Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ENA RAWATI VAKACAVA NA MARAU?

Veivosoti

Veivosoti

“LEVU NA VEIRU KEI NA VEIKARACI ENA NEITOU VUVALE NIU SE GONE,” e tukuna e dua na marama o Patricia. E kaya tale: “Au sega ni dau veivosoti. Qo mada ga niu sa uabula, rawa ni vica na siga noqu sega ni moce vinaka niu vakasamataka tiko ga e dua na cala e caka vei au.” Io, na cudru kei na yaloca e rawa ni vakaleqa noda bula, eda na sega tale ga ni marau. E laurai ena vakadidike ni o ira era sega ni dau veivosoti era na . . .

  • Vakacacana na veimaliwai nira cudrucudru qai yaloca, qori e vakavuna mera sega ni taleitaki ra qai galili

  • Yalototolo, lomaocaoca, se lomabibi vakalevu

  • Kauaitaka vakasivia na cala, era sega ni marautaka kina na bula

  • Sega ni lomavakacegu nira kila tiko e dodonu mera veivosoti

  • Nuiqawaqawa vakalevu qai rawarawa nira tauvimate, okati e keri na tubunidra, mateniuto, sasala, mosi ni ulu, kei na so tale *

NA CAVA NA VEIVOSOTI? Na veivosoti oya na nomu vosota na cala e vakayacori vei iko, nomu sega ni cudruvaka, yalocataka, se o nanuma mo sauma lesu na cala e caka vei iko. E sega ni kena ibalebale ni o vakadonuya na cala, o raica vakamamada se o vakalecalecava na ka e yaco. Na nona vakatulewataka e dua me veivosoti e ivakaraitaki ni nona loloma, nona guta na veiyaloni, kei na nona saga me vinaka tiko ga nona veimaliwai kei ira eso tale.

Na veivosoti e vakaraitaka tale ga na yalorawarawa. Ena yalorawarawa e dua me veivosoti ni kila eda dau cala se valavala ca kece ena ka eda tukuna se cakava. (Roma 3:23) E kaya kina na iVolatabu: “Moni dau yalorawarawa, ni dau veivosoti tale ga vakarawarawa ke dua e didivaka e dua na ka vua e dua tale.”—Kolosa 3:13.

E bibi gona me vakaraitaki vata na veivosoti kei na “ivau vinaka duadua ni duavata,” oya na loloma. (Kolosa 3:14) E kaya na website na Mayo Clinic me baleta na yaga ni veivosoti . . .

  •   Vinaka na veimaliwai ni o veikauaitaki, yalorawarawa, qai lomani koya e cala

  • Vakavinakataka noda ivakarau ni vakasama, da qai veiyaloni kei na Kalou

  • Vakalailaitaka na lomaocaoca, nuiqawaqawa, kei na yaloca

  • Sega ni lomabibi vakalevu

KUA NI BEITAKI IKO. E kaya na mekesini na Disability & Rehabilitation ni dau dredre vua e dua e cala me kua ni beitaki koya tiko ga ena ka e cakava. Ia e kaya tale na mekesini ni dodonu me valuta na ivakarau ni yalo qori ni na rawa ni vakaleqa na nona bula, wili kina nona vakasama. Qo eso na ka o rawa ni cakava.

  • Kua ni namaka vakasivia na ka, ia nanuma tiko nida dau cala kece.—Dauvunau 7:20

  • Vuli mai na nomu cala, saga mo kua tale ni cakava

  • Bibi mo vosovoso; eso na malumalumu se ivakarau sa matau vei keda ena taura na gauna meda valuta.—Efeso 4:23, 24

  • Vakailala kei ira na itokani era veiuqeti, donu nodra rai, era yalovinaka, qai tukuna vakadodonu vei iko na ka.—Vosa Vakaibalebale 13:20

  • Ke o cala, vakadinata ni o cala dina qai totolo ni kere veivosoti. O na lomavakacegu ni o veivakameautaki.—Maciu 5:23, 24

YAGA NI IVAKAVUVULI VAKAIVOLATABU!

E vulica ena iVolatabu o Patricia sa cavuti oti mai me dau veivosoti. E kaya: “Sa yali na cudru a dau tiki tu ni noqu bula. Au sa sega tale ni rarawa, se meu vakararawataki ira eso tale. E vakadeitaka vei au na ivakavuvuli vakaivolatabu ni lomani keda na Kalou qai vinakata meda marautaka na bula.”

E kaya e dua na turaga o Ron: “Au sega ni cakava rawa e dua na ka ena ka era vakasamataka se cakava eso tale. Ia au rawa ni lewa vinaka na ka au vakasamataka se cakava. Meu kua ni yaloca keu vinakata na veiyaloni. Au sa qai kila ni rau sega ni veiriti na veiyaloni kei na yaloca. E sega ni rawa niu veiyaloni qai yaloca ena dua ga na gauna. Sa vinaka ena gauna qo noqu lewaeloma.”

^ para. 8 Sources: Website ni Mayo Clinic kei na Johns Hopkins Medicine, kei na mekesini na Social Psychiatry and Psychiatric Epidemiology.