Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 DREDRE NA NODRAU BULA

Talanoa me Baleti Ricardo kei Andres

Talanoa me Baleti Ricardo kei Andres

E vakavinakataka na bula na veivakavulici e yavutaki ena iVolatabu. Dikeva mada e rua na ivakaraitaki qo: Ricardo kei Andres.

RICARDO: Niu se qai yabaki 15, au lewena e dua na ilawalawa. Era dau uqeti au vakalevu noqu itokani vou. Dau noqu isausau meu tini na yabaki e valeniveivesu! Dua dina na vakasama lialia qori. Ia na vanua au tiko kina era dau qoroi, qai dokai o ira na curu e valeniveivesu. Au vinakata sara ga meu ucui ira.

Au cakava na ka era kilai levu kina na dau bula vakailala, me vaka na vakayagataki ni wainimategaga, veiyacovi kei na itovo voravora. Dua na bogi au vakaitavi ena veivanavanai. Au nanuma niu sa na mate, ia au dro bula. Oti qori au vakasamataka sara ga vakabibi na noqu bula, noqu isausau, au vinakata tale ga meu veisau. Ia ena rawa vakacava? O cei ena vukei au?

E levu na wekaqu era sega ni bula mamarau, era sotava e levu na leqa. Ia e sega ni va qori na ka ratou vakila o noqu momo. Dau vinaka nodratou ivakarau, ratou muria tale ga na ivakavuvuli vakaivolatabu. Au vulica vei ratou ena dua na gauna ni yaca ni Kalou o Jiova. Oti toka ga vakalailai na veivanavanai, au masu vei Jiova niu cavuta sara ga na yacana, qai kerea me vukei au. Au kurabuitaka ni siga tarava ga sa tukituki e katuba e dua na iVakadinadina i Jiova! E qai noqu qasenivuli sara ni iVolatabu.

Au tekivu vakatovolei ena levu na ka. Era dau qiriti au mai noqu itokani me keimami sota. E sega ni rawarawa meu vakasega. Au vakadeitaka meu vulica tiko ga na iVolatabu, au marautaka sara ga noqu cakava qori! Sa vinaka cake sara noqu ivakarau ni bula, au vakila tale ga na marau dina.

Au nanuma lesu noqu masuta na Kalou meu tini na yabaki e valeniveivesu me rawa niu dokai vei ira noqu ilala. Ia qo au sa kerea meu qaravi koya vakatabakidua me tini mada ga na yabaki me rawa niu vukei ira eso tale me vaka ga nona vukei au. E sauma dina na Kalou noqu masu, qo sa 17 na yabaki noqu veiqaravi tiko vakatabakidua! Au sega ga ni tini e valeniveivesu.

Levu vei ira noqu itokani makawa era se curu tu e valeniveivesu me vicasagavulu na yabaki. Eso tale era sa takali. Niu rai lesu, au vakavinavinakataki ratou na wekaqu iVakadinadina i Jiova. Ratou yalorawarawa me ratou ivakaraitaki vinaka ni ratou muria na ivakavuvuli vakaivolatabu. Dua na ka noqu dokai ratou ni vakatauvatani kei ira noqu ilala. Koya e bibi sara, au vakavinavinaka vua na Kalou ni vakavulici au ena ivakarau ni bula vinaka duadua.

 ANDRES: Au sucu qai susu ena vanua dravudravua, e vakayagataki vakalevu kina na wainimategaga, dau tauri vakatawadodonu na iyau, laba, qai levu kina na saqamua. E daugunu alakaolo o tamaqu, qai bobula ina wainimategaga na cocaine. Rau dauveiba tu ga kei tinaqu, rau tauca na vosa mosimosi, rau ivalavala kaukaua tale ga.

Au tekivu gunu alakaolo qai vakayagataka na wainimategaga niu se gone. Levu na gauna au yavoki tu ga e gaunisala, butako, qai volitaka na iyaya au butakoca. Niu sa uabula, ena nona tovolea o tamaqu me keirau veivolekati e vakavulici au ena butakoci kei na volitaki ni wainimategaga, kei na so tale na iyaya e vakatabui ena neimami vanua. Totolo ga noqu rawata e levu na ilavo. Dua na siga ratou gole yani na ovisa e noqu vale, ratou qai vesuki au. Au bala sara e valeniveivesu me lima na yabaki niu beitaki niu via labata e dua.

Dua na mataka a vakarogoi e valeniveivesu nira veisureti tiko na iVakadinadina i Jiova ena kena veivosakitaki na iVolatabu. Au mani nanuma meu lai vakarorogo tu ga. E vakaibalebale dina na ka au rogoca, au mani vulica na iVolatabu kei ira na iVakadinadina i Jiova. Era sega ni wereubiubitaka na tikinivolatabu, ia era vakaraitaka vakadodonu vei au na ivakatagedegede cecere ni itovo savasava ni Kalou.

Au qai liaca ni na sega ni rawa niu veisau ga vakataki au. Ena vinakati e dua me vukei au, vakabibi nira sega ni taleitaka na ka au cakava tiko eso keimami vesu vata. Au mani masuti Jiova me solia vei au na kaukaua kei na vuku. E vukei au dina o koya, au sa sega ni bobula ina nodra veivakarerei. E vakayaloqaqataki au ga meu wasea vei ira na kaivesu na itukutuku ena iVolatabu.

Dua na ka noqu taqaya na gauna au sere kina, au vinakata meu se tiko tale mada e valeniveivesu! Niu sa biubiu era yaloyalo mai e vica na kaivesu. Eso era kaya, “Qai moce toka na italatala.”

Au dau rere niu vakasamataka na ivakarau ni noqu bula keu sega ni vakamalumalumu vua na Kalou me vakavulici au. Dua na ka noqu vakavinavinakataka na Kalou ni lomani au, e sega tale ga ni vakalaivi au meu lakosese. *

^ para. 15 E tiko ena jw.org eso tale na ivakaraitaki ni kena veisautaka na bula na iVolatabu. Gole ina IVAKAVUVULI VAKAIVOLATABU > VAKACEGU & MARAU.