Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 NA RAI NI IVOLATABU

Lomalagi

Lomalagi

E levu na ka e dau tukuni me baleta na lomalagi, veiletitaki tale ga vakalevu. Ia na veika e tukuni ena iVolatabu e duidui sara kei na veika era vakavulici kina e levu.

Cava na lomalagi?

KA ERA TUKUNA ESO

E levu na ka e vakabauti me baleti lomalagi kei na kena inaki. Kena ivakaraitaki:

  • E levu era kaya nira lotu vaKarisito era duavata kei na ka e tukuni ena ivola na New Catholic Encyclopedia, ni o lomalagi e “nodra itikotiko dei o ira na kalougata nira mate ena Turaga.”

  • E kaya o Rapai Bentzion Kravitz ni vakatabakidua na vakabauta vakaJiu ena gauna era se bula tiko kina, sega ni gauna era sa bula tale kina mai na mate. Ia e kaya ni “dua na ka na vakacegu e vakilai mai lomalagi, e veisau na rai vaka kina na veiwekani kei na Kalou ni vakatauvatani kei na gauna sa sivi.” E kaya tale ga o Kravitz “ni vakabauti na lomalagi ena ivakavuvuli vakaJiu, ia e sega ni vakamacalataki vakalevu qori ena Torah,” na nodra ivola na Jiu.

  • Era vakabauta na lotu Idu kei na lotu Buda ni duidui na ivakatagedegede ni bula vakayalo e lomalagi. E vanua ga ni wawa vakalekaleka, me sucu tale kina e dua e vuravura se dewa yani ena ituvaki e cecere sara vei lomalagi.

  • Eso tale era sega ni vakabauta ni tiko na lomalagi, ra kaya ni vakasama ga ni gone.

E levu na ka e dau tukuni me baleti lomalagi

KA E KAYA NA IVOLATABU

E sega ni dua tu ga na ibalebale ni “lomalagi” ena iVolatabu. Kena ivakaraitaki:

  • E vakamacalataka na Vakatekivu 2:19 na “manumanuvuka kece ni lomalagi.” Na vosa “lomalagi” e tukuni tiko eke e vakaibalebaletaki ina maliwalala, na macawa eda dau sarava.

  • E tukuni ena Aisea 13:10 na “kalokalo ni lomalagi kei na matakalokalo”—na vanua eda vakatoka me maliwalala.

  • E vakamacalataki ena iVolatabu “na vanua” e “tiko kina” na Kalou “mai lomalagi,” e tukuni tale ga kina nira tiko na “agilosi mai lomalagi.” (1 Tui 8:30; Maciu 18:10) Na vakayagataki ni vosa “lomalagi” e dusia tiko ga na itikotiko, sega ni dua tale na ka e vakaibalebaletaka. *

“Moni rai sobu mai lomalagi moni raica mai na nomuni itikotiko tabu cecere qai lagilagi.”Aisea 63:15.

 Era na lako kece i lomalagi na tamata vinaka nira sa mate?

E sega ni vakavulica na iVolatabu ni o vuravura e vanua ni wawa vakalekaleka ni bera noda lai bula i lomalagi ena gauna eda sa mate kina. E vakamatatataka na iVolatabu ni sega ni inaki taumada ni Kalou meda mate. Vakasamataka mada qo:

  • E kaya na Kalou vei rau na imatai ni veiwatini: “Drau vakawa, mera le levu mai, drau vakasinaiti vuravura.” (Vakatekivu 1:28) E dodonu me noda itikotiko dei o vuravura, meda bula tawamudu kina. Erau na mate na imatai ni tagane kei na yalewa ke rau talaidredre vua na Kalou. Ka ni rarawa ni yaco sara ga qori.Vakatekivu 2:17; 3:6.

  • Na nona talaidredre gona na imatai ni tamata e vakavuna nona mate kei watina, vaka kina o ira na nodrau kawa. (Roma 5:12) Vakacava, sa na sega sara ga ni dua tale na noda inuinui?

  • E kaya na iVolatabu nida “waraka [tiko] na lomalagi vou kei na vuravura vou me vaka na nona yalayala.” * (2 Pita 3:13) Ena vuku ni Matanitu ni Kalou, ena vakasuka mai na Kalou na vuravura ena kena ituvaki a nakita taumada ni “sa na sega tale [kina] na mate.” (Vakatakila 21:3, 4) E tukuni tiko e keri na bula i lomalagi se na vuravura ga eda tawana tiko qo? Ni dua na ka e tukuni ni sa na “sega tale” ni yaco, e kena ibalebale ga ni dua na gauna a dau yaco tiko na veika qori. A sega ni bau dua e mate mai lomalagi. E vakaibalebaletaki gona na tikinivolatabu qori ena veika ena yaco e vuravura, na vanua e dodonu ga meda bula kina, da qai rai vakanamata meda bula vata kei ira eda dau lomana. E kaya tale ga na iVolatabu nira na vakaturi o ira na mate mera vakasukai vei ira na wekadra.—Joni 5:28, 29.

E levu era marautaka na veika era vakavulici kina ena iVolatabu me baleti lomalagi. Kena ivakaraitaki, e kaya o George, a lotu Katolika tu e liu: “E vakacegui au na ivakavuvuli vakaivolatabu me baleta na bula tawamudu e vuravura. E matata cake mai na lako i lomalagi.” *

“E nei Jiova na lomalagi, ia sa solia na vuravura vei ira na luve ni tamata.”Same 115:16.

^ para. 13 E ibulibuli vakayalo na Kalou, sega ni vakayago. (Joni 4:24) Ena vakayalo tale ga na nona itikotiko, e duidui sara ni vakatauvatani kei na vuravura eda bula tiko kina.

^ para. 19 Na matavosa “vuravura vou” e sega ni vakaibalebaletaki ina dua sara ga na vuravura vou, qori e vakatakarakarataki ira tiko na qai bula e vuravura e vakadonui ira na Kalou.—Same 66:4.

^ para. 20 E vakavulica na iVolatabu ni dua na iwiliwili lailai ga era digitaki mera veiliutaki mai lomalagi kei Jisu, era le 144,000.—1 Pita 1:3, 4; Vakatakila 14:1.