Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 VAKAOTI VAKADUA NA LEQA

“Ena Qai Vakilai na Sautu” ena Matanitu ni Kalou

“Ena Qai Vakilai na Sautu” ena Matanitu ni Kalou

Sa voleka sara qo na Matanitu ni Kalou eda waraka tiko mai vakadede. E tauyavutaka na Kalou me veiliutaki e vuravura raraba me rawati kina na bula sautu kei na veiyaloni. E yalataka na Same 72:7 ni na “qai vakilai [kina] na sautu.” Ia ena veiliutaki ninaica? Ena veiliutaki vakacava? Ena yaga vakacava vei iko?

ENA VEILIUTAKI NINAICA?

E parofisaitaka na iVolatabu eso na ivakatakilakila vakatubuqoroqoro e dusia ni sa voleka na Matanitu ni Kalou. E okati ena “ivakatakilakila” qori na veivaluvaluti e vuravura, dausiga, tauvimate, uneune lelevu, kei na torocake ni basulawa.—Maciu 24:3, 7, 12; Luke 21:11; Vakatakila 6:2-8.

E tukuni ena dua tale na parofisai: “Ni na duatani sara na iotioti ni veisiga, ena vakilai kina e levu na ka dredre. Nira na dau lomani ira ga na tamata, era na lomana na ilavo, . . . era na talaidredre vei ira nodra itubutubu, era na sega ni dau vakavinavinaka, era na sega ni yalodina, sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakauvosa, era na sega ni lewa vinaka na yalodra, era na voravora, era na sega ni vinakata na ka e dodonu, . . . era na dokadoka, era na lomana ga na marau era sega ni lomana na Kalou.” (2 Timoci 3:1-4) Sa dau laurai tiko na itovo qori ena so na gauna. Ia nikua sa qai levu ga era vakaitovotaka tiko.

Era tekivu vakayacori na parofisai qori ena 1914. Era kaya tale ga na daunitukutuku makawa kei ira na dauvolaivola ni veisau vakalevu o vuravura ni oti na yabaki qori. Kena ivakaraitaki, e vola o Peter Munch na daunitukutuku makawa ni Denmark: “E veisautaki vuravura sara ga na ivalu ena 1914. Ia ni bera na yabaki qori, a totoka tu na bula . . . qai veisau ina leqa tubukoso, yaco na veika vakadomobula, veicati, kei na nodra sega ni nuidei na lewenivanua.”

Eda rawa ni vakatauvatana na ituvaki rarawataki kece qori ina draki ca, ni tiko ga na gauna ena oti kina. Qori sara ga e dusia ni sa voleka ni veiliutaki na Matanitu ni Kalou e vuravura raraba. E dua tale na ivakatakilakila ni icavacava kei vuravura e vakamacalataka o Jisu: “Ena vunautaki mada na itukutuku vinaka qo ni Matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”—Maciu 24:14.

Qori sara ga na usutu ni itukutuku vinaka era vunautaka tiko na iVakadinadina i Jiova. Era tabaka na ivola e wiliki vakalevu, Na Vale ni Vakatawa Kacivaka na Matanitu i Jiova. Na gauna qo sa vakadewataki ena sivia na 338 na vosa. E dau vakamacalataki kina na veika totoka ena cakava na Matanitu ni Kalou vei ira na kawatamata, vaka kina e vuravura.

ENA VEILIUTAKI VAKACAVA?

E laurai kina e va na ka bibi qo:

  1. Ena sega ni veiliutaki kina se cicivaka e dua na iliuliu vakapolitiki e vuravura nikua.

  2. O ira kece na daunipolitiki era veiliutaki tiko nikua e vuravura era na saqata ena yalowai na Matanitu ni Kalou ena nodra via veiliutaki tiko ga.—Same 2:2-9.

  3. Na Matanitu ni Kalou ena vaqeavutaka na matanitu vakapolitiki era via lewai ira tiko ga na kawatamata. (Taniela 2:44; Vakatakila 19:17-21) Na ivalu qori e vakatokai me Amaketoni.—Vakatakila 16:14, 16.

  4. Era na vakabulai ena Amaketoni o ira kece na vakamalumalumu ina Matanitu ni Kalou, ra qai bula ena dua na vuravura vou e sautu. E tukuna na iVolatabu ni o ira qo era lewe ni “isoqosoqo levu,” e rairai vica vata na milioni na kedra iwiliwili.—Vakatakila 7:9, 10, 13, 14.

 ENA YAGA VAKACAVA VEI IKO?

O koya e vinakata me lewe ni Matanitu ni Kalou e dodonu me vuli. E kaya sara ga o Jisu ena nona masu vua na Kalou: “Ena rawata na bula tawamudu, o koya e vulica tiko ga na veika me baleti kemuni na Kalou dina duadua ga, kei Jisu Karisito oni tala mai.”—Joni 17:3.

Ena yaga vakalevu nodra vulica na veika me baleta na Kalou o Jiova. Vakasamataka e rua na sala e yaga kina na vuli qori: Kena imatai, ena qaqaco kina nodra vakabauti koya. Na vakabauta qori e yavutaki ena ka era vakadinadinataka, qai vakadeitaka vei ira ni tiko dina na Matanitu ni Kalou sa voleka sara ni veiliutaki. (Iperiu 11:1) Kena ikarua, era na lomana vakalevu na Kalou kei ira na wekadra. Nodra lomana na Kalou ena uqeti ira mera talairawarawa mai vu ni lomadra. Na nodra lomani ira na wekadra era na muria kina na vosa i Jisu e dau vakatokai me Lawa Koula. E tukuni kina: “Na ka tale ga oni vinakata mera cakava vei kemuni na tamata, moni cakava tale ga vei ira.”—Luke 6:31.

E vaka e dua na Tama dauloloma na Dauveibuli, e vinakata meda marautaka na bula dina. E vinakata meda taura matua na ka e kaya na iVolatabu, oya na “bula dina.” (1 Timoci 6:19) Nikua sa sega ni vakilai na “bula dina.” E le vica vata na milioni e dredre nodra bula qai dua dina na ka ni sasaga qori vei ira. Mo kila na veika e vakarautaki ena “bula dina,” vakasamataka na veika totoka e dolea tu na Matanitu ni Kalou vei ira na vakarurugi kina.

Ni sa veiliutaki na Matanitu ni Kalou era na taqomaki na lewenivanua, ra tiko nuidei, qai levu na kedra kakana