Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

E sega ni sagai ga me wali na ivakatakilakila ni leqa, e dodonu me kilai sara ga na uto ni leqa

 ITUVAKI DREDRE

Kilai na Uto ni Leqa

Kilai na Uto ni Leqa

O vakabauta ni rawa ni walia na kawatamata na levu ni leqa e vakavuna na noda sega ni bula vakacegu kei na sautu, qai rivarivabitaki kina noda veigauna se bera mai? Me rawati qori, ena vinakati meda kila sara ga na uto ni leqa.

Kena ivakaraitaki, a tauvimate o Tom mani mate sara. Cava e mate kina? A vola na vuniwai e veiqaravi tiko ena valenibula a curu kina o Tom: “Ni laurai vua na imatai ni ivakatakilakila ni mate, e sega ni dua e via vaqaqa na vu ni nona tauvimate. Era solia tiko ga vua na wainimate me vinaka kina nona bula.”

Vakacava qori tale ga na ka era cakava tiko na kawatamata ena ituvaki leqataki eda bula donuya tu qo? Kena ivakaraitaki, nira saga na veimatanitu me tarovi na basulawa—ena buli na kena lawa, vakavinakataki na nodra ivakarau ni veiqaravi na ovisa, qai biu na vidio ena so na vanua mera yadravi kina na lewenivanua. Na veika qori e yaga ena so na sala, ia e sega ni tarova rawa na vakayacori tiko ni basulawa. Na nona itovo e dua ena vakavotui kina nona rai, ka e vakabauta, kei na ka e vinakata.

E vakila o Daniel e tiko ena Ceva kei Merika na dredre ni bula vakailavo, e kaya: “E totoka tu na bula e liu. Keitou sega ni leqataki ira na daubutako era vakaiyaragi. Ia ena gauna qo sa sega na bula sautu ena veitauni se koro. Na kena vakilai na leqa vakailavo ni matanitu e vakavotuya nodra itovo e levu—oya na kocokoco kei na nodra sega ni mareqeta na bula, se ka era taukena eso tale.”

Eda na vakatoka e dua na tagane o Iliesa, a qai vulica na iVolatabu ni oti nona drovaka na veisei e yaco tiko ena nona vanua ena tokalau e loma. E kaya: “Levu vei ira na cauravou ena vanua au tiko kina era veiuqeti sara ga nodra vuvale, iliuliu vakapolitiki, kei na iliuliu ni lotu mera vakaitavi ena ivalu, me kilai kina nira tamata qaqa. Era va tale ga qori na ito kadua! Au vakadinata ni maumau wale na noda nuitaki ira na iliuliu vakatamata.”

Ka e kaya e dua na ivola ni vuku makawa:

  • “Ni ca na malele ni lomana mai na gauna sara e se gone kina.”—Vakatekivu 8:21.

  • “E dau veivakaisini duadua ga na loma ni tamata qai rerevaki. O cei me kila rawa?”—Jeremaia 17:9.

  • “E vu mai na loma ni tamata na vakanananu ca, na laba, . . . na veiyacovi tawadodonu, na butako, na lasu.”—Maciu 15:19.

E sega ni kunea rawa na kawatamata na iwali ni itovo ca eda sucukaya mai. Me vaka eda dikeva ena ulutaga sa oti, ni sa qai torosobu ga na itovo ca nikua. (2 Timoci 3:1-5) Na levu mada ga ni kila sa tu nikua, kei na kena torocake na sala ni vakauitukutuku e sega ni walia rawa na leqa qori! Cava gona eda sega ni bula vakacegu tiko kina se meda taqomaki? Vakacava sa sivia tale na ka eda namaka, ia e lailai na ka eda rawa ni cakava? Eda na rawa ni bula sautu e vuravura?

SA RUI DREDRE NA NODA SASAGA?

Ke rawa mada ga ni wali vakacakamana na itovo ca, eda na sega ga ni rawa ni veisautaka na vuravura qo meda taqomaki se vakacegui kina. Na vuna? Ni vakaiyalayala ga noda kaukaua.

Kena dina qo: “E sega ni vu vua na tamata . . . me lewa na nona ilakolako.” (Jeremaia 10:23) Eda sega  ni buli meda lewai keda ga. Io eda sega tale ga ni buli meda lewai ira eso tale, me vaka ga noda sega ni buli meda bula e wai, se maliwalala!

Eda sega ni buli meda lewai ira eso tale, me vaka ga noda sega ni buli meda bula e wai se maliwalala

Vakasamataka mada qo: Vakacava era dau taleitaka na tamata me tukuni vei ira na ivakarau ni bula se itovo mera muria? Era dau taleitaka me lewai na nodra rai me baleta na vakalutu, vakatauitotogi, se na sala mera vakadodonutaki kina na luvedra? Qo eso na ka e dau vakavuna na veisei. Ena rairai dredre toka me ciqomi, ia e vakaibalebale na ka e tukuna na iVolatabu. E sega vei keda na kaukaua se dodonu meda lewai ira eso tale. O cei ga e rawa ni vukei keda?

Io na Dauveibuli ga ena vukei keda. Na vuna? Ni buli keda! Era nanuma eso ni sa guilecavi keda na Kalou, ia e sega ni dina qori. Eda rawa ni vakadinata nona kauaitaki keda ena ivakasala vuku ena iVolatabu. Nida kila vinaka na ivola vakasakiti qori, ena matata na veika e baleti keda, kei na vu ni noda rarawa. Sa rauta me vola e dua na vuku ni Jamani, “era sega ni bau vuli na tamata kei na veimatanitu ena veika sa yaco oti, ra sega tale ga ni veisautaka nodra ivalavala.”

ENA TAQOMAKI KEDA NA VUKU ENA IVOLATABU!

E tukuna va qo e dua na tamata vuku, “ena qai kilai ga o koya e vuku ena ka kece e cakava.” (Luke 7:35) Kena ivakaraitaki, e volai ena Aisea 2:22: “Moni kua ni nuitaka na tamata moni vinaka kina.” Ena taqomaki keda na ivakasala qori meda kua ni nuitaka e dua na ka ena sega ni yaco dina, meda kua tale ga ni namaka vakasivia na ka. E kaya o Kenneth, e tiko ena dua na vanua e dau yaco kina vakalevu na itovo voravora ena Noca kei Merika: “Era yalataka na daunipolitiki kece nira na vakavinakataka na bula, ia e dreve ga. Nodra sega ni rawata na veika era yalataka e vakadinadinataka na ka e kaya na iVolatabu.”

E vola o Daniel sa cavuti oti mai: “Au vakadinata e veisiga na nodra sega ni rawa ni veiliutaki vakavinaka na tamata. . . . E sega ni ivakadei vinaka ni veigauna se bera mai nomu nuitaka nomu ilavo maroroi ena baqe, se na peniseni. Au dau raici ira e levu nira rarawataka vakalevu na ituvaki va qo.”

E sega ni taqomaki keda ga na iVolatabu ena veika tawanamaki, ia e vakarautaka na inuinui eda na vakarau dikeva yani qo.