Vakacava o vinakata me marautaki qai yaga na nomu wili iVolatabu? Raica mada qo eso na ka o rawa ni cakava.

Digia e dua na vakadewa nuitaki ni iVolatabu, e vakayagataka na vosa rawarawa. O na sega ni marautaka nomu wiliwili ke dredre se sa makawa na vosa e vakayagataki. Wilika na iVolatabu e vakayagataka na vosa rawarawa, ena tara tale ga na lomamu. Digia e dua na ivakadewa donu ni iVolatabu. *

Vakayagataka na iyaya vovou. Sa tu tale ga nikua ena internet na iVolatabu. E rawa ni wiliki se download ena kompiuta, tablet, se mobail. Eso na porokaramu ni iyaya vovou sa tu nikua e rawarawa ni veidutaitaki kina e vica na vakadewa ni iVolatabu. Ke o sega ni via wiliwili, o rawa mada ga ni rogoca ena internet na iVolatabu ni sa katoni tu ena so na vosa. E levu era cakava qori nira vodo basi, savasava se ra cakava tiko eso tale na ka. E vinaka mo tovolea na kena iwalewale o taleitaka.

Vakayagataka na iyaya ni vakekeli. Ena veivuke vakalevu ena nomu wiliwili na kena vakayagataki na iyaya ni vakekeli. Kena ivakaraitaki, na mape ni vanua vakaivolatabu ena vukei iko mo raitayaloyalotaka na vanua kei na veika e yaco. Na mekesini qo kei na iwasewase ena website na jw.org e vakatokai na “iVakavuvuli Vakaivolatabu,” e rawa ni  vakamatatataka vei iko na ka o wilika ena iVolatabu.

Veiveisautaka na ivakarau ni nomu wiliwili. Rawa ni o tekivu wiliwili ena iwase ni iVolatabu o dau taleitaka vakalevu. Ke o via kilai ira vinaka na talanoataki ena iVolatabu, e rawa ni tekivu e kea na nomu wiliwili. Dua na vakatutu ni iwalewale qori o rawa ni tovolea e tiko ena kato “ Vakekeli Mo Kilai Ira na Talanoataki ena iVolatabu.” Ke o taleitaka, o rawa tale ga ni wilika vakaiulutaga na iVolatabu se muria na veitaravi ni veika e volatukutukutaki kina.