Raica sara na lewena

Raica na lewenivola

 ENA RAWATI VAKACAVA NA MARAU?

Qarauna Nomu Bula, Kua ni Soro

Qarauna Nomu Bula, Kua ni Soro

VEIVAKAYALOLAILAITAKI NA TAUVIMATE SE SO TALE NA ITUVAKI. E turaga bulabula qai dau cakacaka o Ulf, ia a paralasi ni toso na gauna. E kaya: “Dua na ka noqu lomabibi. Au malumalumu, sa ca vei au na bula . . . e vaka me sa ‘sega na kequ yaga.’”

Eda vakadeitaka ena ituvaki e sotava o Ulf nida sega ni tarova rawa na tauvimate. Ia e tiko eso na ka eda rawa ni cakava meda kua kina ni tauvimate vakalevu. Ke kaukaua mada ga na keda mate, eda se rawa ga ni marau. Ni bera nida dikeva se rawa vakacava qori, meda raica mada eso na ivakavuvuli e vauca na noda bula.

‘LEWAI KEDA VINAKA.’ (1 Timoci 3:2, 11) Ena vakaleqa noda bula na kana kei na gunu sivia, e vakayagataki tale ga kina e levu na ilavo! “Mo kua ni maliwai ira na gunu waini vakasivia, kei ira na kana lewe ni manumanu vakasivia, ni na dravudravua na dau mateni kei na dau kana.”—Vosa Vakaibalebale 23:20, 21.

ME SAVASAVA NA YAGO. “Meda vakasavasavataki keda mai na dukadukali kece vakayago kei na dukadukali vakayalo.” (2 Korinica 7:1) E levu era vakadukadukalitaka na yagodra nira mama se kania na tavako, se vakayagataka vakasivia na alakaolo kei na wainimategaga. Kena ivakaraitaki, e laurai ena vakadidike ni tabana ni bula mai Merika ni “vakavuna na tauvimate, vakaleqa na yago, qai kania na gacagaca” na vakatavako.

VAKAMAREQETA NA YAGO KEI NA BULA. “O koya ga [Kalou] e buli keda, e vakavuna tale ga noda bula tiko kei na noda yavala.” (Cakacaka 17:28) Kena ibalebale meda kua ni cakava na ka e ririkotaki kina noda bula se da mani cakacaka, draiva se digia na ka ni veivakamarautaki. E sega na betena na ka ni veivakalasai e lekaleka ga na kena kamica, qai rawa ni vakaleqa na yagomu ena nomu bula taucoko!

IVAKARAU NI YALO ME QARAUNI. E cakacaka vata na vakasama kei na yago. Qarauna gona na lomaocaoca vakasivia, cudru vakalialia, vuvu, kei na so tale na ivakarau ni yalo e dau vakatubuleqa. E kaya na Same 37:8: “Mo biuta na cudru qai vakanadakuya na katakata.” E kaya tale ga na iVolatabu: “Kua vakadua ni  lomaocaocataka na siga nimataka, ni siga nimataka e tu vata kei na kena lomaocaoca.”—Maciu 6:34.

VAKASAMATAKA GA NA VEIKA VINAKA. E kaya na Vosa Vakaibalebale 14:30: “Na yalovinaka e bulabula kina na yago.” E kaya tale ga na iVolatabu: “Na yalomamarau e wai vinaka.” (Vosa Vakaibalebale 17:22) Era vakadinadinataka na kenadau ni yaga na ka e tukuna ya na iVolatabu. E kaya e dua na vuniwai mai Sikoteladi: “Ni o mamarau, o na sega ni tautauvimate me vakataki ira era sega ni mamarau.”

KUA NI SORO. Me vakataki Ulf sa vakamacalataki mai, eda na rairai sega ni cakava rawa e dua na ka ena ituvaki dredre eda sotava, ena vinakati ga meda vosota. E rawa nida cakava eso na ka meda vosota kina. E dau ikuri tale ni leqa vei ira eso na nodra vakalaiva na ituvaki dredre era sotava me vakayalolailaitaki ira. E kaya na Vosa Vakaibalebale 24:10: “Ke o yalolailai ena siga ni rarawa, ena lailai na nomu kaukaua.”

Eso e dau seavu nodra yalolailai ni toso na gauna. Era cakava na veiveisau e gadrevi ena nodra bula, era cakava eso na ka mera vosota kina. Qori sara ga na ka a cakava o Ulf. E dau masu qai vakasamataka vakatitobu na itukutuku veivakacegui ena iVolatabu. Qori e vukei koya me “kauaitaka ga na ka e rawa ni cakava, me kua ni leqataka na ka e sega ni rawata.” Me vakataki ira ga eso tale era sotava na ituvaki dredre, e raica o Ulf ni bibi na loloma kei na veikauaitaki. E uqeti koya qori me wasea vei ira eso tale na itukutuku veivakacegui ena iVolatabu.

A vakila tale ga vakalevu na rarawa e dua na turaga o Steve. A yaco e dua na vakacalaka ni se qai yabaki 15, mani paralasi mai domona me yaco ina qeteqeteniyavana. Ia ni yabaki 18, sa yavala tale na ligana. A lai vuli sara ina univesiti, e tekivu e kea nona vakayagataka na wainimategaga, gunu alakaolo, kei na nona veiyacovi tawadodonu. Dua na ituvaki ca sara e tu kina nona bula. Ia nona vulica na iVolatabu e veisautaka nona rai me baleta na bula, qai vukei koya me biuta nona ivakarau ca. E kaya: “Sa yali na galili au vakila dede tu mai. Qo au sa vakila na vakacegu kei na marau.”

Na nodrau ivakamacala o Steve kei Ulf eda nanuma kina na ka e kaya na Same 19:7, 8: “E uasivi na lawa i Jiova, e veivakaukauataki. . . . E dodonu na ivakaro i Jiova, e vakamarautaka vakalevu na loma ni tamata, e savasava na ivakaro i Jiova, e serau kina na mata.”