Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ENA RAWATI VAKACAVA NA MARAU?

Loloma

Loloma

EDA VINAKATA MEDA LOMANI. Ke sega na loloma ena sega ni vinaka na vakawati, vuvale, kei na veitokani. Sa rauta me tukuni ni na vinaka noda vakasama, eda na mamarau tale ga ke da dauloloma. Na “loloma” cava e vakaibalebaletaki tiko qo?

E bibi na loloma ni veidomoni, ia e sega ni kena mataqali e veivosakitaki tiko eke. Na loloma e vakaibalebaletaki tiko qo e uasivi, e uqeta e dua me vakaraitaka na veikauaitaki dina qai vakaliuci ira eso tale. E dusimaki ena ivakavuvuli vakalou, qai salavata kei na ivakarau ni lomada se na ka eda vakila.

E totoka na sala e vakamacalataka kina na iVolatabu na loloma qori. E kaya: “Na loloma e vosovoso qai yalovinaka. Na loloma e sega ni vuvu, e sega ni tukutukuni koya, e sega ni dokadoka, e sega ni cakava na ka e sega ni rakorako, e sega ni kauaitaka ga na ka e baleti koya, e sega ni cudrucudru. E sega ni katona na ca. E sega ni marautaka na ka e sega ni dodonu, e marautaka ga na dina. E ubia na ka kece, . . . e nuitaka na ka kece, e vosota na ka kece. E sega vakadua ni seavu na loloma.”—1 Korinica 13:4-8.

E “sega vakadua ni seavu” na loloma qori, kena ibalebale e tawamudu, e dei tale ga ni toso na gauna. E kilai me “ivau vinaka duadua ni duavata” ni okati kina na vosovoso, yalovinaka, kei na veivosoti. (Kolosa 3:14) Eda tamata ivalavala ca, ia ena dei qai marautaki noda veitokani ke yavutaki ena loloma. Raica mada na kena ivakaraitaki ena bula vakawati.

 “IVAU VINAKA DUADUA NI DUAVATA”

E vakamacalataka o Jisu na ivakavuvuli me baleta na vakawati. Kena ivakaraitaki, a kaya: “‘Ena biuti tamana kei tinana o tagane me kabiti watina me rau sa na lewe dua ga’ . . . O koya gona, na ka sa vauca vata na Kalou me kua ni tawasea na tamata.” (Maciu 19:5, 6) E rua na ivakavuvuli bibi e laurai ena tikinivolatabu qori.

“ME RAU SA NA LEWE DUA GA.” Na loloma e itataqomaki ena vakawati. Ena vukei rau na veiwatini me rau veivolekati tiko ga. Ena taqomaki rau mai na veibutakoci se nodrau “lewe dua ga” kei koya e sega ni kedrau isa. (1 Korinica 6:16; Iperiu 13:4) Ni tawayalodina e dua vei rau na veiwatini, sa na yali na veinuitaki qai rawa ni kavoro na vakawati. Ena qai leqa levu sara ke ra sa tiko na gone. E rawa nira nanuma nira sega ni lomani, era na veilecayaki, qai cudrucudru.

“NA KA SA VAUCA VATA NA KALOU.” Na vakawati e ituvatuva vakalou. O ira na veiwatini era rokova na ituvatuva qori era na saga me dei nodra vakawati. Ni basika na leqa, e sega ni imatai ni ka era na vakasamataka na veitalatala. Era na sega ni soro, ena dei na nodra veilomani. Na loloma va qori e “vosota na ka kece,” ena vukei rau na veiwatini me rau walia na leqa me vakilai tiko ga kina na duavata kei na vakacegu ena vakawati.

Era na marautaka vakalevu na gone ke ra dauloloma qai vosovoso na itubutubu. E kaya e dua na goneyalewa o Jessica: “Erau veilomani dina qai veidokai o Na kei Ta. Niu raica nona dau dokai Ta o Na, vakabibi ena veika e vakatulewataka me baleti keitou na gone, e uqeti au sara ga meu vakatotomuri koya.”

Na itovo talei duadua ni Kalou na loloma. E kaya na iVolatabu: “Ni Kalou ga na loloma.” (1 Joni 4:8) E sega gona ni kurabuitaki ni vakatokai o Jiova me “Kalou mamarau.” (1 Timoci 1:11) Eda na marau tale ga nida vakatotomuria na nona itovo na Dauveibuli, vakabibi na loloma. E kaya na Efeso 5:1, 2: “Moni vakatotomuria na Kalou ni oni luvena lomani, moni veilomani tiko ga.”