Raica sara na lewena

Raica na lewenivola

Na Website ni iVakadinadina i Jiova

Digia na Vosa vakaViti

 ULUTAGA LEVU | VUNA ME WILIKI KINA NA IVOLATABU

Vakatutu me Tekivu Kina na Wili iVolatabu

Vakatutu me Tekivu Kina na Wili iVolatabu

Na cava mo cakava me marautaki qai yaga kina nomu wili iVolatabu? Raica mada e lima na vakatutu sa yaga vei ira e levu.

Digia vinaka na vanua. Vaqara e dua na vanua vakanomodi. Me kua ni levu na ka e veivakasosani se veivakawelei ni na rawa ni vakataotaka nomu wiliwili. Raica e dua na vanua e rarama vinaka o qai cegu cagi bulabula kina ni na veivuke vakalevu ena nomu wiliwili.

Me donu nomu rai. Na iVolatabu e nona ivola na Tamada vakalomalagi. Ke o vinakata me yaga na nomu wili iVolatabu, e bibi mo vakatotomuria na nona yalorawarawa e dua na gone me vakavulici koya o nona itubutubu. Biuta vakatikitiki na rai se nanuma cala ena rairai tiko vei iko me baleta na iVolatabu me rawa ni vakavulici iko na Kalou.Same 25:4.

Masu ni bera ni o wiliwili. E volai ena iVolatabu na rai ni Kalou, meda kerei koya gona me vukei keda meda kila na ka e kaya na nona Vosa. E yalataka na Kalou me solia na “yalo tabu vei ira era kerea vua.” (Luke 11:13) Ena vukei iko na yalo tabu mo kila na rai ni Kalou, ena vakatakila tale ga vei iko “na veika titobu mada ga ni Kalou.”1 Korinica 2:10.

Saga mo kila na ka o wilika. Kua ni wiliwili wale ga, vakasamataka vakatitobu na veika o wilika. Taroga eso na taro va qo: ‘Na itovo cava au raica vua au wilika tiko qo na kena italanoa? Au rawa ni vakatotomuri koya vakacava?’

Kotora eso na isausau. Me yaga na nomu wili iVolatabu, vaqara e dua na tikina o na via vakavinakataka ena nomu bula. Qo na ivakaraitaki ni isausau o rawa ni kotora, ‘Au via vulica e levu na ka me baleta na Kalou.’ ‘Au via vakavinakataka noqu itovo, au via dua na tagane vakawati se radinivale vinaka.’ Digia sara na tikinivolatabu ena vukei iko mo rawata na nomu isausau. *

Qori eso ga na vakatutu me tekivu kina nomu wili iVolatabu. Na cava mo cakava mo marautaka kina nomu wiliwili? E vakamacalataki ena ulutaga tarava eso na vakatutu.

^ para. 8 Era na marau ni vukei iko na iVakadinadina i Jiova mo raica na tikinivolatabu veiganiti.