakacakataka e liu na oni, kena imatai na totolo ni nona vuka kei na kena ikarua na yawa ni vanua me ro kina. Ni sa cakacakataka rawa qori na oni, sa na qai kila na gauna me vuka kina vakamalua. Ia na iwalewale qori ena dredre vei ira na manumanu lalai sa rui veivolekati na matadra, e sega ni rawa mera rai vakayawa.

E sega ni gadrevi me vakayagataka na oni na vakadodorairai me vakataki keda na tamata. E kila na oni ni na qai laurai vinaka sara na ka ni sa volekata yani. Na totolo ga ni nona vuka na oni, na totolo tale ga ni kena ka levu na ka e raica. Qori na vuna e tukuni kina ena dua na vakadidike mai Ositerelia ni dau vuka vakamalua na oni me rawa ni kua ni veisau totolo na ka levu ni ka e raica. Ni volekata na oni na vanua me ro kina, na malua ni nona vuka e rawa ni nanumi tale ni tu ga vakadua se sega sara ga ni toso. Na iwalewale ni vuka qori e vukea na oni me ro vakavinaka.

E kaya na mekesini na Proceedings of the National Academy of Sciences: “E sega ni vereverea na iwalewale ni nona ro na oni, e rawarawa sara . . . qori e [vakavuna] mera via vakatotomuria eso na iwalewale ni nona ro na oni ena kena buli na robot e rawa ni vuka.”

Na cava o nanuma? E vu mai na bula vakaidewadewa na iwalewale ni nona ro na oni se sa buli vata mai?