Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

Nodra dauloloma na itubutubu era na vuli kina na luvedra

 IWALI NI LEQA

Vulica na Duidui ni iTovo Vinaka kei na iTovo Ca

Vulica na Duidui ni iTovo Vinaka kei na iTovo Ca

E beitaki eso na cauravou nira kucuva e dua tale na cauravou nira gole tiko ena dua na ilakolako e tuvanaka na nodra koronivuli. Era vuli kece tiko ena dua na koronivuli rogo e Kenada. Ni oti na kena yaco qori, e vola o Leonard Stern ena niusipepa na Ottawa Citizen: “Na vuku, vuli vinaka, se vutuniyau ena sega ni tarovi ira na itabagone mera cakava na ka ca.”

E tomana o Stern: “De dua o namaka mera vakavulici luvedra na itubutubu ena ka e vinaka kei na ka e ca. Ia kena irairai nira kauaitaka ga e levu mera vuli vinaka na luvedra, cakacaka vinaka, mera rawa ilavo tale ga.”

Io e bibi na vuli. Ia na vuli vinaka mada ga ena sega ni vorata kina e dua na gagadre ca. Eda na vulica ga vakacava na itovo vinaka?

NA VULI ME BALETA NA VEIKA VAKAYALO KEI NA ITOVO E SAVASAVA

Na iVolatabu e vaka na iloilo. Nida ilovi keda kina eda na raica vinaka na keda ituvaki, kei na noda malumalumu. (Jemesa 1:23-25) Ia e dua tale na ka e yaga kina na iVolatabu. E vukei keda meda cakava na veisau e vinakati, da qai muria na itovo e uqeta na veiyaloni kei na bula vakacegu. E okati kina na itovo me vaka na yalovinaka, yalololoma, vosovoso, lewai keda vinaka, kei na loloma. E vakatokai mada ga na loloma me “ivau vinaka duadua ni duavata.” (Kolosa 3:14) Cava e uasivi kina na loloma? Dikeva na ka e kaya na iVolatabu me baleta na itovo qori.

  • “Na loloma e vosovoso qai yalovinaka. Na loloma e sega ni vuvu, e sega ni tukutukuni koya, e sega ni dokadoka [sakitaka], e sega ni cakava na ka e sega ni rakorako, e sega ni kauaitaka ga na ka e baleti koya, e sega ni cudrucudru. E sega ni katona na ca. E sega ni marautaka na ka e sega ni dodonu [ca], e marautaka ga na dina. E ubia na ka kece, . . . e vosota na ka kece. E sega vakadua ni seavu na loloma.”—1 Korinica 13:4-8.

  • “O koya e dau loloma ena sega ni caka ca vua na kainona.”—Roma 13:10.

  • “E bibi duadua moni dau veilomani vakalevu, ni ubia e levu na ivalavala ca na loloma.”—1 Pita 4:8.

Cava o vakila ni o maliwai ira era lomani iko? Io, o na taqomaki, nuidei qai lomavakacegu. O na vakila tale ga nira lomani iko dina, era na sega ni cakava na ka mo rarawa kina.

Na loloma ena uqeti ira eso mera vakuai ira ke vinakati mera veisautaka nodra ivakarau ni bula me yaga vei ira eso tale. Kena ivakaraitaki, eda na vakatoka e dua na tagane o Joji. E tiko e dua na makubuna qai dau vinakata me veimaliwai kei koya. Ia e dau  kana tavako o Joji, e sega gona ni vinakata o vugona me cakava qori ni tiko o makubuna. Cava e qai cakava o Joji? Sa 50 na yabaki nona kana tavako voli, e mani muduka na vakatavako ena vuku i makubuna. Io qori sara ga na ivakaraitaki ni loloma!

Na iVolatabu e vukei keda meda muria na itovo vinaka me vaka na yalovinaka, yalololoma, vakauasivi na loloma

Eda rawa ni vulica meda dauloloma. O ira na itubutubu mera ivakaraitaki vei ira na luvedra ena nodra vakavulici mera dauloloma. Era na vakarautaka na ka mera bula kina, taqomaki ira, qai vakacegui ira ke ra mani rarawa se tauvimate. Na itubutubu vinaka ena veivosaki kei ira na luvedra qai vakavulici ira ena ka e donu, kei na ka e cala. Kena ikuri, na itubutubu dauloloma tale ga ena ivakaraitaki vinaka vei ira na luvedra.

E ka ni rarawa ni so na itubutubu era sega ni qarava vinaka nodra itavi. Vakacava e kena ibalebale qori nira na sega ni itovo vinaka na luvedra? Sega! Eso mada ga era sa qase wili kina o ira na susu ena vuvale e sega kina na duavata, e vakasakiti na veisau era cakava. Era dau yalololoma qai nuitaki. E levu tale ga era nanuma ni so era na sega vakadua ni veisau, ia eda na qai dikeva qori ena ulutaga e tarava.