Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA MATANITU ENA WALIA NA LEQA

“Na Kena Sautu ena Sega ni Oti”

“Na Kena Sautu ena Sega ni Oti”

E veiuqeti na Matabose kei Vuravura meda duavata na lewe i vuravura, meda doka nodra dodonu eso tale, taqomaka tale ga na noda veikabula. Na vuna? E kaya o Maher Nasser ena UN Chronicle, ni sega ni yalani ena dua na vanua se matatamata “na veisau vakasauri ni draki, tubu ni veivakaduiduitaki, bula veisei e sega ni wali rawa, veiseyaki e vuravura raraba kei na basulawa, na matedewa, kei na ituvaki kece e leqataki kina noda bula.”

Eso tale e duatani sara nodra sasaga, oya me dua na matanitu e veiliutaki e vuravura raraba. Dua vei ira o Dante (sucu ena 1265, mate ena 1321) na vuku ni Itali, e dauniserekali qai vakailesilesi ni matanitu, vaka kina na saenitisi rogo o Albert Einstein (sucu ena 1879, mate ena 1955). E vakabauta o Dante ni na sega ni tawamudu noda marautaka na sautu, ke yaco tiko ga na veisei vakapolitiki ena noda vuravura. E cavuqaqataka na vosa i Jisu Karisito ni “matanitu e tawase vakataki koya ena rusa.”— Luke 11:17.

Ni oti ga vakalekaleka na iKarua ni iValu Levu, a vakacabotetaki e dua na bomu vakaniukilia, e volavola kina o Albert Einstein ina Matabose Levu ni Matabose kei Vuravura. E kaya: “Me yavala totolo na Matabose kei Vuravura, me tuvanaka e dua na matanitu me veiliutaki e vuravura, me rawati kina na veisau e veiganiti.”

Ia vakacava o ira na daunipolitiki era na lesi mera veiliutaki ena matanitu qori, era na cakacaka vakadodonu, ra vakayacora vinaka na nodra itavi, ra qai sega ni veivakacacani? Se ra na tautauvata ga kei ira na dau veiliutaki tale eso e ca na nodra ivakarau? Na taro qori e lai nanumi kina na ka e tukuna e dua na daunitukutuku makawa ni Peritania o Lord Acton ni dau “laurai na veidabui ena veiliutaki, qai dua dina na veidabui levu.”

Me rawa ni bula sautu qai veiyaloni na vuvale e dodonu meda duavata. Ena rawati vakacava? Ena rawati dina se tadra wale ga? E kaya na iVolatabu ni rawa sara ga ni vakayacori dina. Ena sala cava? Ena sega ni rawa ni cakava qori e dua na matanitu era veiliutaki kina na daunipolitiki era veidabui. Na Kalou ga ena tauyavutaka e dua na matanitu. Na matanitu tale ga qori ena vakaraitaka kina na Kalou nona dodonu me liutaki ira na nona ibulibuli. Na matanitu cava qori? E vakatokai ena iVolatabu me “Matanitu ni Kalou.”—Luke 4:43.

“ME YACO MAI NA NOMUNI MATANITU”

A vakasamataka tiko o Jisu Karisito na Matanitu ni Kalou ni cavuta na ivakarau ni masu me caka: “Me yaco mai na nomuni Matanitu. Me caka na lomamuni e vuravura.” (Maciu 6:9, 10) Io na Matanitu ni Kalou ena vakayacora dina ga na loma ni Kalou e vuravura, sega ni lomadra na dau kocova na veiliutaki ra qai nanumi ira ga.

Na Matanitu ni Kalou e kilai tale ga me “Matanitu vakalomalagi.” (Maciu 5:3) Na vuna? Ena liutaka na vuravura na Matanitu qori, ia ena veiliutaki ga mai lomalagi, ena sega ni tiko maliwai keda. Vakasamataka mada ya, ena sega ni vinakata na veivuke vakayago se na ilavo. Era na lomavakacegu dina na vakarurugi ena matanitu qori!

Na matavosa “Matanitu” e vakaibalebaletaki ina dua na matanitu vakaturaga ni Kalou. Na kena Tui o Jisu Karisito e lesi koya kina na Kalou. E kaya gona na iVolatabu me baleti Jisu:

  •   “Ena vakatau na lewa ena nona matanitu . . . na tubu ni nona lewa kei na kena sautu ena sega ni oti.”—Aisea 9:6, 7, ivakadewa ni King James Version.

  • “E soli vua na lewa, na lagilagi, kei na matanitu mera qaravi koya kece na lewe ni veivanua, na veimatatamata, kei na duivosavosa. Na nona lewa . . . ena sega ni oti.”—Taniela 7:14.

  • “Na matanitu kei vuravura sa mai Matanitu ni noda Turaga [Kalou] kei na nona Karisito.”—Vakatakila 11:15.

Me salavata kei na masu ni Turaga a cavuta o Jisu, na Matanitu sara ga ni Kalou ena qai vakayacora na loma ni Kalou e vuravura. Ena vakavulici ira na kawatamata mera veisautaka na vuravura me rairai totoka tale qai marautaki kina na bula.

Na Matanitu ni Kalou ena vakavulici ira tale ga na vakarurugi kina. Ena dua ga na ivakatagedegede era na muria. Ena sega na duiyaloyalo se na veisei. E kaya na Aisea 11:9: “Era na sega ni veivakaleqai se veivakarusai . . . ni na robota na vuravura na kilaka me baleti Jiova me vaka e ubia na wasawasa na wai.”

O ira na bula e vuravura era na qai vakila na ka era dau diva voli na lewe ni Matabose kei Vuravura, oya na bula sautu kei na veilomani. E kaya na Same 37:11: “Era na kunea na marau vakasakiti ena levu ni vakacegu.” Qori na gauna sa na sega tale kina ni rogo na vosa me vaka na “basulawa,” “veivagagai,” “dravudravua,” kei na “ivalu.” Ia ena yaco ninaica? Ena veiliutaki vakacava na Matanitu ni Kalou? Ena yaga vakacava vei iko na kena veiliutaki? Meda dikeva mada.