Raica sara na lewena

Raica na lewenivola

 IVAKASALA INA VUVALE | VAKAWATI

Sala Mo Vakaraitaka Kina na Vakavinavinaka

Sala Mo Vakaraitaka Kina na Vakavinavinaka

ITUVAKI DREDRE

E bibi na vakavinavinaka ni na marautaki kina na bula vakawati. Ia e levu na tagane kei na yalewa vakawati era sega ni kauaitaka na veika vinaka era cakava na watidra, era sega tale ga ni dau vakavinavinakataki ira na kedra isa. E tukuna e dua na daunivakasala ena ivola na Emotional Infidelity, ni levu na veiwatini “era kauai ga ena ka e se sega ni vakayacori [ena nodra bula vakawati], era sega ni kauaitaka na ka sa caka tiko ena nodra bula vakawati. Nira lako yani ena noqu ofisi era kauaitaka ga na veiveisau me caka, era sega ni tukuna e dua na ka me baleta na veika vinaka era vinakata me caka tiko ga. Na leqa e tiko vei ira kece na veiwatini qori, era sega ni vakaraitaka na loloma ena nodra dau vakavinavinaka.”

Na cava drau rawa ni cakava vakaveiwatini me kua ni yaco kina na ituvaki qori?

KA MO KILA

Na vakavinavinaka ena rawa ni vakalailaitaka na lomaocaoca e basika ena vakawati. Ena vinaka na nodrau veimaliwai na veiwatini ke rau kauaitaka qai vakavinavinakataka na nona itovo vinaka na kedrau isa. Se mani dredre tale ga vakacava na ituvaki, e rawa ni rau walia na veiwatini ke rau dau vakavinavinaka.

Yalewa vakawati. E kaya na ivola na Emotional Infidelity sa cavuti oti mai: “E levu na yalewa vakawati era sega ni dau kauaitaka nodra lomaocaocataka na tagane vakawati na qaravi ni vuvale.” Na lomaocaoca qori e bau vakilai tale ga ena vuvale erau cakacaka ruarua kina na veiwatini.

Tagane vakawati. Era dau raica vakamamada na tagane vakawati na sasaga i watidra nira veitokoni ena qaravi ni vuvale, me vaka na nodra cakacaka saumi, nodra qaravi na gone, se cakacaka ni vale. E kaya o Finau * sa tolu na yabaki na dede ni nona vakawati: “Eda dau cala kece, niu cakava e dua na cala e dau ca sara ga na lomaqu. Ia ni vakavinavinakataki au o watiqu me baleta na veika au cakava e vale, au raica kina ni se lomani au tiko ga dina ni tiko na noqu malumalumu. Au marau qai kila ni tiko na kequ yaga!”

Ena sotavi na leqa ena bula vakawati ke nanuma o watimu ni sega ni kauaitaki. E kaya e dua na yalewa vakawati o Vere: “Ke o nanuma ni sega ni kauaitaki iko o watimu, o rawa ni vaqara e dua tale ena kauaitaki iko.”

 KA MO CAKAVA

Kauaitaka na ka o raica. Saga mo raica na itovo vinaka i watimu ena loma ni dua na macawa. Raica tale ga na ka e dau cakava me cicivaki vinaka kina na vuvale, eso na ka qori o rairai dau vakawalena tu e liu. Ni oti e dua na macawa, cakava e dua na lisi ni (1) itovo o taleitaka me baleti watimu kei na (2) veika yaga e cakava ena vuvale.—iVakavuvuli vakaivolatabu: Filipai 4:8.

Na cava e bibi kina mo dau kauaitaka na ka o raica? E kaya e dua na yalewa vakawati o Eka: “O rawa ni vakawaleni watimu ni oti e vica na yabaki nomudrau vakawati. O sa sega ni kauaitaka na veika vinaka e dau cakava, o kauaitaka ga na ka e sega ni cakava.”

Vakacava o dau raica vakamamada nona cakacaka vakaukaua o watimu? O sega ni dau vakavinavinakataki tagane ke cakava eso na ka e vale ni o nanuma ni nona itavi ga ya? O sega ni dau vakacaucautaki yalewa ena nona qaravi ratou na gone ni o nanuma e dodonu ga me cakava qori? Saga mo kauaitaka qai vakavinavinakataka na ka kece e cakava o watimu, se mani levu se lailai na ka e cakava me veitokoni kina ena vuvale.—iVakavuvuli vakaivolatabu: Roma 12:10.

Mo dau vakavinavinaka. E sega ni tukuna ga na iVolatabu meda vakavinavinaka, e tukuna tale ga: “Me laurai na nomuni vakavinavinaka.” (Kolosa 3:15) Mo vakamatauna gona mo dau vakavinavinakataki kemu isa. E kaya e dua na tagane vakawati o Jemesa: “Ni vakavinavinakataka o watiqu na veika au dau cakava, e solia tale vei au na igu meu sasaga tiko ga meu dua na ulunivuvale vinaka, meu kua tale ga ni vakawalena noqu vakawati.”—iVakavuvuli vakaivolatabu: Kolosa 4:6.

Ena qaqaco na kedra ivau na veiwatini ke ra dau vakavinavinaka. E kaya e dua na tagane vakawati o Maikeli: “Ena sega ni kavoro e levu na bula vakawati ke rau dau kauaitaka na veiwatini na veika erau dui taleitaka me baleti kedrau isa. Ni basika na leqa, ena sega ni imatai ni ka rau na vakasamataka na veitalatala ni levu tale tu na ka e marautaki kina nodrau bula vakawati.”

^ para. 9 Sa veisau eso na yaca.